ކްރޮސްރޯޑްސްގެ ރަށްތަކުގެ ތެރެއިން ފަސް ރަށެއް ވިއްކާލަން އިއުލާން ކޮށްފި އެވެ.
މާލޭގެ ދެކުނު ފަރާތުގައި އޮންނަ އެނބޫދޫ ފަޅު ހިއްކައިގެން، ތައިލެންޑުގެ އެންމެ ބޮޑު އެއް ކުންފުނި ކަމަށްވާ ސިންހަ އެސްޓޭޓުން ތަރައްގީކުރި "ކްރޮސް ރޯޑް" މަޝްރޫއުގައި ޖުމްލަ ނުވަ ރަށް ހިމެނެ އެވެ.
އެ މަޝްރޫއުގެ ފުރަތަމަ ފިޔަވައްސަށް 311 މިލިއަން ޑޮލަރު (4.7 ބިލިއަން ރުފިޔާ) ހަރަދުވާއިރު މުޅި މަޝްރޫއުއަށް 800 މިލިއަން ޑޮލަރު (12.3 ބިލިއަން ރުފިޔާ) ހަރަދުވާނެކަމަށް އެ ކުންފުނިން ބުނެފައިވެ އެވެ.
ކްރޮސްރޯޑްސް ހިންގާ ސިންގަޕޫރުގެ ރިއަލް އެސްޓޭޓް ކުންފުނި ޖޭއެލްއެލް ހޮޓެލްސް އެންޑް ހޮސްޕިޓަލިޓީ ގުރޫޕުން ކޮށްފައިވާ އިއުލާނުގައި ބުނެފައި ވަނީ އެ ފަސް ރަށުގައި ރިސޯޓު ހަދަން އެއް ރަށަށްވުރެ ގިނަ ރަށްތަކަށް ވެސް އިންވެސްޓަރުންނަށް ކުރިމަތިލެވޭނެ ކަމަށެވެ.
އެ ރަށްތައް ގަންނަ ކުންފުނިތަކަށް ކްރޮސްރޯޑްސް މަޝްރޫއު ހިންގި ތައިލެންޑުގެ ސިންހާ އެސްޓޭޓާ ގުޅިގެން ރަށް ތަރައްގީ ކުރުމުގެ ފުރުސަތު ވެސް ވަނީ ހުޅުވާލައިފަ އެވެ. ވިއްކަން އިއުލާން ކޮށްފައިވާ ރަށްތަކަކީ އަދި އެއްކޮށް ތަރައްގީކޮށް ނުނިމި ހުރި ރަށްތަކެކެވެ.
ރަށްތައް ވިއްކާލަން އިއުލާން ކުރި ނަމަވެސް ވިއްކާ އަގުތައް ހާމަކޮށްފައެއް ނުވެ އެވެ.
އިންޓަގްރޭޓެޑް ޓޫރިޒަމް ޕްރޮޖެކްޓުގެ ދަށުން ތަރައްގީ ކުރާ އެ ތަނުގައި ރަށެއް ތަރައްގީކޮށް ނިމުމުން ކްރޮސްރޯޑްސް މެރީނާއާ ގުޅުވާލާނެ އެވެ. ހާޑްރޮކް އާއި ސާއީ ލެގޫންގައި މިހާރު ވަނީ ރިސޯޓު ހުޅުވައިފަ އެވެ.
ޓޫރިޒަމް މިނިސްޓްރީން މި ރަށްތައް ދޫކޮށްފައިވަނީ 50 އަހަރުގެ ލީސް އެގްރީމަންޓެއްގެ ދަށުންނެވެ. ލީސް ހަމަވާނީ 2066 ވަނަ އަހަރު އެވެ.
