ތެހްރާން، އިރާން (ޖެނުއަރީ 20) - ޗައިނާ އާއި އިރާނާއި ރަޝިއާ ގުޅިގެން ބާއްވާ ކަނޑުގެ އަސްކަރީ ތަމްރީންތަކެއް ހުކުރު ދުވަހު އިންޑިއާ ކަނޑުގެ އުތުރުގެ ހިސާބުތަކުގައި ކުރިއަށް ދާނެ ކަމަށް އިއުލާނުކޮށްފި އެވެ.
އިރާނުން ތަމްރީނަށް ކަނޑައަޅާފައިވާ ތަރުޖަމާނު ވިދާޅުވީ "ނޭވަލް ސެކިއުރިޓީ ބެލްޓް ކޮމްބައިންޑް ވޯ ގޭމް 2022" ގެ ނަން ދީފައިވާ ތަމްރީންގައި ތިން ގައުމުގެ އަސްކަރީ ޔުނިޓްތައް ބައިވެރިވާނެ ކަމަށެވެ.
އިންޑިއާ ކަނޑުގެ އުތުރުގައި ކުރިއަށް ގެންދާ ތަމްރީންގައި އިރާން ނޭވީގެ ކަނޑާއި ވައިގެ ސިފައިންނާއި، އިސްލާމިކް ރިވޮލިއުޝަން ގާޑް ކޯޕްސްގެ ނޭވީ އާއި، ޗައިނާ އާއި ރަޝިއާގެ ކަނޑުގެ އަސްކަރީ މަނަވަރުތަކާއި ސިފައިން ބައިވެރިވާނެ އެވެ.
ތަމްރީނަށް ކަނޑައަޅާފައިވާ ތީމަކީ "ސުލްހަ އާއި ސަލާމަތަށް އެކުގައި" އެވެ. އެ ހަރަކާތް ކުރިއަށް ދާނީ ކަނޑުގެ 17،000 އަކަ ކިލޯމީޓަރުގެ ސަރަހައްދެއްގަ އެވެ. މީގެ ކުރިން ދެ ފަހަރެއްގެ މަތިން މި ތިން ގައުމުން މިފަދަ ތަމްރީންތައް އިންޑިއާ ކަނޑުގައި ބޭއްވި އެވެ.
