އަވައްޓެރި ސްރީލަންކާގައި ވެސް ޑެންގީ ހުން ފެތުރުން އިތުރުވެފައި ވާތީ، ބަލި ކޮންޓްރޯލް ކުރުމަށް ތިން ދުވަހުގެ ހާއްސަ ކެމްޕޭނެއް ފަށައިފި އެވެ.
ލަންކާގެ ހެލްތު މިނިސްޓްރީން ބުނީ މިއަދުން ފެށިގެން ތިން ދުވަސް ވަންދެން މި ކެމްޕޭން ކުރިއަށް ދާނީ އެންމެ ބޮޑަށް ބަލި ފާހަގަވާ ހިސާބުތަކުގައި ކަމަށެވެ.
އެ ގައުމުގެ ނޭޝަނަލް ޑެންގީ ކޮންޓްރޯލް ޔުނިޓުން ހާމަކޮށްފައިވާ ގޮތުގައި ކެމްޕޭނުގައި ހިމެނެނީ ބަލި ފެތުރުމުގެ ނުރައްކާ ބޮޑު ކަމަށް ފާހަގަކުރެވިފައިވާ 14 ޑިސްޓްރިކްޓުގަ އެވެ.
އެ ޔުނިޓުގެ އެކްޓިން ޑިރެކްޓަރު ޑރ. ކަޕިލާ ކަންނަންގަރަ ވިދާޅުވީ ސިއްހީ އިދާރާތަކުން ދޭ އިރުޝާދުތަކާ އެއްގޮތަށް އަމަލުނުކުރާ ތަންތަނާމެދު ގާނޫނީ ފިޔަވަޅު އަޅާނެ ކަމަށެވެ.
މި އަހަރުގެ މިހާތަނަށް އެ ގައުމުން 36,168 ޑެންގީ ޖެހިގެން ރިޕޯޓުކޮށްފައިވާ އިރު މި ބަލީގައި މިހާތަނަށް 20 މީހަކު މަރުވެފައިވާ ކަމަށް ތަފާސްހިސާބުތަކުން ދައްކަ އެވެ.
ރާއްޖޭގައި ވެސް މިދިޔަ އަހަރާ އަޅާ ބަލާއިރު، ޑެންގީ ފެތުރުން އިތުރު ކަމަށް ތަފާސްހިސާބުތަކުން ދައްކަ އެވެ. އަދި ބަލި ކޮންޓްރޯލް ކުރަން ފިޔަވަޅު އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ލަފާދީފައިވެ އެވެ.
