ދާކާ، ބަންގްލަދޭޝް (ޖެނުއަރީ 21) - ބަންގްލަދޭޝްގެ ހާއްސަ ޕެރެމިލިޓަރީ ފައުޖަކުން އދ. ގެ ސުލްހަ ބަލަހައްޓާ ސިފައިންގެ ގޮތުގައި ހަރަކާތްތެރިވުން މަނާކުރުމަށް ގިނަ ބަޔަކު ގޮވާލަން ފަށައިފި އެވެ.
ޕެރެމިލިޓަރީ ފައުޖު، ރެޕިޑް އެކްޝަން ބެޓޭލިއަން (އާރްއޭބީ) އިން އިންސާނިއްޔަތާ ހިލާފު ޖަރީމާތައް ހިންގައި، ގިނަ ބަޔަކު ގަސްތުގައި ގެއްލުވާލާފައިވާ ކަމަށް ބައެއް އާއިލާތަކުން ތުހުމަތު ކުރެ އެވެ.
އެ އާއިލާތަކުގެ އިތުރުން އިންސާނީ ހައްގުތަކަށް ވަކާލާތު ކުރާ 12 ޖަމިއްޔާއަކުން އދ. އަށް ފޮނުވި ސިޓީއެއްގައި ގޮވާލީ އެފަދަ ފައުޖަކުން ސުލްހަ ބެލެހެއްޓުމުގައި ނުހިމެނުމަށެވެ.
އދ. އަށް ފޮނުވި ސިޓީގެ ބޭނުމަކީ ބަންގްލަދޭޝްގެ ފުލުހުންނާއި ސިފައިން ހިމެނޭ ގޮތަށް ކަމާ ބެހޭ އިދާރާތަކަށް ޕްރެޝަރު ކުރުމެވެ.
ބަންގްލަދޭޝްގެ ބައެއް އާއިލާތަކާއި ޖަމިއްޔާތަކުން ތުހުމަތު ކުރާ ގޮތުގައި އާރްއޭބީ އިން ވަނީ އެތައް ސަތޭކަ ބަޔަކު ގަސްތުގައި ގެއްލުވާލާފަ އެވެ. އޭގެ ތެރޭގައި އިދިކޮޅު ލީޑަރުންނާއި އެކްޓިވިސްޓުން ހިމެނެ އެވެ.
އާރްއޭބީ އަކީ ބަންގްލަދޭޝް ސިފައިންނާއި ފުލުހުންގެ ތެރެއިން ހޮވާލެވޭ ހާއްސަ ބަޔަކު ތިބޭ އަސްކަރީ ފައުޖެކެވެ. މިދިޔަ މަހު އެމެރިކާއިން އެ ފައުޖާ ދެކޮޅަށް ދަތިކުރުމުގެ ފިޔަވަޅު އެޅި އެވެ.
އެމެރިކާއިން ފިޔަވަޅު އެޅީ އެ ފައުޖުގެ އިތުރުން ވަކިވަކި އިސް އޮފިސަރުންނަށެވެ. އޭގެ ތެރޭގައި ކުރީގެ އޮފިސަރުންނާއި މިހާރުގެ އޮފިސަރުން ވެސް ހިމެނެ އެވެ.
މިދިޔަ ބުރާސްފަތި ދުވަހު ދަތިކުރުމުގެ ފިޔަވަޅުތަކާ ދެކޮޅަށް ވާހަކަ ދައްކަވަމުން ހޯމް މިނިސްޓަރު އަސަދުއްޒަމާން ހާން ވަނީ އާރްއޭބީ ދިފާއު ކުރައްވާފަ އެވެ.
"އާރްއޭބީގެ ސަބަބުން މުޖުތަމައަށް ކުރާ ރަނގަޅު އަސަރުގެ ވާހަކައެއް ނުދައްކާ. އާރްއޭބީ އިން މަސްތުވާތަކެއްޗާއި ޓެރަރިޒަމާ ދެކޮޅަށް ކުރާ ހަނގުރާމައިގެ ވާހަކައެއް ނުދައްކާ،" އޭނާ ނޫސްވެރިންނަށް ވިދާޅުވި އެވެ.
ނަމަވެސް އާރްއޭބީ އިން ގެއްލުވާލާފައިވާ ކަމަށް ތުހުމަތު ކުރެވޭ މީހުންގެ އާއިލާތަކުން އެ ވާހަކައާ ދެކޮޅެވެ. އެފަދަ އާއިލާތައް ހިމެނޭ ގޮތަށް މަޔެރް ޑާކްގެ ނަމުގައި ވަނީ ގްރޫޕެއް އުފައްދާފަ އެވެ. އެ ގްރޫޕުން ބުނާ ގޮތުގައި އާރްއޭބީ އިން ވަނީ 600 އަށް ވުރެ ގިނަ މީހުން ވަގަށް ނަގައި، ގެއްލުވާލާފަ އެވެ.
އާރްއޭބީ އުފެއްދީ 2004 ވަނަ އަހަރު ޓެރަރިޒަމާއި ސީރިއަސް ކުށްތަކާ ދެކޮޅަށް މަސައްކަތް ކުރުމަށެވެ. ނަރަޔަންގަންޖް ސިޓީގައި ހަތް މީހުން ރަހީނުކޮށް މަރާލިކަމުގެ ކުށް ސާބިތުވެ، 2017 ވަނަ އަހަރު ކޯޓަކުން 26 މީހުން މަރަން ހުކުމް ކުރިއިރު، އޭގެ ތެރޭގައި އާރްއޭބީގެ 16 އޮފިސަރުން ހިމެނެ އެވެ.
