ނިއުކާސަލް (ޖެނުއަރީ 20) - ރެއާލް މެޑްރިޑްގެ ބެލްޖިއަމް ތަރި އެޑެން ހަޒާޑް، ހޯދަން ނިއުކާސަލް ޔުނައިޓެޑުން ކުރި ބިޑް ރެއާލް މެޑްރިޑުން ގަބޫލުކުރި ނަމަވެސް އެ ޓްރާންސްފާ ކުރިއަށް ގެންދިއުމާ މެދު ހަޒާޑް ދެކޮޅު ކަމަށް އިނގިރޭސި މީޑިއާ ރިޕޯޓްތައް ބުނެފި އެވެ.
ދާދި ފަހުން ސައުދީ އަރަބިއްޔާގެ ވަލީ އަހުދު މުހައްމަދު ބިން ސަލްމާންގެ ހިއްސާއާ އެކު ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ނިއުކާސަލް ގަނެފައިވާއިރު، މި ފަހަރުގެ ޓްރާންސްފާ މާކެޓްގައި އެ ޓީމަށް ބޮޑު އިންވެސްޓްމަންޓެއް ކުރުމުގެ ފުރުސަތު އޮތީ ފަހިވެފަ އެވެ. އެ ޓީމުން ވަނީ އެތުލެޓިކޯ މެޑްރިޑްގެ ކިއެރަން ޓްރިޕިއޭ އާއި ބާންލީގެ ކްރިސް ވުޑްގެ ސޮއި ހޯދައިފަ އެވެ.
މީޑިއާ ރިޕޯޓްތައް ބުނާ ގޮތުން ނިއުކާސަލް އިން ރެއާލްގެ ހަޒާޑް ހޯދަން 40 މިލިއަން ޕައުންޑްގެ ބިޑެއް ކުރުމުން ރެއާލުން އެ ހުށަހެޅުން ގަބޫލުކުރުމުގެ ފުރުސަތު ބޮޑެވެ. އެކަމަކު، އެ ފަދަ ހާލަތެއް ކުރިމަތިވެ، ރެއާލުން ނިއުކާސަލްގެ ބިޑް ގަބޫލުކުރި ނަމަވެސް އެ ޓީމަށް ދާން ހަޒާޑް ބޭނުމެއް ނުވެ އެވެ. އަލުން ޕްރިމިއާ ލީގަށް ދާނަމަ ހަޒާޑް ބޭނުމީ ކުރީގެ ކްލަބު ޗެލްސީ އަށް ދާށެވެ. އެހެންވެ، ޗެލްސީގެ ވެރިޔާ ރޯމަން އަބްރަމޮވިޗަށް ހަޒާޑްގެ ފޯނުން ގުޅާފައިވާ ކަމަށް ވެސް ބައެއް މީޑިއާތަކުން ރިޕޯޓްކޮށްފައިވެ އެވެ.
ފްރާންސްގެ ލިލް އިން ފާހަގަވި ހަޒާޑަކީ ޗެލްސީގައި 2012 އިން 2019 އަށް މޮޅު ކުޅުމެއް ދެއްކި ކުޅުންތެރިއެކެވެ. ބެލްޖިއަމް ގައުމީ ޓީމުގެ ކެޕްޓަންކަން ކުރަމުން އަންނަ ހަޒާޑް ރެއާލަށް ބަދަލުވީ 2019 ވަނަ އަހަރު 100 މިލިއަން ޔޫރޯ އަށެވެ. ހަޒާޑް ރެއާލްގައި ދައްކާ ކުޅުމަށް ބަލައި އިތުރު 40 މިލިއަން ޔޫރޯ ދޭ ގޮތަށް އެ އެއްބަސްވުމުގައި ހިމަނާފައިވެ އެވެ.
ރެއާލަށް ބަދަލުވެ މިދިޔަ ދެ ސީޒަނުގައި ވެސް އޭނާ އަށް އަސްލު ފެންވަރުގެ ކުޅުމެއް ނުދެއްކެ އެވެ. އަނިޔާގެ ގިނަ މައްސަލަތަކެއް ދިމާވެ، މިހާތަނަށް ހަޒާޑަށް ރެއާލް ޖޯޒީގައި ކުޅެވުނީ އެންމެ 43 މެޗެވެ. އަދި އެ ޓީމަށް ޖަހައިދިނީ އެންމެ ހަތަރު ގޯލެވެ.
ޓްރާންސްފާ ބާޒާރުގައި ހަރަދުކުރަން ބަލާއިރު، ބޮޑު ބަޖެޓެއް އޮތް ނަމަވެސް ނިއުކާސަލް އިން ގެންގުޅޭ ވިސްނުމަކީ އެންމެ ފުރަތަމަ ފަހަރު ބޮޑު ހަރަދެެއް ނުކޮށް ކޮންޓްރޯލްކޮށް، ޕްލޭނެއްގެ ތެރެއިން ކުރިއަށް ދިއުމެވެ. މި ވަގުތު ޕްރިމިއާ ލީގުގެ ރެލިގޭޝަން ޒޯންގައި އޮތުމުން ނިއުކާސަލް މި ވަގުތަށް ޖެހޭނީ އެ ހާލަތުން އަރައިގަނެވޭނެ ގޮތަކަށް ރާވައިގެން ކުރިއަށް ދިއުން ކަމަށް އެ ޓީމުގެ ކޯޗު އިންގްލެންޑްގެ އެޑީ ހޯވް ވެސް ވަނީ ބުނެފަ އެވެ.
