ދައުލަތުގެ ބެލުމުގެ ދަށުގައި ތިބި އެހީއަށް ބޭނުންވާ ދޮށީ އުމުރުގެ މީހުންނަށް ހާއްސަ ސަމާލުކަމެއް ދިނުމުގެ މަސައްކަތް ޖެންޑާ މިނިސްޓްރީން ފަށައިފި އެވެ.
އެހީއަށް ބޭނުންވާ ދޮށީ އުމުރުގެ މީހުން ދައުލަތުގެ ފަރާތުން މިހާރު ބަހައްޓަނީ ހާއްސަ އެހީއަށް ބޭނުންވާ މީހުން ގެންގުޅޭ ކ. ގުރައިދޫ މަރުކަޒުގަ އެވެ. އެތަނުގައި މިވަގުތު ވެސް ދޮށީ އުމުރުގެ 25 މީހުން ތިބިއިރު އެމީހުން ބައިތިއްބަނީ ނަފްސާނީ އަދި ސިކުނޑީގެ މައްސަލަތަކާ ގުޅިގެން މަރުކަޒަށް ލާފައި ތިބި މީހުންނާއެކު އެވެ.
އެ މަރުކަޒުގައި ތިބި އުމުރުން ދުވަސްވީ މީހުންނަށް ދޭ ހިދުމަތްތަކުގެ ފެންވަރު ރަނގަޅު ކުރުމަށްޓަކައި ޖެންޑާ މިނިސްޓްރީން ވަނީ އޭޖްޑް ކެއާ މޯލްޑްވިސް ކިޔާ ޖަމިއްޔާއަކާ އެކު އިއްޔެ އެމްއޯޔޫއެއްގައި ސޮއިކޮށްފަ އެވެ.
ދޮށީ އުމުރުގެ މީހުންނަށް އެހީތެރިކަން ފޯރުކޮށްދެމުން އަންނަ އެ ޖަމިއްޔާއާއެކު ދައުލަތުން އެއްބަސްވީ ގުރައިދޫ މަރުކަޒުގައި ތިބި އުމުރުން ދުވަސްވީ މީހުންނަށް އަޅާލުމަށާއި، އެހީތެރިކަން ފޯރުކޮށްދިނުމަށެވެ. މި އެއްބަސްވުމުގައި ދައުލަތުގެ ފަރާތުން ސޮއި ކުރީ ޖެންޑާ މިނިސްޓަރު، އައިޝަތު މުހައްމަދު ދީދީ އެވެ.
ނަމަވެސް ގުރައިދޫ މަރުކަޒަކީ ދޮށީ އުމުރުގެ މީހުން ބައިތިއްބަން އެކަށީގެންވާ ތަނެއް ނޫން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުވެސް ވިދާޅުވެފައި ވެއެވެ. އެހެންވެ "ދޮށީ އުމުރުގެ މީހުންނަށް ހާއްސަ އިޖްތިމާއީ މަރުކަޒުތައް" ގާއިމްކޮށްދިނުމަށް އެމަނިކުފާނު ވައުދުވެވަޑައިގަތެވެ.
އެގޮތުން މަންފާ ސެންޓަރަށް 15 އަހަރު ފުރުން ފާހަގަ ކުރުމަށް އޭޕްރީލް 20، 2019 ގައި ބޭއްވި ޖަލްސާގައި ވާހަކަ ދައްކަވަމުން ރައީސް ވިދާޅުވީ ދޮށީ އުމުރުގެ މީހުންނަށް ބޭނުންވަނީ "ވަސީލަތްތައް ތަނަވަސް" މަރުކަޒެއް ކަމަށެވެ.
"އަޅުގަނޑުމެން ގަބޫލުކުރަން، ގުރައިދޫގައި ހުންނަ މަރުކަޒަކީ، ދޮށީ އުމުރުގެ މީހުން ގެންގުޅެން އެންމެ އެކަށީގެންވާ ތަނެއް ނޫން. އެއަށްވުރެ ފެންވަރު ރަނގަޅު، އަދި ވަސީލަތްތައް ތަނަވަސް ތަނެއް އެކަމަށް ބޭނުންވޭ. އެފަދަ މަރުކަޒަކުން، އެ އުމުރުގެ މީހުންގެ ހެލްތު ސްކްރީން ހަދައި، ސިއްހީ ހާލަތު ވަޒަން ކުރެވޭނެ ގޮތްތައް ހުންނަންޖެހޭނެ،" ރައީސް ވިދާޅުވެފައިވެ އެވެ.
ރައީސް އޮފީހުގެ ވެބްސައިޓުގައިވާ ގޮތުން ރައީސް ސޯލިހުގެ ރިޔާސީ ދައުރު ނިމުމުގެ ކުރިން ދޮށީ އުމުރުގެ މީހުން ދިރިއުޅޭނެ ހާއްސަ ތަންތަން އެޅުމަކީ އެމަނިކުފާނުގެ ރިޔާސީ ވައުދުފުޅެކެވެ.
މިކަމަށް ބޭނުންވާ ފަންޑު އޭޝިއަން ޑިވޮލޮޕްމެންޓް ބޭންކް (އޭޑީބީ) އިން ލޯނުގެ ގޮތުގައި މިހާރު ހަމަޖެހިފައިވާއިރު އެ މަރުކަޒު އަޅާނީ މާލެ އާއި އައްޑޫ ގައެވެ.
ޖެންޑާއިން ބުނާ ގޮތުގައި މި އަހަރުގެ މެދު ތެރޭގައި އެ މަރުކަޒުތަކުގެ ބިންގާ އެޅިގެން ދާނެ އެވެ.
އުމުރުން ދޮށީ މީހުންނަށް އަޅާލުން ނުލިބެގެން 57 މައްސަލައެއް ޖެންޑާ މިނިސްޓްރީއަށް ހުށަހަޅާފައިވާ ކަމަށް އެ އިދާރާއިން ފާހަގަކުރެ އެވެ.
