ގަލޮޅު ދަނޑުގެ މަރާމާތުގެ މަސައްކަތް މި އަހަރު ކުރިއަށް ގެންދާއިރު، ފުޓްބޯޅައިގެ ކަންކަމަށް ބޭނުންކުރަން ހަމަޖެހިފައިވަނީ ހުޅުމާލެ ސިންތެޓިކް ޓްރެކް ސްޓޭޑިއަމް ކަމަށް ޔޫތު މިނިސްޓަރު އަހުމަދު މަހުލޫފް ވިދާޅުވެއްޖެ އެވެ.
ގަލޮޅު ދަނޑު ތަރައްގީ ކުރުމަށްޓަކައި އިންޑިއާގެ ލޯން އެހީގެ ތެރެއިން 55 މިލިއަން ރުފިޔާގެ ބަޖެޓެއް ވަނީ ހަމަޖައްސައިފަ އެވެ.
ރާއްޖޭގެ ކުޅިވަރު ތަރައްގީ ކުރުމަށް އިންޑިއާ އިން ދޭ 40 މިލިއަން ޑޮލަރުގެ ލޯން އެހީގެ ތެެރެއިން ގަލޮޅު ދަނޑުގެ ތަރައްގީ އަށް ހަރަދުކުރަން އަންނަ އަހަރުގެ ބަޖެޓްގައި ހިމަނާފައިވަނީ 45،494،505 ރުފިޔާ އެވެ. އަދި 2023 ވަނަ އަހަރުގެ ބަޖެޓްގައި 10 މިލިއަން ރުފިޔާ ވަނީ ގަލޮޅު ދަނޑުގެ ތަރައްގީ އަށް ހިމަނައިފަ އެވެ. މިއީ އިންޑިއާގެ އެގްޒިމް ބޭންކް މެދުވެރިކޮށް ދޭ ލޯނުން ހިންގަން ނިންމާފައިވާ ޕްރޮޖެކްޓެކެވެ.
ރާއްޖެ ޓީވީ "ކުޅިވަރު ފައިލް" ޕްރޮގްރާމްގައި ރޭ ވާހަކަ ދައްކަވަމުން މިނިސްޓަރު މަހުލޫފް ވިދާޅުވީ މިހާރު އޮތް ވިސްނުމަކީ ގަލޮޅު ދަނޑު އެއްކޮށް ތަޅާލުން ކަމަށެވެ.
"ހުޅުމާލޭ ދަނޑުގައި ކުޅުން އޮތީ ގަލޮޅު ދަނޑުގައި ކުޅެވެންދެން. ގަލޮޅު ދަނޑު އެއްކޮށް ތަޅާލަން ޖެހޭނީ އިނގޭތޯ. އެ މަސައްކަތަކީ މި ދެންނެެވި 40 މިލިއަން ޑޮލަރުގެ ތެރެއިން ހިނގާނެ ކަމެކޭ. އޭގެ ތެރެއިން ގާތްގަނޑަކަށް 25 މިލިއަން ޑޮލަރު ދާނެއޭ ގަލޮޅު ދަނޑުގެ މަސައްކަތަށް. ދެން ހުރި މަސައްކަތްތައް އޭގެ ހިމަނައިގެން ޖުމްލަ 40 މިލިއަން ޑޮލަރު މި އަންނަނީ،" މިނިސްޓަރު ވިދާޅުވި އެވެ.
ގަލޮޅު ދަނޑުގެ މަސައްކަތް ސީދާ ފެށޭނެ ތާރީހެއް އަދި އިއުލާނުކޮށްފައެއް ނުވެ އެވެ.
ގަލޮޅު ދަނޑުގެ މަތިން ނަގާފައިވާ ފޮޓޯއެއް.-- ފޮޓޯ: އަހުމަދު އިހުސާން/ އަދަދު
ޒަމާނުއްސުރެ ރާއްޖޭގެ ލޯކަލް އާއި ބައިނަލްއަގުވާމީ ފުޓްބޯޅައިގެ ހުރިހާ ކަމެއް މުޅިން އެއްކޮށް ކަހަލަ ގޮތަކަށް ބަރޯސާވެފައި އޮތީ ގަލޮޅު ދަނޑަށެވެ. ފަހުގެ ތާރީހެއްގައި ގަލޮޅު ދަނޑު ތިން ފަހަރެއްގެ މަތިން މަރާމާތު ކޮށްފައި ވަނީ މުބާރާތެއް ބޯމަތިވެފައި އޮއްވަ އެވެ.
އެ ގޮތުން 2008 ވަނަ އަހަރު ރާއްޖެ އާއި ލަންކާގައި ހޯސްޓް ކުރި ސާފް ޗެމްޕިއަންޝިޕަށް ކޮންމެ ވެސް ވަރެއްގެ މަރާމާތެއް ކުރި އެވެ. އޭގެ ފަހުން 2014 ވަނަ އަހަރުގެ އޭއެފްސީ ޗެލެންޖް ކަަޕަށް 70 ވަރަކަށް މިލިއަން ރުފިޔާ ހަރަދުކޮށްގެން ގަލޮޅު ދަނޑުގެ ރޮސްޓްރަމް މަތީގައި މީޑިއާ އާއި ވީއައިޕީ އަށް ހާއްސަކޮށް އިމާރާތެއް ހެދި އެވެ.
މިދިޔަ އޮކްޓޫބަރު މަހު ރާއްޖޭން ސާފް ޗެމްޕިއަންޝިޕް ހޯސްޓްކުރިއިރު އެ މުބާރާތަށް ދަނޑުގެ މަސައްކަތްތައް ބޮޑަށް ކުރީ ދެ ފަރާތުގެ ސިޑި ބަރީގެ މަރާމަތް ކުރުމަށެވެ. އެއީ ސަޕޯޓަރުން ދަނޑަށް ވައްދަން ރައްކާތެރިކަން ކަށަވަރުކުރަން ކުރަން ޖެހުނު މަސައްކަތެވެ. އަދި އޭގެ އިތުރުން ޗޭންޖިން ރޫމް ޒަމާނީ ފެންވަރަށް ގެންނަން މަސައްކަތްތަކެއް ކުރެވިފައިވެ އެވެ.
ސާފް ޗެމްޕިއަންޝިޕް ބާއްވަން ރާއްޖޭން ބިޑްކުރިއިރު، ދެ ވަނަ ވެނިއު އަކަށް ހިމެނީ ހުޅުމާލޭ ދަނޑެވެ. އަދި އޭރު އެ ދަނޑު ހަދާނެ ޕްލޭނެއް ވެސް ގެންގުޅުނެވެ. އެކަމަކު، ވަގުތު ކުޑަތަންވެފައި އޮތުމުން އެ ދަނޑުގެ މަސައްކަތްތައް ނުކުރެވި އެންމެ ފަހުން ޖެހުނީ ގަލޮޅު ދަނޑުގައި އެކަނި މެޗުތައް ކުޅޭށެވެ. ހުޅުމާލޭ ޓްރެކް ދަނޑުގައި މެޗުތައް ކުޅޭނަމަ އެތަން މެޗު ކުޅެވޭ ހާލަތަށް ގެންނަން މަސައްކަތްތަކެއް ކުރަން ޖެހޭނެ އެވެ.
