ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގައި ވާދަކުރާ އެމްޑީޕީގެ ކެންޑިޑޭޓް މުހައްމަދު ރާޝިދުގެ ކެމްޕެއިން ލޯންޗްކުރުމުގެ ޖަލްސާގައި ބައިވެރިވެވަޑައިގަތުމަށް ރައީސް އިބްރާހިމް މުހައްމަދު ސޯލިހު ށ. ކޮމަންޑުއަށް މިއަދު ވަޑައިގެންފި އެވެ.
ކޮމަންޑުއަށް ރައީސް މިއަދު ވަޑައިގެންނެވުމުން އެމަނިކުފާނަށް މަރުހަބާ ދަންނަވަން އެމްޑީއަށް ތާއީދުކުރާ އެރަށުގެ ގިނަ ބަޔަކު ބަނދަރަށް ނުކުތެވެ. އެކަމަކު ކޮވިޑް-19 ގެ ކޭސްތައް އިތުރުވެފައިވާ ވަގުތަކަަށް ވާތީ ސަޕޯޓަރުންނާ އެމަނިކުފާނު އަތްޕުޅު ޖޯޑްކުރައްވައި ސަލާމެއް ނުކުރައްވަ އެވެ. އޭގެ ބަދަލުގައި ކުރެއްވީ އިޝާރާތެކެވެ.
ކޮމަންޑޫ ދާއިރާގެ ބައި އިލެކްޝަންގެ ކެމްޕޭނަށް ރައީސް އިބްރާހީމް މުހައްމަދު ސޯލިހު މިހާރު ވަޑައިގެން ހުންނެވީ އެރަށުގައި
ރައީސް އަރިހުގައި ކޮމަންޑުއަށް ވަޑައިގެންނެވި ރައީސް އޮފީހުގެ މިނިސްޓަަރު އަދި އެމްޑީޕީގެ ނައިބު ރައީސް މުހައްމަދު ޝިފާޒް ރާއްޖެ ޓީވީގެ ލައިވްކަވަރޭޖްގައި ވިދާޅުވީ ކޮމަންޑޫ ދާއިރާގެ ބައި އިލެކްޝަންގައި އެމްޑީޕީގެ ކެންޑިޑޭޓް ކާމިޔާބުކުރައްވާނެކަން، މިރޭ އެރަށުގައި ބާއްވާ ޖަލްސާއިން ފެންނާނެ ކަމަށެވެ. ކޮމަންޑޫ ދާއިރާއަކީ އެމްޑީޕީއަށް އަބަދުވެސް ބޮޑު ތާއީދެއް އޮންނަ ދާއިރާއެއް ކަަމަށް ވެސް އޭނާ ވިދާޅުވި އެވެ.
"މިރޭ އިރާދަކުރެއްވިއްޔާ ޖަލްސާއިން ފެނިގެންދާނެ، މިދާއިރާގެ ރައްޔިތުންގެ މަޖިލީހުގެ މި އިންތިހާބަށް ވާދަކުރައްވާ އަޅުގަނޑުމެންގެ ވާދަވެރިންގެ ގޮތުގައި ތިއްބެވި ބޭފުޅުންނަށް މިއީ، އެ ބޭބޭފުޅުން އަޅުގަނޑުމެންނަށް މިކަން މިހާރު ހަވާލުކޮށް މިދާއިރާގެ ރައްޔިތުން ނިންމާފައި އޮތް ކަމެއްކަން،" ޝިފާޒް ވިދާޅުވި އެވެ.
އަންނަ ފެބްރުއަރީ މަހު ބޭއްވުމަށް ހަމަޖެހިފައިވާ އެ އިންތިހާބުގައި ރާޝިދަށް ލިބުނީ ކެންޑިޑޭޓް ނަންބަރު އެކެކެވެ. ދެވަނަ ނަމްބަރު ލިބުނީ އިދިކޮޅު ޕީޕީއެމްގެ ކެންޑިޑޭޓު، މޫސާ ފަތުހީއަށެވެ. ތިންވަނަ ކެންޑިޑޭޓަކީ މިދިޔަ އަހަރު ތެރޭގައި އުފެއްދި އެމްއެންޕީގެ އަބްދުލް ހަންނާނު އިދުރީސް އެވެ.
އެމްޑީޕީގެ ޓިކެޓުގައި ވާދަކުރައްވާ ރާޝިދުއަކީ 10 އަހަރު ވަންދެން ފޯކައިދޫ ކައުންސިލްގެ މެމްބަރުކަމާއި ރައީސް ކަން ކުރެއްވި ބޭފުޅެކެވެ. އޭނާއަކީ މިހާރު އެ އިދާރާގެ ސެކެޓްރީ ޖެނެރަލް އެވެ.
