ކޮމަންޑޫ ދާއިރާގެ ބައި-އިލެކްޝަންގައި ބައިވެރިވެވަޑައިގަތުމަށް މިއަދު ށ. ފޯކައިދޫއަށް ދަތުރުފުޅެއް ކުރެއްވުމަށް ރައީސް އިބްރާހިމް މުހައްމަދު ސޯލިހު ނިންމަވާފައި ވަނިކޮށް އެމަނިކުފާނު ކޮވިޑް-19 އަށް ޕޮޒިޓިވްވި ހަބަރު ލިބުން ވެގެން ދިޔައީ ރައީސްގެ އިންތިޒާރުގައި ތިބި ފޯކައިދޫ ރައްޔިތުންނަށް ލިބުނު ކުއްލި ސިހުމަކަށެވެ.
ރައީސްއަށް މަރުހަބާ ދެންނެވުމަށާއި އެމަނިކުފާނުގެ އިސްތިގުބާލުގައި ފޯކައިދޫގެ ރައްޔިތުން ވަނީ ގިނަ ކަންތައްތަކެއް އިންތިޒާމުކޮށްފަ އެވެ. ރަށުގެ ބަނދަރުމަތިންނާއި ރަށު ތެރެއިން މި މަންޒަރު ވަރަށް ބޮޑަށް ފެނިގެންދެ އެވެ.
ކޮވިޑަށް ޕޮޒިޓިވްވިކަން މިއަދު މެންދުރުގެ ވަގުތެއްގައި ސޯޝަލް މީޑިއާ މެދުވެރިކޮށް ރައީސް ހާމަކުރެއްވުމާއެކު ފޯކައިދޫގެ ރައްޔިތުންގެ އިތުރުން އެމްޑީޕީގެ ހުރިހާ މެންބަރުންވެސް ތިބީ ވަރަށް ބޮޑަށް މާޔޫސްވެފަ އެވެ.
"ފޯކައިދޫ ރައްޔިތުންގެ ހިތުގައި ރައީސް ސޯލިހާ މެދު ވަރަށް ހާއްސަ ގަދަރަކާއި ލޯތްބެއް އަބަދުވެސް އޮންނާނެ. މިރޭގެ ޖަލްސާ، އަޅުގަނޑުމެން އުންމީދު ކުރަމުން ދިޔައީ ރައީސް ސޯލިހާ އެކު ކުރިއަށް ގެންދެވޭނެ ކަމަށް. ހާއްސަކޮށް އެމްޑީޕީގެ ކަނބަލުން ރައީސް ޕޮޒިޓިވްވި ކަމުގެ ހަބަރު ލިބުމާ އެކު ވަރަށް ބޮޑަށް އެބަ އެކަމާ ހިތާމަފާޅުކުރޭ." އެ ރަށުގެ އެމްޑީޕީގެ ކެމްޕޭނުގެ މެނޭޖަރު އަދި ފޯކައިދޫގެ ހެލްތު ޕޮލިޓިކަލް އެޑްވައިޒާ، އަންވަރު އިބްރާހިމް ވިދާޅުވި އެވެ.
ރައީސް ސޯލިހަށް ފޯކައިދޫއަށް ވަޑައިނުގެންނެވުނު ނަމަވެސް އެ ރަށުގެ ރައްޔިތުން ތިބީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަޑައިގެންނަވާތީ ވަރަށް އުފަލުންނެވެ.
"އަޅުގަނޑުމެން ވަރަށް ބޮޑަށް ތައްޔާރުވަމުން މި ދިޔައީ ރައީސް އިބޫ ރިސީވް ކުރުމުގެ ކަންތައްތަކުގައި. އެހެން ނަމަވެސް ވަރަށް ދެރަކޮށް މި ދިމާވީ. އެކެމަކު ވެސް ރައީސް ނަޝީދާ އެކު ޖަލްސާއާ ރޭވިފައި ހުރި އެހެނިހެން ބައެއް ހަރަކާތްތައް ވެސް ކުރިއަށް ގެންދާނަން." ފޯކައިދޫ ކައުންސިލްގެ ރައީސް އަހުމަދް އާސިފް ވިދާޅުވި އެވެ.
ރައީސަށް ދަތުރުފުޅުގައި ބައިވެރިވެ ވަޑައިނުގެންނެވުނު ކަމުގައި ވިޔަސް ރައީސް ނަޝީދު އާއި ސަރުކާރުގެ މަތީ ފަންތީގެ ވަފުދެއް މިއަދު ފޯކައިދޫއަށް ވަޑައިގެން މިރޭގެ ޖަލްސާ ގައި ބައިވެރިވެވަޑައިގެންނަވާނެ އެވެ.
މިއީ ރައީސް ނަޝީދު، ރާޝިދުގެ ކެމްޕޭނުގައި ބައިވެރިވެވަޑައިގެންނަވަން އެ ދާއިރާއަށް ކުރައްވާ ފުރަތަމަ ދަތުރުފުޅެވެ. މީގެ ކުރިން ރައީސް ސޯލިހު ވަނީ ރާޝިދުގެ ކެމްޕޭން ފައްޓަވައި ދެއްވުމަށް ށ. ކޮމަންޑޫއަށް ދަތުރުފުޅެއް ކުރައްވާފައެވެ.
