އިންޑިއާގައި ބްރޯޑްބޭންޑް ހިދުމަތް ފޯރުކޮށްދޭން ލައިސެންސް ހޯދާފައި ނުވާ މައްސަލައިގައި އެލޮން މަސްކްގެ ސްޓާލިންކް އިން ޕްރީބުކިން ހެދި ކަސްޓަމަރުންނަށް ރީފަންޑުކޮށްދޭން ފަށައިފި އެވެ.
ޖައްވަށް ފޮނުވާފައިވާ ސެޓެލައިޓުތަކުގެ އެހީގައި ހިދުމަތް ފޯރުކޮށްދޭން ސްޓާލިންކުން މަސައްކަތް ކުރަމުން ދާއިރު، އިންޑިއާގެ 7000 އެއްހާ މީހުން ޕްރީބުކިން ހަދާފައި ވެ އެވެ.
އެ ފަރާތްތަކުގެ އަތުން ޑިޕޮސިޓް ފައިސާ ނެގި ނަމަވެސް، އިންޑިއާގައި ހިދުމަތް ދިނުމުގެ ހުއްދަ ނުވަތަ ލައިސެންސެއް ސްޓާލިންކަށް ލިބިފައެއް ނުވެ އެވެ.
އެ މައްސަލަ ފާހަގަކޮށް، ޓެލެކޮމިއުނިކޭޝަންސް ޑިޕާޓްމަންޓުން ސްޓާލިންކަށް އަންގާފައި ވަނީ ރީފަންޑު ދިނުމަށާއި ހިދުމަތް ފޯރުކޮށްދޭން ބޭނުން ނަމަ ލައިސެންސް ހޯދުމަށެވެ.
ޕްރީބުކިން ހެދި ފަރާތްތަކަށް ފޮނުވި ލިޔުމެއްގައި ސްޓާލިންކުން ބުނީ ކަސްޓަމަރުންގެ އަތުން ޕްރީބުކިންގެ ގޮތުގައި ނެގި 99 ޑޮލަރު ރީފަންޑުކުރަމުން ދާ ކަމަށެވެ.
ސްޓާލިންކުން ބުނީ ވީ އެންމެ އަވަހަކަށް އިންޑިއާގައި ހިދުމަތް ދޭން ބޭނުންވި ނަމަވެސް ލައިސެންސް ލިބެން ނަގާނެ މުއްދަތެއް ނޭނގޭ ކަމަށެވެ.
ޓެލެކޮމިއުނިކޭޝަންސް ޑިޕާޓްމަންޓުން އިކޮނޮމިކް ޓައިމްސް ނޫހަށް ބުނީ އެ ތަނުގެ އެންގުމަށް ރީފަންޑު ދޭން ފަށާފައި ވާއިރު، ލައިސެންސަށް އެދުމުގެ މަރުހަލާ ވެސް ސްޓާލިންކުން ފަށާފައިވާ ކަމަށެވެ.
ޕްރީބުކިން ހެދި ކަސްޓަމަރުންނަށް ރީފަންޑުކޮށްދޭން ފަށާފައި ވާއިރު، ސްޓާލިންކް އޮޕަރޭޝަންތަކުގައި އިންޑިއާގައި އިސްކޮށް އުޅޭ ސަންޖޭ ބަރްގަވާ ވަނީ ކުއްލި ގޮތަކަށް އިސްތިއުފާ ދީފަ އެވެ.
އިސްތިއުފާ ދިނީ އަމިއްލަ ސަބަބުތަކާ ހެދި ކަމަށް ބުނި ބަރްގަވާ މީގެ ކުރިން އިއުލާނު ކުރީ ޖެނުއަރީ 31 ގެ ކުރިން ލައިސެންސަށް އެދި ހުށަހަޅާނެ ކަމަށެވެ.
ސްޓާލިންކްގެ އިންޑިއާ އޮޕަރޭޝަންތަކުގެ ވެރިޔާގެ މަގާމަށް އޭނާ އައީ އޮކްޓޯބަރު އެއް ވަނަ ދުވަހު އެވެ. އޭގެ ކުރިން އޭނާ ވަނީ އިލެކްޓްރޯނިކް ޕޭމަންޓް ކުންފުނި ޕޭޕަލް އުފެއްދި ޓީމުގައި އުޅެފަ އެވެ.
