ކޮވިޑް-19 ފެތުރޭ މިންވަރު އިތުރުވެގެން މަގުމަތީ ބާޒާތު ހުއްޓުވައި، އެފަދަ އެހެން ހަރަކާތްތައް ވެސް ނުބާއްވަން އެންގިތާ 24 ގަޑި އިރު ވެސް ނުވަނީ އެ ނިންމުން ބަދަލުކުރުމުން ހެލްތު ޕްރޮޓެކްޝަން އެޖެންސީ (އެޗްޕީއޭ) އަށް އާންމުންގެ ފާޑުކިޔުން އަމާޒުވެއްޖެ އެވެ.
ރަސްފަންނު ސަރަހައްދުގައި މިދިޔަ ޑިސެމްބަރު 26، އިން ފެށިގެން ކުރިއަށްގެންދިޔަ މަގުމަތީ ބާޒާރު ބަލި ފެތުރުން ކޮންޓްރޯލް ކުރުމަށް އަޅާ ފިޔަވަޅެއްގެ ގޮތުން، "މިއަދުން ފެށިގެން ނޯންނާނެ" ކަމަށް މާލޭ ސިޓީ ކައުންސިލުން ބުދަ ދުވަހުގެ ރޭގެ 11:37 ގައި ކުރި އިއުލާނެއްގައި ބުނެފައިވެ އެވެ.
އެމަކު ބުދަ ދުވަހުގެ ރޭ މާލެ ސިޓީ ކައުންސިލުން ބުނީ މަގުމަތީ ބާޒާރުތައް ބޭއްވުމުގެ ހުއްދަ އެޗްޕީއޭއިން އެ ކައުންސިލަށް އަލުން ދީފައިވާ ކަމަށެވެ. މަގުމަތީ ބާޒާރު އަލުން ފަށަން ނިންމި ސަބަބެއް ކަމަށް ކައުންސިލުން ބުނީ ގިނަ ބަޔަކު އެކަމަށް އެދުމެވެ.
މަގުމަތީ ބާޒާރުތައް ފަދަ ހަރަކާތްތައް ކުރިއަށް ނުގެންދިއުމަށް އެޗްޕީއޭއިން އޮތީ ކުރިން ވެސް ލަފާ ދީފަ އެވެ. ބާޒާރު ބޭއްވުން މަނާ ކުރީ މާސްކު އެޅުމާއި ގައިދުރުކުރުން ފަދަ އަމަލު ކުރަންޖެހޭ ލާޒިމު އުސޫލުތަކަށް ނުބަލައި އެ ހަރަކާތް ކުރިއަށްގެންދާތީ އެވެ.
އަލުން ފަށާއިރު ބާޒާރުގައި ވިޔަފާރި ކުރެވޭނީ އާންމު ފިހާރަތަކުން ވެސް ވިޔަފާރި ކުރެވޭ އުސޫލުން ކަމަށް މާލެ ސިޓީ ކައުންސިލުން ބުނެ އެވެ. ނަމަވެސް މަގުމަތީ ބާޒާރެއްގައި އެފަދަ އުސޫލުތަކެއް ހިފަހައްޓާނީ ކިހިނެއްތޯ ސިޓީ ކައުންސިލުން ބުނެފައެއް ނުވެ އެވެ. އަދި އެތަނަށްދާ އާންމުން އަމަލު ކުރަންޖެހޭ އުސޫލެއް އާންމުކޮށްފައެއް ވެސް ނުވެ އެވެ.
ސޯޝަލް މީޑިއާގައި އެކަމަށް ފާޑުކީ ބައެއް މީހުން ބުނީ، އެ ނިންމުމުގެ ސަބަބުން އެޗްޕީއޭ "ޖޯކަކަށް ވެއްޖެ" ކަަމަށެވެ. "އުގުޅޭ ބާޒާރު ގައިދުރުކުރާނީ ކިހިނެތްތޯ" ވެސް ބައެއް މީހުން ސުވާލުކުރި އެވެ.
ނައިޓް މާކެޓަކީ ވަރަށް ބޮޑަށް ތޮއްޖެހި، އެކަކު އަނެކެއްގެ ގައިގާ ޖެހޭ ގޮތަށް މީހުން ހަރަކާތްތެރިވާ ބާޒާރަކަށް ވާތީ ޒަމާނުއް ސުރެ، އެ ހަރަކާތް މަޝްހޫރުވެފައި އޮންނަނީ އުނގުޅޭ ބާޒާރުގެ ނަމުންނެވެ.
"އުނގުޅޭ ބާޒާރު ކިޔަނީ ކަމެއް ވީމާ" ނައިޓްމާކެޓް ބާއްވަން އަލުން ހުއްދަ ދޭން ނިންމި ނިންމުމަށް ފާޑުކިޔަމުން އެހެން ޒުވާނަކު ބުންޏެވެ.
ނައިޓް މާކެޓް ބާއްވަން އަނެއްކާވެސް ހުއްދަ ދީފައިވާއިރު، މި މަސް ފެށުނު ފަހުން މާލެ ސަރަހައްދުގައި ކޮވިޑް ފެތުރޭ މިންވަރު އަންނަނީ އިތުރު ވަމުންނެވެ. މި ވަގުތު ކޭސްތައް އިތުރުވަމުން އަންނަ މިންވަރަށް ބަލާއިރު، މި މަހުގެ ތެރޭގައި 1300 އަށް ވުރެ ގިނަ މީހުން ވަނީ ކޮވިޑަށް ޕޮޒިޓިވް ވެފަ އެވެ.
އިއްޔެ ވެސް 300 އިން މައްޗަށް ކޮވިޑް ކޭސްތައް ރިޕޯޓް ކޮށްފައި ވާއިރު، މާލެ ސަރަހައްދުން 136 ކޭސް ރިޕޯޓް ކުރި އެވެ.
ކޮވިޑް ކޭސްތައް އިތުރުވަމުން ދާތީ މާސްކް އެޅުން މަޖުބޫރުކޮށް، މާސްކް ނާޅާ އާންމުން ނުކުމެ އުޅޭ ތަންތަނަށް ނުކުންނަ ފަރާތްތަކާ މެދު ފިޔަވަޅު އަޅާނެ ކަމަށް ފުލުހުން ވަނީ ބުނެފަ އެވެ.
