ލެސްޓާ (ޖެނުއަރީ 20) - އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑުން 3-1 އިން ބްރެންޓްފޯޑް ބަލިކުރިއިރު، އިތުރު ވަގުތުގައި ސްޓީވެން ބާގްވައިން ޖެހި ދެ ގޯލުން ޓޮޓެންހަމް ހޮޓްސްޕާސް އިން 3-2 އިން ލެސްޓާ ސިޓީ ބަލިކޮށް ލީގުގެ ފަސް ވަނަ އަށް ޖެހިލައިފި އެވެ.
ރޭގެ މޮޅާ އެކު ޓޮޓެންހަމް ވަނީ ލީގުގެ ހަތަރެއްގައި އޮތް ވެސްޓް ހޭމް ޔުނައިޓެޑާ ޕޮއިންޓަކަށް ގާތަށް ޖެހިލައިފަ އެވެ. ވެސްޓް ހޭމް ހަތަރެއްގައި އޮތީ 22 މެޗުން 37 ޕޮއިންޓާ އެކު އެވެ. ޓޮޓެންހަމް ފަހަކަށް އެރީ 19 މެޗުން 36 ޕޮއިންޓާ އެކު އެވެ. ހަ ވަނައިގައި އޮތް އާސެނަލަށް 20 މެޗުން 35 ޕޮއިންޓް ލިބިފައިވާއިރު، ޔުނައިޓެޑް ހަތް ވަނައިގައި އޮތީ 21 މެޗުން 35 ޕޮއިންޓް ހަމަކޮށްގެންނެވެ.
އަމިއްލަ ދަނޑުގައި ކުޅުނު ބްރެންޓްފޯޑަށް ރޭގެ މެޗުގެ ފުރަތަަމަ ހާފުގައި ލީޑުނަގަން ރަނުގެ ފުރުސަތުތަކެއް ލިބުނެވެ. އެ ގޮތުން މަތައިސް ޖެންސަން އޭރިއާތެރެއިން މުޅިން ހުސްކޮށް ހުރެ ފޮނުވާލި ދެ ޝޮޓް ވެސް ޔުނައިޓެޑްގެ ކީޕަރު ޑޭވިޑް ޑެހެއާ ވަނީ މަތަކޮށްފަ އެވެ.
ކުޅުން ރަނގަޅުކޮށް ޔުނައިޓެޑުން ވަނީ ދެ ވަނަ ހާފް ފެށުނުތާ 10 މިނިޓް ތެރޭ އެންތަނީ އެލަންގާ ބޮލުން ގޯލެއް ޖަހައި ޔުނައިޓެޑަށް ލީޑުނަގައިދިނެވެ. އޭގެ ހަތް މިނިޓް ފަހުން ކައުންޓަ އެޓޭކެއްގައި ބްރޫނޯ ފެނާންޑޭސް ޖައްސާލި ބޯޅައަކުން މޭސަން ގްރީންވުޑް ވަނީ ޔުނައިޓެޑްގެ ލީޑުފުޅާކޮށްދީފަ އެވެ.
ލަނޑު ޖެހުމަށް ފަހު ޔުނައިޓެޑްގެ މެކްޓޮމިނޭ އާއި ބްރޫނޯ ފެނާންޑޭސް އަދި ރަޝްފޯޑް އުފާފާޅުކުރަނީ.-- ފޮޓޯ: އޭއެފްޕީ
އަނިޔާގެ ސަަބަބުން ޔުނައިޓެޑް އެންމެ ފަހުން ކުޅުނު މެޗުތަކުގައި ނުފެނުނު ކްރިސްޓިއާނޯ ރޮނާލްޑޯ ރޭގެ މެޗުގައި ކުޅުނުއިރު، މެޗުގެ ފަހު 20 މިނިޓަށް އޭނާގެ ބަދަލުގައި މާކަސް ރަޝްފޯޑް އެރުވި އެވެ. ރޮނާލްޑޯ ބަދަލުކުރުމުން ވަރަށް ބޮޑަށް ހިތްހަމަނުޖެހުން ފާޅުުކުރި އެވެ. ރޮނާލްޑޯގެ ބަދަލުގައި ކުޅެން އަރައި ރަޝްފޯޑް ވަނީ މެޗުގެ 77 ވަނަ ގޯލު ޖަހައިފަ އެވެ. ފެނާންޑޭސް ދިން ބޯޅަ ރަޝްފޯޑް ވަނީ ގޯލުގެ މަތީ ކަނަށް ފޮނުވާލައިފަ އެވެ. މެޗުގެ 85 ވަނަ މިނިޓްގައި ޔުނައިޓެޑްގެ އޭރިއާތެރެއަށް ބްރެންޓްފޯޑުން އެއްލި ދިގު އެއްލުމެއްގައި އެ ޓީމުގެ ގޯލު ޖެހީ އިވާން ޓޯނޭ އެވެ.
