ހުޅުމާލެ ރުށްގަނޑު އެކެއް ސަރަހައްދުގައި ޕީސީއާރު ހެދޭނެ އިންތިޒާމު ހަމަޖައްސައިފި އެވެ.
އެތަނުގައި ސާމްޕަލް ނެގުމުގެ އިންތިޒާމު ހަމަޖައްސާފައި ވަނީ ހެލްތް ޕްރޮޓެކްޝަން އެޖެންސީ (އެޗްޕީއޭ)، ހުޅުމާލެ ހޮސްޕިޓަލާއި ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) ގުޅިގެންނެވެ.
ހުޅުމާލޭގައި ކޮވިޑަށް ޓެސްޓު ކުރެވޭނެ އިންތިޒާމު ހަމަޖައްސައިދީފައި ވަނީ ހުޅުމާލޭގައި ވެސް ޕީސީއާރު ހެދޭނެ އިންތިޒާމު ހަމަޖައްސައި ދިނުމަށް ގިނަ ބަޔަކު އެދެމުންދާ ދަނޑިވަޅެއްގަ އެވެ.
އެޗްޑީސީން ބުނީ އިއްޔެ އެ ސެންޓަރު ގާއިމް ކުރީ އެޗްޑީސީގެ އެދުމުގެ މަތިން ކަމަށެވެ.
ރުށްގަނޑު ސަރަހައްދުގައި ޕީސީއާރު ނަގަން ޖަހާފައި ވަނީ ޓެންޓެކެވެ.
މާލެ ސަރަހައްދުން ކޮވިޑަށް ޕޮޒިޓިވްވާ މީހުންގެ އަދަދު އިތުރުވެފައި ވާއިރު، ސޯޝަލް ސެންޓަރުގައި ގާއިމް ކޮށްފައިވާ ސާމްޕަލް ނަގާ ސެންޓަރު ބަންދުކޮށް މާލޭގެ ތާޖުއްދީން ސްކޫލުގައި ކޮވިޑަށް ޓެސްޓް ކުރުމަށް ސެންޓަރެއް ވަނީ ގާއިމްކޮށްފަ އެވެ.
އަދި އެފްއޭއެމްގެ ކުރީގެ އިމާރާތުގައި ކޮވިޑް ސާމްޕަލް ނެގުމަށް ވެސް ވަނީ ސެންޓަރެއް ގާއިމުކޮށްފަ އެވެ.
އެޗްޕީއޭޭއިން މިހާރު ވަނީ ކޮވިޑަށް އަޅާފައިވާ ފިޔަވަޅުތައް އިތުރަށް ވަރުގަދަކޮށްފަ އެވެ.
- މާލެއިން ބޭރަށް ފުރާ ކޮންމެ މީހަކު ވެސް ޕީސީއާރް ޓެސްޓު ހަދުން މަޖުބޫރު
- މާލެ ސަރަހއްދުގައި އިވެންޓްތަކާއި ހަފްލާ ފަދަ ކަންކަން 50 މީހުންނަށް ވުރެ މީހުން ހިމަނައިގެން ކުރިއަށް ނުގެންދިއުން
- ވެކްސިންގެ ޑޯޒްތައް ފުރިހަމަވެ 14 ދުވަސް ހަމަވެފައިވާ ފަރާތެއް ނަމަ ދަތުރުކުރުމުގެ 72 ގަޑިއިރު ނުވާ ޕީސީއާރު ނެގެޓިވް ނަތީޖާއެއް އޮންނަންޖެހޭ
- ކަރަންޓީން ވުމަށް އެހެން ރަށަކަށް ދަތުރު ކުރާނަމަ "ހާލުބެލުން ޕޯޓަލް" އިން ހުއްދަ ހޯދަން ޖެހޭ
ރާއްޖޭގެ ކޮވިޑް ހާލަތު ގޯސްވަމުން ދާއިރު ވޭތުވެ ދިޔަ 24 ގަޑިއިރު ތެރޭ 5513 ސާމްޕަލް ޓެސްޓު ކޮށްފައިވާ އިރު، އޭގެތެރެއިން 536 މީހަކު ވަނީ ޕޮޒިޓިވް ވެފަ އެވެ. އެއާ އެކު އެކްޓިވް ކޭސްތަކުގެ އަދަދު ވަނީ 4656 އަށް އަރާފަ އެވެ.
ރާއްޖެއިން ބަލި ޖެހުނު މީހުންގެ އަދަދު މިހާރު 99635 އަށް އަރާފައި ވާއިރު ހޮސްޕިޓަލުގައި އެޑްމިޓްކޮށް 21 މީހަކަށް ދަނީ ފަރުވާ ދެމުން ނެވެ.
ރާއްޖެއިން ކޮވިޑް ކޭސްއެއް އެންމެ ފުރަތަމަ ފެނިފައި ވަނީ މާޗް 7، 2020 ގައެވެ. މިހާތަނަށް ކޮވިޑް ބަލި ރާއްޖެއިން ފެނުނުތާ 675 ދުވަސްވެފައި ވާއިރު މިހާތަނަށް މި ބަލީގައި މަރުވި މީހުންގެ ޖުމްލަ އަދަދު ވަނީ 264 އަށް އަރާފަ އެވެ.
