ބެއިޖިން، ޗައިނާ (ޖެނުއަރީ 6) - ޗައިނާގައި ލޮކްޑައުންކޮށްފައިވާ ޒިއާން ސިޓީގެ ހޮސްޕިޓަލަކަށް ނުވެއްދި އަންހެނަކު މަގުމަތީގައި ހުރެ ވިހެއި ދަރިފުޅު މަރުވި މައްސަލައިގައި އޮފިޝަލުންނާ މެދު ފިޔަވަޅު އަޅައިފި އެވެ.
ހޮސްޕިޓަލުން އަންހެން މީހާ ވަންނަން ހުއްދަ ނުދިނީ ކޮވިޑް ޓެސްޓު ނުހަދާ ހުރި ކަމަށް ބުނެ އެވެ. ބަނޑަށް އަށް މަހުގައި ހޮސްޕިޓަލުގެ ބޭރުގައި ހުރެ އޭނާ ވިހެއި ދަރިފުޅު މަރުވި މަންޒަރު ފެންނަ ވީޑިއޯ ވަނީ ވައިރަލްވެފަ އެވެ.
ގާތްގަނޑަކަށް 13 މިލިއަން މީހުން ދިރިއުޅޭ ޒިއާން ސިޓީ ލޮކްޑައުންކޮށްފައި އޮންނަތާ މިހާރު ދެ ހަފުތާ ވެއްޖެ އެވެ. ޗައިނާ އިން ގެންގުޅެނީ "ޒީރޯ ކޮވިޑް"ގެ ހަރުކަށި ސިޔާސަތެކެވެ.
މާބަނޑު އަންހެން މީހާ އަށް ދިމާވި ގޮތުގެ ވާހަކަ އާއި ފޮޓޯ އަދި ވީޑިއޯ ސޯޝަލް މީޑިއާގައި އާއްމުކުރީ އޭނާ އަށް ބޮޑުދައިތަ ކިޔާ އަންހެނެކެވެ. ފޮޓޯ އާއި ވީޑިއޯ އިން ފެންނަނީ ހޮސްޕިޓަލުގެ ބޭރުގައި އަންހެން މީހާ ޕްލާސްޓިކް ގޮނޑިއެއްގައި އިންނަ އިރު، ބިންމަތީގައި ވަރަށް ބައިވަރު ލޭ ހުރި މަންޒަރެވެ.
ޖެނުއަރީ އެއް ވަނަ ދުވަހު ޖެހި ޕޯސްޓު، ފަހުން ރިމޫވް ކުރި ނަމަވެސް، އެތައް މިލިއަން ބަޔަކަށް އެ ޕޯސްޓު އޭރު އޮތީ ފެނިފަ އެވެ. އެއާ އެކު ސޯޝަލް މީޑިއާގައި ގިނަ ބަޔަކު ސަރުކާރާ މެދު ހިތްހަމަނުޖެހުން ފާޅުކުރަން ފެށި އެވެ.
ޒިއާން ސިޓީގެ ސަރުކާރުން ބުރާސްފަތި ދުވަހު ނެރުނު ބަޔާނެއްގައި ބުނީ އެ ހާދިސީ ހިނގީ ޒިއާން ގައޯޒިން ހޮސްޕިޓަލްގައި ކަމަށާއި އެ މައްސަލަ ތަހުގީގު ކުރަމުންދާ ކަމަށެވެ.
އެ ހޮސްޕިޓަލުގެ ޖެނެރަލް މެނޭޖަރު ސަސްޕެންޑުކޮށްފައި ވާއިރު، އައުޓްޕޭޝަންޓް ޑިޕާޓްމަންޓުގައި ތިބި ބައެއް އޮފިޝަލުން ވެސް ދަނީ މަގާމުތަކުން ވަކިކުރަމުންނެވެ.
ޒިއާން ސިޓީގެ ހެލްތު ކޮމިޝަނުން ހޮސްޕިޓަލަށް އަންގާފައި ވަނީ އާއްމުންގެ ކިބައިން މައާފަށް އެދުމަށެވެ. އޭގެ އިތުރުން ޒިއާންގެ އެމެޖެންސީ ރެސްޕޯންސް ޓީމުގެ ވެރިޔާ އާއި ހެލްތު ކޮމިޝަނުގެ ޑިރެކްޓަރަށް ވެސް އެ ސިޓީގެ ސަރުކާރުން ވަނީ އިންޒާރު ދީފަ އެވެ.
ޖެނުއަރީ އެއް ވަނަ ދުވަހު އާއްމުވި ޕޯސްޓުގައިވާ ގޮތުން މާބަނޑު އަންހެން މީހާ ހޮސްޕިޓަލަށް ވަންނަން ހުއްދަ ނުދިނީ 48 ގަޑިއިރު ހަމަނުވާ ކޮވިޑަށް ނެގެޓިވް ނަތީޖާއެއް އޭނާގެ އަތުގައި ނެތުމުންނެވެ. އެ އަންހެން މީހާ ހޮސްޕިޓަލްގެ ބޭރުގައި ދެ ގަޑިއިރު ހޭދަކުރި އެވެ.
ޕޯސްޓުގައިވާ ގޮތުން އަންހެން މީހާގެ އަތުގައި ނެގެޓިވް ނަތީޖާއެއް އޮތް ނަމަވެސް، އޭރު އޭގެ މުއްދަތު ހަމަވިތާ ދެ ތިން ގަޑިއިރު ވެދާނެ އެވެ.
އެހެން ގައުމުތަކާ އަޅާ ބަލާއިރު، ޗައިނާގެ ކޮވިޑް ކޭސްތައް އުޅެނީ ވަރަށް މަދުންނެވެ. ނަމަވެސް މިހާރު ފެންނަ ކޭސްތަކުގެ އަދަދު ވަނީ މާޗް 2020 ވަނަ އަހަރަށް ފަހު މަތިނުވާ ވަރަށް މަތިވެފަ އެވެ.
ބުރާސްފަތި ދުވަހު މުޅި ޗައިނާ އިން 189 ކޭސް ފެނުނު އިރު، އޭގެ ތެރެއިން 63 ކޭސް ރިޕޯޓު ކުރީ ޒިއާން ސިޓީ އިންނެވެ.
