ޕެރިސް (ޖެނުއަރީ 16) - ލިއޮނަލް މެސީ އާއި ނޭމާ ނެތި ކީލިއަން އެމްބާޕޭގެ މޮޅު ކުޅުމާ އެކު، ފްރެންޗް ލީގުގައި ރޭ ޕީއެސްޖީން 2-0 އިން ބްރެސްޓް ބަލިކޮށްފި އެވެ.
މި މޮޅާ އެކު ފްރެންޗް ލީގުގެ އެއް ވަަނައިގައި ޕީއެސްޖީ އޮތީ 11 ޕޮއިންޓުގެ ލީޑަކާ އެކު އެވެ. އެއީ 21 މެޗުން 50 ޕޮއިންޓް ހޯދައިގެންނެވެ. ދެ ވަނައިގައި އޮތް ނީސް އަށް 21 މެޗުން 39 ޕޮއިންޓް ވަނީ ލިބިފަ އެވެ.
ނޮވެމްބަރު 30 ވަނަ ދުވަހު ސެއިން އެޓިއެންއާ ދެކޮޅަށް ކުޅުނު މެޗުގައި ކުޑަހުޅަށް ލިބުނު އަނިޔާގެ ސަބަބުން ނޭމާ ހުރީ ކުޅުމާ ދުރުގަ އެވެ. އާ އަހަރުގެ ޗުއްޓީގައި އާޖެންޓީނާގައި ހުއްޓައި މެސީ ކޮވިޑަށް ޕޮޒިޓިވްވިިއިރު، އޭނާ ވަނީ ބަލިން ފަސޭހަވެ، އެނބުރި ފްރާންސަށް އައިސްފަ އެވެ. އެކަމަކު، މި އަހަރު މިހާތަނަށް ޕީއެސްޖީ ކުޅުނު ތިން މެޗުގައި ވެސް މެސީ ނުފެެނެ އެވެ. މެސީ، އިންސްޓަގްރާމްގައި ކުރި ޕޯސްޓެއްގައި ވަނީ އޭނާގެ ކޮވިޑް ރިކަވަރީ ދަނީ ވަރަށް ލަހުން ކަމަށާއި އުއްމީދަކީ ވަރަށް އަވަހަށް މެޗު ފިޓްނަސް ރަނގަޅުކޮށް، ކުޅުމަށް އެނބުރި އައުމަށް ކަމަށް ބުނެފަ އެވެ.
މި ސީޒަނުގެ ނިޔަލަށް ޕީއެސްޖީގެ ކޮންޓްރެކްޓްގައި ހުރި އެމްބާޕޭ، އާ އަހަރު ފެށީ ފްރެންޗް ކަޕްގައި ވަނޭ ކޮޅަށް ހެދި ހެޓްރިކުންނެވެ. އޭގެ ފަހުން ޕީއެސްޖީ ވަނީ ލީގުގައި ލިޔޯނާ 1-1 އިން އެއްވަރުވެފަ އެވެ. ރޭ ބްރެސްޓް އަތުން ޕީއެސްޖީ މޮޅުވިއިރު، އެމްބާޕޭ ވަނީ މޮޅު ކުޅުމެއް ދައްކައިފަ އެވެ.
ޕީއެސްޖީ ދަނޑުގައި ކުޅުނު ރޭގެ މެޗު ފަށައިގެން 32 ވަނަ މިނިޓްގައި ޖިއޮޖީނިއޯ ވައިނަލްޑަމް ދިން ބޯޅައަކުން އެމްބާޕޭ ވަނީ ޕީއެސްޖީ އަށް ލީޑުނަގައިދީފަ އެވެ. ވައިނަލްޑަމް ދިން ބޯޅަ ކޮންޓްރޯލް ކޮށްލުމަށް ފަހު އޭރިއާ ރޮނގުކައިރިން އެމްބާޕޭ ގޯލުގެ ކައިރީ ކަނަށް ފޮނުވާލި ބޯޅަ ވަނީ ދަނޑީގައި ވެސް ޖެހިފަ އެވެ. މިއީ މި ސީޒަނުގައި އެމްބާޕޭ ޖެހި 19 ވަނަ ގޯލެވެ. އޭގެ ތެރެއިން 10 ގޯލު ޖެހީ ލީގުގަ އެވެ.
ދެ ވަނަ ހާފްގެ ކުޅުން ފެށިގެން އަށް މިނިޓް ތެރޭ ޕީއެސްޖީގެ ދެ ވަނަ ގޯލު ޖެހީ ޓަވަރޭސް މެންޑޭޒް އޭރިއާތެރެއިން ހުރަސްކޮށްލި ބޯޅަ އަކުން ތިލޯ ކެރާ އެވެ. މިއީ ޖެހިޖެހިގެން ލީގުގެ ދެ މެޗުގައި ކެރާ ގޯލު ޖެހި ފުރަތަމަ ފަހަރެވެ.
