ކޮވިޑްގެ ކޭސްތައް އިތުރުވަމުން ދާތީ، ހުރިހާ ރަށެއްގައި މާސްކު އަޅަން މަޖުބޫރުކޮށް، މާސްކު ނާޅާނަމަ ފިޔަވަޅު އަޅަން ރައީސް އޮފީހުން އަންގައިފި އެވެ.
ނ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި، މިދިޔަ އަންގާރަ ދުވަހު ރައީސް އިބްރާހީމް މުހައްމަދު ސޯލިހު ވަނީ، ކުރިއަށް އޮތް ތިން ހަފްތާގެ ތެރޭ ރާއްޖޭގައި ހަލުވި ކަމާއެކު ކޮވިޑު ފެތުރޭނެ ކަމުގެ އިންޒާރު ދެއްވާފަ އެވެ.
އޮމިކްރޮންގެ ރިސްކް އެސެސްމެންޓަށް ބެލުމަށްފަހު، އަދި ކަމާބެހޭ ފަރާތްތަކާއެކު މަޝްވަރާކުރަން ބޭއްވި ބައްދަލުވުމަށް ފަހު، ހާއްސަ ފިޔަވަޅުތަކެއް އަޅަން އަންގައި ފުލުހުންނަށް ރައީސް އޮފީހުން ވަނީ ސިޓީއެއް ފޮނުވާފަ އެވެ.
އެޅުމަށް އަންގާފައިވާ ފިޔަވަޅުތަކުގެ ތެރޭގައި މާލޭގައި ދުވާލަކު 3،000 މީހުންނަށް ބޫސްޓަ ޑޯޒް ދިނުމަށްޓަކައި ފުލުހުންގެ އާއިލާތަކަށް ބޫސްޓަ ޑޯޒް ޖެހޭގޮތަށް ހަމަޖެއްސުމާއި ފުލުހުންގެ ލެބޯޓަރީގައި ކޮވިޑަށް ޓެސްޓު ހަދަން ފެށުން ހިމެނެ އެވެ.
މީގެ އިތުރުން ހުރިހާ ރަށްރަށެއްގައި މާސްކު އެޅުން މަޖުބޫރުކޮށް މާސްކް އަޅައިތޯ ބެލުމަށްވެސް ވަނީ އަންގާފަ އެވެ.
ރާއްޖޭގައި ކޮވިޑްގެ ހާލަތު މިހާރު ގޯސްވަމުން ދާއިރު ޕޮޒިޓިވްވާ މީހުންގެ ނަންބަރު 200 އިން މަތީގައި ހުންނަތާ ހަތަރު ދުވަސް ވަނީ ވެފަ އެވެ.
އެއާއެކު މަގުމަތީ ބާޒާރު ފަދަ ގިނަ މީހުން އެއްވެގެން ބާއްވާ ހަރަކާތްތައް ވަގުތީ ގޮތުން ވަނީ ހުއްޓާލައިފަ އެވެ.
މިވަގުތު ރާއްޖޭގައި ކޮވިޑުން ރަނގަޅު ނުވެ ތިބީ 2،734 މީހުންނެވެ. މިހާތަނަށް 93،736 މީހުން ވަނީ ކޮވިޑުން ރަނގަޅުވެފަ އެވެ. މިވަގުތު ވެސް ހޮސްޕިޓަލްގައި އެޑްމިޓްކޮށް 13 މީހަކަށް ދަނީ ފަރުވާ ދެމުންނެވެ.
