ރާއްޖޭގެ އެކި ހިސާބުތަކުގައި ކޮވިޑުގެ ހާލަތު ގޯސްވެ، ބަލި ކޮންޓްރޯލް ކުރުމަށްޓަކައި ހާއްސަ ފިޔަވަޅުތަކެއް އަޅަން އެޗްޕީއޭއިން ނިންމާފައިވީ ނަމަވެސް ސްކޫލުތަކުގެ ކިޔެވުން ކުރިއެކޭ ވެސް އެއްގޮތަށް ކުރިއަށްދާނެ ކަމަށް އެޑިއުކޭޝަން މިނިސްޓްރީން ބުނެފި އެވެ.
ދެވަނަ ޓާމުގެ ކިޔެވުން އަންނަ ހަފްތާގައި ފެށުމަށްޓަކައި ވާންޖެހޭ ހުރިހާ ތައްޔާރީތަކަކާއި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް ވެސް އަޅާފައިވާނެ ކަމަށް އެޑިއުކޭޝަން މިނިސްޓްރީން ބުނެ އެވެ. އަދި ސްކޫލުތަކުގެ ކިޔެވުން މެދުކަނޑާލުމަށް އެއްވެސް މަޝްވަރާއެއް ކުރެވިފައިނުވާ ކަމަށާއި ނިއު ނޯމަލްގެ ދަށުން ކިޔަވައިދެމުންދިޔަ ގޮތަށް، ސަލާމަތީ ފިޔަވަޅުތަކާ އެކު ސްކޫލުތަކުގެ ކިޔެވުން އަންނަ އާދިއްތަ ދުވަހު ފަށާނެ ކަމަށް އެޑިއުކޭޝަން މިނިސްޓްރީގެ މީޑިޔާ އޮފިޝަލް މި ނޫހަށް މައުލޫމާތު ދިނެވެ.
ސްކޫލުތަކުގައި އަޅަންޖެހޭ ރައްކާތެރިކަމުގެ ފިޔަވަޅުތަކާ ގުޅިގެން އެޑިއުކޭޝަން މިނިސްޓްރީން އެޗްޕީއޭއާ އެކު މަޝްވަރާ ކުރަމުންދާ ކަމަށާއި ބަލިމަޑުކަމުގެ ހާލަތާ ގުޅޭ ގޮތުން އެ އިދާރާއާއެކު އަބަދުވެސް މަޝްވަރާ ކުރަމުންދާނެ ކަމަށް މިނިސްޓްރީގެ މީޑިޔާ އޮފިޝަލް ބުންޏެވެ. އަދި އެޗްޕީއޭގެ ލަފާގެ މަތިން ކުރީގައި ވެސް ސްކޫލުތަކުން އަޅާފައިވާ ފިޔަވަޅުތައް އެޅުމަށް މިނިސްޓްރީން ވަނީ ރާއްޖޭގެ ހުރިހާ ސްކޫލުތަކަކަށް މިހާރު އިރުޝާދު ދީފައި ކަމަށް ވެސް އޭނާ ބުންޏެވެ.
ސްކޫލުތަކުން އެޅުމަށް ކަނޑައަޅާފައިވާ ފިޔަވަޅުތަކުގެ ތެރޭގައި ރާއްޖެއިން ބޭރުން ނުވަތަ މޮނިޓަރިން އަށް ލާފައިވާ ރަށަކުން ދަތުރުކޮށްފައި އަންނަ ޓީޗަރުންނާއި ދަރިވަރުން ފަސް ދުވަހުގެ ތެރޭގައި ޕީސީއާރް ޓެސްޓު ހެދުމަށް ފަހު ނަތީޖާ ލިބުމުން ނޫނީ ސްކޫލަށް ހާޒިރު ނުވުމާއި ކޮވިޑްގެ ގައިޑްލައިންތަކަށް ސްކޫލުތަކުގެ މުވައްޒަފުންނާއި ދަރިވަރުން ފުރިހަމައަށް ތަބާވޭތޯ ބެލުން ހިމެނެ އެވެ.
އެގޮތުން ސްކޫލުގެ އެތެރޭގައި ހުރިހާ ވަގުތެއްގައި ވެސް މާސްކު އެޅުމާއި ގައިދުރުކަން ބެހެއްޓުމާއި ގްރޫޕް ހަދައިގެން ނޫޅުން ފަދަ ކަންކަމަށް ސްކޫލުތަކުން ހާއްސަ ސަމާލުކަން ދިނުމަށް މިނިސްޓްރީން ވަނީ އަންގާފަ އެވެ. އަދި ސެނިޓައިޒްކޮށް އަތް ދޮވުމުގެ އިންތިޒާމް ކޮންމެ ސްކޫލުގައި ވެސް ގާއިމްކޮށްފައި ހުންނަންޖެހޭނެ ކަމަށް މިނިސްޓްރީން އަންގާފައިވެ އެވެ.
ކޮވިޑުގެ ހާލަތާ ގުޅިގެން 2020 ވަނަ އަހަރު ވެސް ސްކޫލުތަކުގެ ކިޔެވުން ގެންދިޔައީ އޮންލައިންކޮށެވެ. މި އަހަރު އެ ހާލަތަށް އަލުން ރުޖޫއަވާން ޖެހިއްޖެނަމަ އެކަމާ ބެހޭ މަޝްވަރާތައް ކުރުމަށް ފަހު މެނުވީ ސްކޫލުތައް ބަންދު ނުކުރާނެ ކަމަށް އެޑިއުކޭޝަނުން ބުނެ އެވެ.
ރާއްޖެއިން އޮމިކްރޯން ވޭރިއެންޓު ފެނުމާ ގުޅިގެން އެޗްޕީއޭއިން މިހާރުވަނީ ސަލާމަތީ ފިޔަވަޅުތައް ވަރުގަދަ ކުރުމުގެ މަސައްކަތް ފަށާފަ އެވެ. ވެކްސިން ޖަހާފައިވާ ފަރާތްތަކުން ވެސް މާލެއިން އެހެން ސަރަހައްދަކަށް ދަތުރުކުރާ ނަމަ ޕީސީއާރް ޓެސްޓު ހެދުމަށް މިހާރު ވަނީ މަޖުބޫރުކޮށްފަ އެވެ. އަދި ވެކްސިންގެ ޑޯޒްތައް ފުރިހަމަ ނުވާ މީހުން 10 ދުވަހު ކަރަންޓީނުވާންޖެހޭނެ ކަމަށް އެޗްޕީއޭން ވަނީ ނިންމާފަ އެވެ.
titledesc
