ޗައިނާއިން ރާއްޖެއަށް ބިލިޔަނެއްހާ ރުފިޔާގެ ހިލޭ އެހީ ދޭން ނިންމައި އެކަމުގެ އެއްބަސްވުމުގައި ދެގައުމުން އިއްޔެ ސޮއިކޮށްފި އެވެ.
ފޮރިން މިނިސްޓްރީގައި އިއްޔެ ބޭއްވި ރަސްމިއްޔާތެއްގައި ރާއްޖެއާއި ޗައިނާއިން ސޮއިކުރި އެއްބަސްވުމުގެ ދަށުން ޗައިނާއިން ރާއްޖެއަށް ހިލޭ އެހީގެ ގޮތުގައި ޖުމްލަ 62.8 މިލިޔަން ޑޮލަރު (968.4 މިލިޔަން ރުފިޔާ) ދޭނެ އެވެ. ފޮރިން މިނިސްޓްރީން ބުނީ ޗައިނާއިން ރާއްޖެއަަށް ދޭ އެ އެހީއަކީ ރާއްޖޭގެ އިޖުތިމާއީ އަދި އުމްރާނީ ތަރައްގީއަށް ހަރަދުކުރަން ދޭ އެހީއެއް ކަމަށެވެ.
ޗައިނާގެ ފޮރިން މިނިސްޓަރު ވާންގް ޔީ ރާއްޖެއަށްކުރައްވާ ރަސްމީ ދަތުރުފުޅުގައި އެހެން ބައެއް އެއްބަސްވުންތަކުގައި ވެސް ސޮއިކުރި އެވެ.
އިއްޔެ ސޮއިކުރި އެއްބަސްވުންތައް
- ރާއްޖެ/ޗައިނާގެ ރައްޔިތުންނަށް އެއް ގައުމުން އަނެއް ގައުމަށް ވިސާއަކާ ނުލައި ދަތުރު ކުރެވޭ ގޮތަށް ހެދުމުގެ އެއްބަސްވުން. ޗައިނާއަށް ދާ ދިވެހިންނަށް އެ އެއްބަސްވުމުގެ ދަށުން 30 ދުވަހުގެ ހިލޭ ވިސާ ލިބޭނެ. މި އެއްބަސްވުމަށް އަމަލު ކުރަން ފަށާނީ ކޮވިޑް-19 ބަލިމަޑުކަމުގެ ސަބަބުން އަޅާފައިވާ ފިޔަވަޅުތަކަށް ލުއި ދިނުމުން.
- އިގްތިސާދީ ގޮތުން އަދި ޓެކްނިކަލީ ދެ ގައުމުގެ ދެމެދުގައި އެއްބާރުލުން ދިނުމަށް ސޮއި ކުރި އެއްބަސްވުން. ޗައިނާއިން ރާއްޖޭގައި ހިންގާ ތަރައްގީގެ މަޝްރޫއުތައް އެ އެއްބަސްވުން ސަޕޯޓަކަށްވެގެންދާނެ ކަމަށް ފޮރިން މިނިސްޓަރު ޝާހިދު ވިދާޅުވި އެވެ.
- މާލެ/ހުޅުމާލެ ބްރިޖުގެ މެއިންޓެނަންސް ކުރުމުގެ ފީސިބިލިޓީ ސްޓަޑީއެއް ހެދުމުގެ ލެޓާ އޮފް އެކްސްޗޭންޖް
- ފެން އުފައްދާ ޕްލާންޓުތަކެއް ބެހެއްޓުމަށް މީގެ ކުރިން ދެ ގައުމުގެ މެދުގައި ވެފައިވާ އެއްބަސްވުމުގެ މަސައްކަތް ކުރިއަށްގެންދާނެ ގޮތުގެ ސަޕްލިމަންޓްރީ އެއްބަސްވުން.
- ހޮސްޕިޓަލް އެސިސްޓެންސް ޗައިނާގެ ފަރާތުން ރާއްޖެއަށް ފޯރުކޮށްދިނުމުގެ ޕްރޮގްރާމެއް ފެށުމުގެ އެއްބަސްވުން.
ޗައިނާގެ ފޮރިން މިނިސްޓަރު އަދި ސްޓޭޓް ކައުންސިލާ ވާން ޔީ އާ އެކު ބޭއްވެވި ރަސްމީ މަޝްވަރާތަކަށް ފަހު ދެއްވި ގުޅިފައިވާ ބަޔާނެއްގައި ފޮރިން މިނިސްޓަރު އަބްދުﷲ ޝާހިދު އިިއްޔެ ވިދާޅުވީ މިދިޔަ ފަންސާހަަކަށް އަހަރުގެ ތެރޭގައި ވެސް ޗައިނާއަކީ އިޖުތިމާއީ އަދި އިގުތިސާދީ ގޮތުުން ރާއްޖޭގެ މުހިއްމު ބައިވެރިއެއް ކަމަށެވެ. ބޯހިޔާވަހިކަމާއި އިންފްރާސްޓްރަކްޗާ ތަރައްގީކުރުމާއި ޓޫރިޒަމާއި މީހުން ބިނާކުުރުމުގެ ދާއިރާއިން އެގައުމުން ރާއްޖެއަށް ގިނަ އެހީތަކެއް ވެފައިވާ ކަމަށް ވެސް އޭނާ ވިދާޅުވި އެވެ.
"ރައީސް އިބްރާހީމް މުހައްމަދު ސޯލިހާއި ރައީސް ޝީޖިންޕިންގެ ލީޑަޝިޕްގެ ދަށުން ރާއްޖެއާއި ޗައިނާގެ ގުޅުން އާ އުސްމިންތަކަށް ދާނެ ކަމާ މެދު އަަޅުގަނޑު ޝައްކެއް ނުކުރަން،" ޝާހިދު ވިދާޅުވި އެވެ.
