ލަންޑަން (ޖެނުއަރީ 6) - އިނގިރޭސި ލީގު ކަޕްގެ ސެމީ ފައިނަލް ފުރަތަމަ ލެގުގައި ރޭ ޗެލްސީން 2-0 އިން ޓޮޓެންހަމް ހޮޓްސްޕާސް ބަލިކޮށްފި އެވެ.
ލީގު ކަޕް ފައިނަލުން ޖާގަ ހޯދަން އަންނަ ހަފްތާގައި ޓޮޓެންހަމް ދަނޑުގައި ކުޅޭ ދެ ވަނަ ލެގުގެ މެޗުން އެއްވަރުކޮށްލައިގެން ވެސް ޗެލްސީ އަށް ފަރުޖައްސައިލެވޭނެ އެވެ. އެހެންކަމުން މި ވަގުތަށް ބަލާއިރު، މި މެޗުގެ ކޮންޓްރޯލްް އޮތީ ޗެލްސީ އަތުގަ އެވެ.
ޗެލްސީން ރޭގެ މެޗަށް ނުކުތީ ރޮމެލޫ ލުކާކޫ ފުރަތަމަ އެގާރައިގައި ހިމަނައިގެންނެވެ. ޗެލްސީގައި ހުރީ ހިތްހަަމަޖެހޭ ހާލަތެއްގަައި ނޫން ކަމަށް ބުނެ، ދާދި ފަހުން އިންޓަވިއު ދިން މައްސަލައިގައި ލުކާކޫ ވަނީ އެންމެ ފަހުން ޗެލްސީން ލިވަޕޫލާ ދެކޮޅަށް އިނގިރޭސި ޕްރިމިއާ ލީގުގައި ކުޅުނު މެޗުގެ ސްކޮޑުން ބާކީކޮށްފަ އެވެ. އެކަަމަކު، ލުކާކޫ މާފަށް އެދުމުން އޭނާ އަށް އަލުން ޗެލްސީ ޓީމުން ފުރުސަތު ދިނީ އެވެ.
މިދިޔަ ސީޒަނުގައި ލުކާކޫ އަށް އިންޓަ މިލާނުގައި ކޯޗުކޮށްދިން އެންޓޯނިއޯ ކޮންޓޭ މި ވަގުތު ޓޮޓެންހަމް ކޯޗުކަމާ ހަވާލުވެހުރިއިރު، ރޭގެ މެޗު އޭނާ އަށް ވެސް ހާއްސަ އެވެ. ރޭގެ މެޗަކީ 2018 ވަނަ އަހަރު ޗެލްސީ ދޫކޮށްލި ފަހުން ކޮންޓޭ، ޗެލްސީ ދަނޑަށް ޓީމެއް ގޮވައިގެން އެނބުރި އައި ފުރަތަމަ ފަހަރެވެ.
ރޭގެ މެޗު ފަށައިގެން ފަސް ވަނަ މިނިޓްގައި ޗެލްސީން ވަނީ ލީޑުނަގައިފަ އެވެ. މާކޯސް އަލޮންސޯ ދިން ބޯޅައެއް ކައި ހަވާޓްޒް ގޯލުގެ ތެެރެއަށް ފޮނުވާލިއިރު، އެ ބޯޅަ ހުއްޓުވަން ޓޮޓެންހަމްގެ ޑިފެންޑަރު ޑަވިންސަން ސަންޗޭޒަށް މާ ބޮޑު ކަމެއް ނުކުރެވުނެވެ.
ޗެލްސީން ޖެހި ދެ ވަނަ ގޯލަކީ ޓޮޓެންހަމްގެ ބެން ޑޭވިސް އަތުން ބައިކޮޅަށް ވަން ގޯލެކެވެ. ހިލޭ ޖެހުމަކުން އޭރިއާތެރެއަށް ހުރަސްވި ބޯޅައެއް ސަލާމަތްކުރަން ޓޮޓެންހަމްގެ ޑިފެންޑަރު ޖަޕެޓް ޓަންގާންގާ ބޮލުން ޖައްސާލި ބޯޅަ ޑޭވިސް ގައިގައި ޖެހިފައި ވަނީ ބައިކޮޅަށެވެ.
ޓޮޓެންހަމަށް މާ ނުރައްކާތެރި އެޓޭކްތަކެއް މުޅި މެޗަށް ބެލިޔަސް ކުރެވިފައިނުވެ އެވެ. ހެރީ ކޭން ޖެހި ހިލޭ ޖެހުމެއް ޗެލްސީގެ ކީޕަރު ކެޕާ އަރިއްޒަބަލާގާ ވަނީ މަަތަކޮށްފަ އެވެ. ދެ ވަަނަ ހާފުގައި ޗެލްސީން އިތުރު ގޯލު ޖަހަން ކުރި މަސައްކަތް ހުއްޓުވީ ޓޮޓެންހަމްގެ ކީޕަރު ހޫގޯ ލޮރީސް އެވެ.
މެޗަށް ފަހު ޓޮޓެންހަމްގެ ކޯޗު ކޮންޓޭ ބުނީ މި ވަގުތަށް ބަލާއިރު، ޗެލްސީ އާއި ޓޮޓެންހަމްގެ މެދުގައި ބޮޑު ފަރަގެއް އެބައޮތް ކަމަށެވެ. އެ ގޮތުން އެންމެ ބޮޑު ތަފާތަކީ ޗެލްސީ އަކީ މިދިޔަ ސީޒަނުގައި ޔޫރަޕްގެ ޗެމްޕިއަން ކަމަށާއި ޓޮޓެންހަމްގެ ކާމިޔާބީގެ ވާހަަކަ ދެއްކެން އޮތީ މިހާރު އޮތް ޓީމު އަމިއްލަ އަށް ކަމެއް ހާސިލްކޮށްގެން ކަމަށް ކޮންޓޭ ބުންޏެވެ.
