މާލެ ތެރޭގައި ދަތުރެއް ކުރަން ޓެކްސީއެއް ނުލިބޭ ކަމަށް އާންމުންގެ ގިނަ ބަޔަކު ޝަކުވާކުރާތީ، ހިދުމަތް ދޭން އިންކާރުކުރާ ޓެކްސީ ސެންޓަރުތަކާއި ޓެކްސީތައް ރިޕޯޓުކުރަން ޓްރާންސްޕޯޓު މިނިސްޓްރީން އަންގައިފި އެވެ.
ޓްރާންސްޕޯޓުން އިއްޔެ ކުރި އިއުލާނެއްގައި ބުނީ މާލެ ތެރޭގައި ދަތުރުތައް ނުނަގާ ހުޅުލެ އާއި ހުޅުމާލޭގެ ދަތުރުތައް ނަގަމުންދާ ކަމުގެ ޝަކުވާ އެ އޮފީހަށް ލިބެމުންދާ ކަމަށެވެ.
މިނިސްޓްރީން އެދުނީ މިހެން ހިދުމަތް ދޭން އިންކާރު ކުރާ މީހުންގެ މައުލޫމާތު އެ މިނިސްޓްރީގެ ފޯނު ނަމްބަރު 7943434 މެދުވެރިކޮށް ވައިބާ މެސެޖުން މި މިނިސްޓްރީއާ ހިއްސާކުރުމަށެވެ.
މި މައްސަލައިގައި ޓްރާންސްޕޯޓުން ޓެކްސީ ސެންޓަރުތަކަށް އެންގީ ގާނޫނުތަކާއި ގަވާއިދުތަކާ އެއްގޮތަށް އަމަލުކުރުމަށެވެ. އެގޮތުން އެއްގަމު ދަތުރުފަތުރުގެ ގާނޫނާއި ޓެކްސީ ގަވާއިދުގައި ޓެކްސީ ސެންޓަރުތަކުގެ މައްޗަށް ލާޒިމުކުރާ ކަންކަން ފުރިހަމަނުކުރާ ނަމަ ފިޔަވަޅު އަޅާނެ ކަމަށް އިލްތިމާސް ކުރި އެވެ.
ޓެކްސީ ގަވާއިދު ބުނާ ގޮތުން ޓެކްސީތަކުން ކުރާ ދަތުރުތަކާއި ހިދުމަތުގައި ހޭދަކުރާ ވަގުތުގެ ރެކޯޑު ބަލަހައްޓާ މިނިސްޓްރީއަށް ރިޕޯޓުކުރުމަކީ ޓެކްސީ ސެންޓަރުގެ ޒިންމާއެކެވެ.
