ލަންޑަން (ޖެނުއަރީ 15) - އާސެނަލްގައި ކޮވިޑް-19ގެ ކޭސްތަކެއް އުޅޭތީ އާއި އެހެނިހެން އުނދަގޫތަކެއް ވެސް ހުރުމުން އެ ޓީމުގައި މެޗު ކުޅޭ ވަރަށް ކުޅުންތެރިން ހަމަނުވެދާނެ ކަމުގެ ބިރު އޮތުމާ އެކީގައި އިނގިރޭސި ޕްރިމިއާ ލީގުގައި މާދަމާރޭ ޓޮޓެންހަމާ ދެކޮޅަށް އާސެނަލުން ކުޅެން އޮތް މެޗު ފަސްކުރަން އެ ޓީމުން ރަސްމީކޮށް ހުށަހަޅައިފި އެވެ.
އާސެނަލުން ނެރުނު ބަޔާނެއްގައި ބުނެފައިވަނީ އެ ކްލަބްގެ ބައެއް ކުޅުންތެރިން މި ވަގުތު އެފްރިކަން ކަޕް އޮފް ނޭޝަންސް ކުޅެން ކެމަރޫންގައި ތިބިއިރު، ޓީމުގެ ކޭމްޕްގައި ކޮވިޑްގެ ކޭސްތަކެއް އޮތުމާއި އަނިޔާގެ މައްސަލަތައް ވެސް ޓީމަށް ކުރިމަތިވެފައިވުމާ އެކީގައި މެޗު ފަސްކުރަން ހުށަހަޅަން ޖެހުނީ "އެ ނޫން ގޮތެއް" މި ހާލަތަށް ބަލާއިރު، ނެތުމުން ކަމަށެވެ.
މިހާތަނަށް ޕްރިމިއާ ލީގުގެ 20 މެޗެއް ކޮވިޑާ ހެދި ފަސްކުރަން ޖެހިފައިވެ އެވެ. ވިހި ވަނަ މެޗަކީ މި ހަފްތާގައި ލެސްޓާ ސިޓީ އާއި ބާންލީ ކުޅެން އޮތް މެޗެވެ.
އާސެނަލުން ޓޮޓެންހަމް މެޗު ފަސްކުރަން ހުށަހެޅި ޕްރޮޕޯސަލާ ބެހޭގޮތުން ޕްރިމިއާ ލީގުން މިއަދު ގޮތެއް ނިންމާނެ އެވެ.
ކޮވިޑާ ހެދި ޕްރިމިއާ ލީގުން މެޗު ކުޅެން އަމަލުކުރަން ނިންމާފައިވާ ގަވާއިދު ބުނާގޮތުން 13 ކުޅުންތެރިންނާއި އެއް ކީޕަރު މެޗު ކުޅެވޭ ހާލަތުގައި ހުރެފިނަމަ މެޗު ކުޅެން ޖެހޭނެ އެވެ.
އާސެނަލުން އެންމެ ފަހުން ކުޅުނީ އިނގިރޭސި ލީގު ކަޕް ސެމީ ފައިނަލުގައި ލިވަޕޫލާ ދެކޮޅަށް ލަނޑެއް ނުޖެހި އެއްވަރުވި މެެޗެވެ. ބުރާސްފަތި ދުވަހުގެރޭ ލިވަޕޫލް ދަނޑުގައި ކުޅުނު އެ މެޗުގައި އާސެނަލްގެ ސެޑްރިކް ސޮއާރޭސް، ބުކާޔޯ ސަކާ އަދި ކަލުމް ޗެމްބާސް އަށް އަނިޔާވިިއިރު، އެ މެޗުގައި އާސެނަލްގެ ގްރޭނިޓް ޝަކާ އަށް ދެއްކި ރަތް ކާޑުގެ ސަބަބުން އޭނާ އަށް ސަސްޕެންޝަނެއް އަންނާނެ އެވެ.
