ލަންޑަން (ޖެނުއަރީ 19) - އިނގިރޭސި ޕްރިމިއާ ލީގުގައި މިދިޔަ އާދިއްތަ ދުވަހު އާސެނަލްއާ ޓޮޓެންހަމް ހޮޓްސްޕާސް ވާދަކުރަން އޮތް ނޯތު ލަންޑަން ޑާބީ ފަސްކުރަން ޕްރިމިއާ ލީގުން ނިންމުމުން އެކަމަށް ޓޮޓެންހަމްގެ ކޯޗު އެންޓޯނިއޯ ކޮންޓޭ ފާޑުކިޔައިފި އެވެ.
މި ސީޒަންގެ ދެ ވަނަ ނޯތު ލަންޑަން ޑާބީ ފަސްކުރީ އާސެނަލްގެ ސީނިއާ ޓީމްގެ ކުޅުންތެރިންގެ ތެރެއިން ގިނަ ބަޔަކު އެކި ސަބަބުތަކާ ހުރެ ޓީމާ ވަކިވާން ޖެހިފައިވާތީ އެވެ. ކޮވިޑް ޖެހިގެން ބައެއް ކުޅުންތެރިން ކުޅުމާ ދުރުގަ ތިބިއިރު، އެފްރިކަން ކަޕް އޮފް ނޭޝަންސް އަށް ދިޔަ ޓީމާ އެކު ބައެއް ކުޅުންތެރިން ވެސް އެބަތިއްބެވެ. އަދި އަނިޔާގެ ސަބަބުންވެސް ބައެއް ކުޅުންތެރިންނަށް މި މެޗުގައި ނުކުޅެވޭތީ އާސެނަލުން ވަނީ މި މެޗު ފަސްކޮށްދޭން އެދިފަ އެވެ.
އާސެނަލްގެ ހުށަހެޅުން ދިރާސާ ކުރުމަށްފަހު ޕްރިމިއާ ލީގުންވަނީ މެޗު ފަސްކުރަން ނިންމާފަ އެވެ. މިކަމާ ގިނަ ބަޔަކު ހިތްހަމަނުޖެހުން ފާޅުކުރަމުން އަންނައިރު، ޓޮޓެންހަމްގެ ކޯޗު ކޮންޓޭ ވެސް ވަނީ އެންމެ ފަހުން އޮތް ނޫސްވެރިންގެ ބައްދަލުވުމުގައި ޕްރިމިއާ ލީގުން މި މެޗު ފަސްކުރި އުސޫލަށް ފާޑުކިޔާފަ އެވެ.
ކޯޗު ކޮންޓޭ ބުނީ ކޮވިޑްގެ ހާލަތެއް މެދުވެރިވެގެން މެޗުތައް ފަސްކުރުމަކުން މައްސަލައެއް ކަމަށް ނުދެކޭ ކަމަށެވެ. ނަމަވެސް އާސެނަލްގެ ކުޅުންތެރިން އަނިޔާވެފަ ތިބުމުން މި މެޗު ފަސްކުރަން ޖެހޭނެ ކަމަށް ނުދެކޭ ކަމަށެވެ.
ޕްރިމިއާ ލީގުގެ މިފަހަރުގެ ގަވާއިދު ބުނާ ގޮތުން ކޮވިޑްގެ ހާލަތެއް މެދުވެރިވެގެން ޓީމްގެ ފިޓްކޮށް ތިބި ކުޅުންތެރިންގެ އަދަދު ގޯލް ކީޕަރު ނުހިމަނައި 13 ހަމަނުވާކަމަށް ވާނަމަ މެޗު ފަސްކުރަން އެކުލަބަކަށް ހުށަހެޅޭނެ އެވެ. މި ސީޒަންގައި މިހާތަނަށް ގިނަ މެޗުތަކެއް މިގޮތަށް ވަނީ ފަސްކޮށްދީފަ އެވެ.
ކޮންޓޭ ބުނީ ދުނިޔޭގެ ބޮޑު ލީގަކުން އަނިޔާގެ މައްސަލަތަކާ ހުރެ ލީގު މެޗެއް ފަސްކުރި ތަނެއް އޭނާގެ ހަޔާތުގައި ވެސް ނުފެންނަ ކަމަށެވެ.
"އަހަރެން ހަމަ އަޖައިބު އަންތަރީސްވެއްޖެ. އަހަރެންގެ ހަޔާތުގައި ފުރަތަމަ ފަހަރަށް ކުޅުންތެރިންނަށް އަނިޔާވެފައި ތިބުމުން މެޗެއް މި ފަސްކުރީ. އަނިޔާ މަދު ކުރަން ބޭނުންމިއްޔާ ޝެޑިއުލް ހަދާއިރު އެގޮތަށް ވިސްނައިން ބަދަލުގެނޭ،" ކޮންޓޭ ބުންޏެވެ.
މި މެޗަކީ މި ސީޒަންގަ ކޮވިޑްގެ ހާލަތާއި ކުޅުންތެރިންގެ އަނިޔާގެ މައްސަލަ ދިމާވެގެން އާސެނަލުން އެދިގެން ލަސްކުރި ފުރަތަމަ މެޗެވެ. މިކަމާ ގުޅޭގޮތުން ގިނަ ބައެއްގެ ފާޑުކިޔުން ޕްރިމިއާ ލީގަށް އަމާޒުވެފައިވާއިރު، މި ނިންމުމުގެ ދިފާއުގަ މިހާތަނަށް ވާހަކަ ދައްކާފަ ވަނީ މަދު ކޯޗުންތަކެކެވެ.
އެގޮތުން ލެސްޓަ ސިޓީގެ ކޯޗު ބްރެންޑެން ރޮޖާސް ވަނީ އާސެނަލްގެ ސީނިއާ ޓީމުގެ ކުޅުންތެރިން ހަމަނުވާތީ ޕްރިމިއާ ލީގުން ނިންމި ނިންމުމަށް ތާއީދުކޮށްފަ އެވެ. ކުރިން ލިވަޕޫލާއި ސްވަންސީ ސިޓީ އަށް ކޯޗުކޮށްދިން ރޮޖާސް ބުނީ ގޯލް ކީޕަރު ނުހިމަނައި 13 ހަމަނުވާކަމަށްވާނަމަ މެޗު ފަސްކޮށްދިނުމަށް އެދުމުގެ އިޚުތިޔާރު ހުރިހާ ޓީމަކަށް ވެސް ހަމަހަމަ އަށް އޮންނަން ޖެހޭނެ ކަމަށެވެ. އަދި 23 އަހަރުން ދަށުގެ ކުޅުންތެރިން ހިމަނައިގެން ޓީމު ހަމަކުރުމަކީ ހައްލެއް ނޫން ކަމަށެވެ.
