ހޮސްޕިޓަލު ފަދަ އާންމު ހިދުމަތް ފޯރުކޮށްދޭ ތަންތަނުގައި ހަމަނުޖެހުން އުފެދޭ ފަދަ ކަންކަން ނުކުރަން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ގޮވާލައިފި އެވެ.
ސުލްހަވެރިކަމާއެކު އެއްވެ އުޅުމާއި ހިޔާލު ފާޅުކުރުމުގެ މިނިވަންކަމާ ގުޅުވާ އެޗްއާރްސީއެމުން މިރޭ ކުރި ޓްވީޓެއްގައި ބުނީ އެ ހައްގުތަކުގެ ބޭނުން ކުރަން ވާނީ ގާނޫނީ އިމުގެ ތެރެއިން ކަމަށެވެ. އަދި ހައްގުތައް ބޭނުން ކުރުުމުގައި އަނެކާގެ ހައްގަށް އިހުތިރާމުކުރުމަށް ގޮވާލި އެވެ.
އާންމު ހިދުމަތްދޭ ތަންތަނުގައި ހަމަނުޖެހުން ނުހިންގުމަށް އެޗްއާރްސީއެމުން ގޮވާލީ، ހުކުރު ދުވަހުގެ ރޭ އައިޖީއެމް ހޮސްޕިޓަލުގެ ތެރޭގައި އިދިކޮޅު ސަޕޯޓަރުންނާއި ފުލުހުންނާ ދެމެދު ކޮންމެވެސް ވަރެއްގެ ކުރިމަތިލުންތަކެއް ހިނގާފައިވަނިކޮށެވެ.
މި ހާދިސާ ހިނގަން މެދުވެރިވީ އެ ދުވަހު ބޭއްވި "އިންޑިއާ އައުޓް" މުޒާހަރާގެ ތެރެއިން ފުލުހުންގެ ސަބަބުން އަނިޔާވި ކަމަށް ބުނާ މީހަކަށް ފަރުވާދޭން އެ ހޮސްޕިޓަލަށް ގެންދިޔަ ހިސާބުންނެވެ. އެތަން ކަވަރު ކުރަން ދިޔަ ނޫސްވެރިޔަކަށް ފުލުހުން އަނިޔާކުރި މައްސަލައެއް ވެސް ވަނީ ފެންމަތިވެފަ އެވެ.
ސުލްހަވެރިކަމާއެކު އެއްވެ އުޅުމަށް ގޮވާލުމުގެ އިތުރުން، އެޗްއާރްސީއެމްއިން ވަނީ އެއްވެ އުޅޭއިރު ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ އުސޫލުތަކާ އެއްގޮތަށް އަމަލުކުރަން ވެސް ގޮވާލައިފަ އެވެ.
އެ ކޮމިޝަނުން މިހެން ގޮވާލިއިރު، އެޗްޕީއޭއިން ވަނީ މާލެ ސަަރަހައްދުގައި ކޮވިޑަށް ޕޮޒިޓިވްވާ އަދަދުތައް އިތުރުވާތީ ގިނަ މީހުން އެއްވެގެން ބާއްވާ ހަރަކާތްތައް މަނާކޮށްފަ އެވެ. އަދި، 50 މީހުންނަށް ވުރެ ގިނަ މީހުން ހިމެނޭގޮތަށް ހަފުލާތަކާއި އިވެންޓުތައް ބޭއްވުން ވަގުތީ ގޮތުން ހުއްޓާލަން އަންގައިފަ އެވެ.
ގިނަ މީހުން އެއްވެ އުޅުން މަނާކުރި އިރު، އިދިކޮޅު ޕީޕީއެމް ޕީއެންސީ ކޯލިޝަނުން ވަނީ "އިންޑިއާ އައުޓް" ހަރަކާތް ފުޅާކޮށް، މަގުމަތީގައި ސިލްސިލާކޮށް އެއްވުންތަކެއް ބާއްވަން ފަށާފަ އެވެ.
