ޗައިނާގެ ފޮރިން މިނިސްޓަރު އަދި ސްޓޭޓް ކައުންސިލަރު ވާން ޔީ ރަސްމީ ދަތުރުފުޅެއްގައި މިއަދު ރާއްޖެއަށް ވަޑައިގެންފި އެވެ.
ވާން ޔީ މީގެ ކުޑަ އިރުކޮޅެއް ކުރިން ރާއްޖެއަށް ވަޑައިގެންނެވުމުން ވެލާނާ އިންޓަނޭޝަނަލް އެއާޕޯޓުން އޭނާއަށް މަރުހަބާ ވިދާޅުވީ ފޮރިން މިނިސްޓަރު އަބްދުﷲ ޝާހިދެވެ.
އދ.ގެ އާއްމު މަޖިލީހުގެ ރިޔާސަތާ ހަވާލުވެވަޑައިގެން އެމެރިކާގައި ހުންނެވުމަށް ފަހު ޝާހިދުވެސް އެނބުރި ރާއްޖެއަށް ވަޑައިގެންނެވީ މިއަދު އެވެ.
ޗައިނާގެ ފޮރިން މިނިސްޓަރު ވާންޔީ ރާއްޖެއަށް ވަޑައިގެންވުމުން ފޮރިން މިނިސްޓަރު އަބްދުﷲ ޝާހިދު އޭނާއަށް މަރުހަބާ ވިދާޅުވަނީ.
ފޮރިން މިނިސްޓްރީން ބުނި ގޮތުގައި ރާއްޖޭގެ ފޮރިން މިނިސްޓަރު އަބްދުﷲ ޝާހިދު ވާން ޔީ އަށް ރަސްމީކޮށް މަރުހަބާ ވިދާޅުވުން އޮންނާނީ ފޮރިން މިނިސްޓްރީގައި މާދަމާ އެވެ. އޭގެ ފަހުން ދެގައުމުގެ ރަސްމީ ވާހަކަތައް ވެސް އޮންނާނެ އެވެ.
ވާން ޔީގެ ދަތުރުފުޅުގައި އޭނާއާއި ރާއްޖޭގެ ފޮރިން މިނިސްޓަރު ޝާހިދު ގުޅިފައިވާ ބަޔާނެއް ވެސް މާދަމާ ދެއްވާނެ ކަމަށް ވެސް ފޮރިން މިނިސްޓްރީން ބުންޏެވެ. ދެގައުމުން ސޮއިކުރަން ހަމަޖެހިފައިވާ އެމްއޯޔޫތަކުގައި ސޮއިކުރުން އޮންނާނީ އޭގެ ފަހުންނެވެ.
ކޮވިޑް-19ގެ ބަލިމަޑުކަމުގެ ކުރިން ރާއްޖެއަށް އެއް ގައުމަކުން އެންމެ ގިނަ ޓޫރިސްޓުން އަންނަ ގައުމަކީ ޗައިނާ އެވެ. އަދި އެގައުމަކީ ރާއްޖޭގެ ތަރައްގީގެ ގިނަ މަޝްރޫއުތަކަކަށް ހިލޭ އެހީއާއި ލޯނު ދެމުން އަންނަ ގައުމެކެވެ.
