ބެއިޖިން، ޗައިނާ (ޖެނުއަރީ 18) - އެހެން ގައުމުތަކުން ޗައިނާއަށް ފޮނުވާ ޕެކޭޖުތައް ޑިސްއިންފެކްޓް ކުރަން ޕޯސްޓަލް ސާވިސްތަކަށް އަންގައިފި އެވެ.
ކަމާ ބެހޭ އިދާރާތަކުން ބުނެފައި ވަނީ ޗައިނާގައި ކޮވިޑް ކޭސްތައް ފެތުރުމާއި ބައިނަލްއަގްވާމީ ޕޯސްޓް ޕެކޭޖުތަކާ ގުޅުމެއްވުން އެކަށީގެންވާ ކަމަށެވެ.
ކޮވިޑް ފަތުރާ ވައިރަސް 2019 ވަނަ އަހަރު އެންމެ ފުރަތަމަ ފެނުނު ޗައިނާއިން ގެންގުޅެނީ "ޒީރޯ ކޮވިޑް"ގެ ހަރުކަށި ސިޔާސަތެކެވެ.
ވެރިރަށް ބެއިޖިންގައި ވިންޓާ އޮލިމްޕިކްސް ފަށަން ގާތްވެފައި ވާއިރު، އެ ސިޓީ އާއި އެހެން ސިޓީތަކުން ވެސް މިހާރު ވަނީ ކޮވިޑް ކްލަސްޓާތައް ފެނިފަ އެވެ.
ޗައިނާގެ ބައެއް އޮފިޝަލުން ބުނެފައި ވަނީ ބޭރުން ފޮނުވާ ޕެކޭޖްތަކުގެ ސަބަބުން ބައެއް މީހުންގެ ހަށިގަނޑަށް ވައިރަސް ފޯރުމަކީ އެކަށީގެންވާ ކަމެއް ކަމަށެވެ.
ޗައިނާ ޕޯސްޓުން ހޯމަ ދުވަހު މަސައްކަތްތެރިންނަށް އެންގީ ބޭރުން ފޮނުވާ ހުރިހާ ޕެކޭޖެއް ވީ އެންމެ އަވަހަކަށް ޑިސްއިންފެކްޓް ކުރުމަށެވެ.
ބޭރު ފޮނުވާ ޕެކޭޖްތަކާއި ސިޓީތަކާ ގުޅޭ މަސައްކަތް ކުރާ ހުރިހާ މުވައްޒަފުން ވެސް ކޮވިޑް ވެކްސިންގެ ބޫސްޓާ ޝޮޓް ޖަހަން ޖެހޭނެ ކަމަށް އަންގާފައި ވެ އެވެ.
އޭގެ އިތުރުން ކޮވިޑް ބޮޑަށް ފެތުރެމުންދާ ގައުމުތަކުން ތަކެތި ނުގަންނަން އާއްމުންގެ ކިބައިން އެދުނެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފައި ވަނީ ވައިރަހުގެ ސަބަބުން ތަގައްޔަރުވެފައިވާ އެއްޗަކުން ނުވަތަ ތަނަކުން މީހަކަށް ބަލި ޖެހުމުގެ ނުރައްކާ ކުޑަ ކަމަށެވެ.
އެމެރިކާގެ ސެންޓާޒް ފޯ ޑިޒީޒް ކޮންޓްރޯލް (ސީޑީސީ) އިން ބުނީ ތަގައްޔަރުވެފައިވާ އެއްޗެއް ނުވަތަ ތަނެއްގައި ތިން ދުވަސް ފަހުން ވައިރަސް ހުންނަ މިންވަރު 99 ޕަސެންޓު ކުޑަވާ ކަމަށެވެ.
މުޅި ޗައިނާއިން އަންގާރަ ދުވަހު ރިޕޯޓުކުރީ 127 ކޮވިޑް ކޭސް އެވެ.