މި މެޗުގައި ރޮނާލްޑޯ ބަދަލުކުރުމުން އޭނާ ހިތްހަމަނުޖެހުން ފާޅުކޮށް، ކަންތައް ކުރި ގޮތާ ބެހޭގޮތުން މެޗަށް ފަހު ރަލްފް ރަންގްނިކް ގާތުގައި ނޫސްވެރިއަކު ސުވާލުކުރުމުން އޭނާ ބުނީ އެއީ "ނޯމަލް" ކަމެއް ކަމަށާއި ބަދަލު ކުރަން ޖެހުނު ސަބަބު ރޮނާލްޑޯ އަށް ކިޔައިދީފައިވާނެ ކަމަށެވެ.
ރޭގެ ނަތީޖާއާ އެކު ޔުނައިޓެޑް ވެފައިވަނީ ލީގުގެ ތާރީހުގައި އެންމެ ފުރަތަމަ ރަށުންބޭރުގައި 300 މޮޅު ހަމަކުރި ޓީމަށެވެ.
ލެސްޓާ ދަނޑުގައި ރޭ ޓޮޓެންހަމްގެ ހެރީ ކޭން އެ ޓީމަށް ލީޑުނަގައިދޭން ފޮނުވާލި ދެ ހަމަލާ ވެސް ކާމިޔާބެއްނުވި އެވެ. ތިރިތިރިން ޖެހި ޝޮޓް ގޯލު ރޮނގުމަތިން ލެސްޓާގެ ލޫކް ތޯމަސް ސަލާމަތް ކުރިއިރު، ކޭން ބޮލުން ފޮނުވާލި ބޯޅަ އަމާޒުވީ ގޯލުގެ ހުރަސްދަނޑިއަށެވެ. ލެސްޓާ އިން މި މެޗުގައި ލީޑުނެގީ 24 ވަނަ މިނިޓްގައި ޓޮޓެންހަމް އޭރިއާތެރެއިން ލިބުނު ބޯޅައެއް ގޯލަށް ފޮނުވާލައިގެން ޕެޓްސަން ޑަކާ ޖެހި ގޯލުންނެެވެ.
ލެސްޓާގެ އޮފްސައިޑް މަޅިން ސަލާމަތްވެ، މެޗުގެ 38 ވަނަ މިނިޓްގައި ޓޮޓެންހަމްގެ ކޭން ވަނީ އެ ޓީމަށް އެއްވަރުކޮށްދީފަ އެވެ. ލެސްޓާ އިން މެޗުގައި ދެ ވަނަ ފަހަރަށް ލީޑުނެގީ މެޗުގެ 76 ވަނަ މިނިޓްގައި ޖޭމްސް މެޑިސަން ޖެހި ގޯލުންނެވެ.
އިތުރު ވަގުތުގެ ފަސް ވަނަ މިނިޓްގައި ޓޮޓެންހަމްގެ މެޓް ޑޮހަޓީ މެއިން ކޮންޓްރޯލް ކޮށްލި ބޯޅައެއް ލެސްޓާގެ ޝަލްގާ ސޮޔުންޗޫ އަށް ބޭރު ނުކޮޮށްލެވި އޭރިއާތެރެއިން ޓޮޓެންހަމްގެ ބާގްވައިން އަށް ލިބުމުން އޭނާ ވަނީ ގޯލުގެ ތެރެއަށް ބޯޅަ ފޮނުވާލައިފަ އެެވެ. އޭގެ ދެ މިނިޓް ފަހުން ކޭން ހުސްކޮށްލާފައި ބާގްވައިން އަށް ޖައްސާލި ބޯޅަ އޭނާ ވަނީ ލެސްޓާގެ ކީޕަރު ކެޝްޕާ ޝްމައިކަލް ކައިރިން ނައްޓާފައި ގޯލުގެ ތެރެއަށް ފޮނުވާލައިފަ އެވެ.
