އަރަބި ކަރައިގެ ގައުމުތައް ހިމެނޭ އަރަބި ލީގަށް ވަނުމުގެ ދައުވަތު ރާއްޖެއަށް ލިބި, އެ ގައުމުތަކުގެ އެހީގައި ރާއްޖެއަށް މުއްސަނދިކަމާއި، ތިޔާގިކަން ގެނައުމުގެ ފުރުސަތު ލިބިގެން ދިޔަކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ޔާމީންގެ ވެރިކަމުގައި ބޭރުގެ ފަރާތްތަކަށް ރާއްޖޭގެ ބިންތައް ގަނެވޭނެ ގޮތަށް ސްޕެޝަލް އިކޮނޮމިކް ޒޯން (އެސްއީޒެޑް) ގެ ގާނޫނު ހެދުމަށްފަހު، ސައުދީގެ ޝާހީ އާއިލާގެ ބަޔަކަށް ފ. އަތޮޅުގެ ބޮޑު ބައެއް އިންވެސްޓްކުރަން ދޭން ނިންމާފައި ވަނިކޮށް އެ މަސައްކަތް ހުއްޓާލަން ޖެހުނީ އޭރުގެ އިދިކޮޅު ފަރާތްތަކުން އެކަމާ ދެކޮޅަށް ކެމްޕެއިން ކުރުމުންނެވެ. އޭރު އިދިކޮޅުން ތުހުމަތު ކުރީ ސައުދީ ސަރުކާރަށް ފ. އަތޮޅު ވިއްކާލަން އުޅޭ ކަމަށެވެ.
ނަމަވެސް އެ މަޝްރޫއަކީ ސައުދީ ޝާހީ އާއިލާގެ ބަޔަކު އިންވެސްޓުކޮށްގެން ހިންގަން އުޅުނު މަޝްރޫއެއް ކަމަށާއި އެއީ ސައުދީ ސަރުކާރުން ހިންގަން އުޅުނު މަޝްރޫއެއް ނޫން ކަމަށް ރޭ ޗެނަލް13އަށް ދެއްވި އިންޓަވިއުގައި ޔާމީން ވިދާޅުވި އެވެ. އެމަނިކުފާނު ވިދާޅުވި ގޮތުގައި އެއީ މުޅި މި ސަރަހައްދު ބަދަލުކޮށްލާ ވަރުގެ ބޮޑު މަޝްރޫއުއެކެވެ.
އެ މަޝްރޫއު ފަހިވެގެން ދިޔައީ ކުރީ ސަރުކާރުގެ ހާރިޖީ ސިޔާސަތުގެ ދަށުން އަރަބި ގައުމުތަކާއި ހާއްސަކޮށް ސައުދީއާ ބަދަހިކުރި ގުޅުމުގެ ސަބަބުން ކަމަށް ޔާމީން ވިދާޅުވި އެވެ. ޔާމީން ވިދާޅުވި ގޮތުގައި, އިސްލާމީ ގައުމުތަކާއި ރާއްޖެއަށް ބޮޑެތި އެހީތައް ފޯރުކޮށްދޭން ތައްޔާރަށް ތިބި ގައުމުތަކާއެކު ދުވަހަކު ވެސް ބަދަހިނުވާ މިންވަރަށް ކުރީ ސަރުކާރުގައި ގުޅުން ބަދަހިކުރެވުނެވެ.
އޭގެ ހެއްކެއް ދެއްކެވުމުގެ ގޮތުން ރައީސް ޔާމީން ފާހަގަ ކުރެއްވީ އަރަބި ލީގްގެ ގައުމަކަށްވާން ރާއްޖެއަށް ލިބުނު ދައުވަތެވެ. އަރަބި ލީގަށް އޭޝިއާ ބައްރުގައި ވަކިން އޮންނަ ގައުމަކަށް ދައުވަތު ލިބުމަކީ ރާއްޖެ ފަދަ ކުޑަ ގައުމަކަށް ލިބުނު ބޮޑު ޝަރަފެއް އަދި ކުރިއެރުމެއް ކަމަށް އެމަނިކުފާނު ދެކެވަޑައިގަންނަވަ އެވެ. އެކަމަކު އެ ހުރިހާ ފައިދާއެއްވެސް ބީވެގެން ދިޔައީކަމަށް ޔާމީން ފާހަގަ ކުރެއްވި އެވެ.
ހއ. އަތޮޅުގައި ތަރައްގީކުރާ އައިހެވަން މަޝްރޫއު އާއި ފ. އަތޮޅުގެ މަޝްރޫއު ފައްޓަވައިދެއްވުމަށް ސައުދީ ރަސްގެފާނު ހިމެނޭހެން އެ ގައުމުގެ ބޮޑު ވަފުދެއް ރާއްޖެ ވަޑައިގަތުމަށް ހުރިހާ ތައްޔާރީތަކެއްވެފައި ވަނިކޮށް، އެ ދަތުރު ކެންސަލް ކޮށްލީ އޭރު އިދިކޮޅުގައި ތިބި ލީޑަރުން އެކަމާ ދެކޮޅަށް އަޑުއުފުލުމުން ކަމަށް ޔާމީން ވިދާޅުވި އެވެ.
"އެހާވަރަށް އިދިކޮޅު ކަންތައްތައް ދިޔައީމަ، ސާސް ރޯގާގެ އެކްސްކިއުސް ދައްކަވާފައި ރަސްގެފާނު ވަޑައި ނުގަތީ، އެކަމަކު އަޅުގަނޑަށް ސީދާ މައުލޫމާތު ދެއްވި، ހިތްޕުޅުހަމަޖެހި ވަޑައިނުގަތީ، އެހާ ބޮޑަށް މިތަނުގައި އިދިކޮޅު ލީޑަރުން އެކަމާ ދެކޮޅު ހެއްދެވީމަ. އެ ދަތުރުފުޅު ވެސް ކުރައްވަން ބޭނުން ނުވީ ހަމަ." ސައުދީ ރަސްގެފާނު ސަލްމާން ބިން އަބްދުލްއަޒީޒް އާލް ސައުދުގެ ރަސްމީ ދަތުރުފުޅު ކެންސަލްކޮށްލި ސަަބަބު އޭރު ވެރިކަމުގައި ހުންނެވި ޔާމީން ކިޔާދެއްވި އެވެ.
އެމަނިކުފާނު ވިދާޅުވި ގޮތުގައި ސައުދީ ރަސްގެފާނުގެ ދަތުރު ކެންސަލްވުމާއެކު ރާއްޖެއަށް ލިބެން އޮތް އެތައް ފައިދާއެއް އަދި އެހީއެއް ގެއްލިގެން ދިޔަ އެވެ. އަދި އެއީ ރާއްޖޭގެ ކުރިއެރުމަށް އެޅުނު ބޮޑު ހުރަހެއްގެ ގޮތުގައި އެމަނިކުފާނު ސިފަކުރައްވަ އެވެ.
"އެ މީހުންނަށް (ފ. އަތޮޅު ރައްޔިތުންނަށް) ލިބެން އޮތް އެ އޮތް ބޮޑު އިގްތިސޯދީ ފައިދާ އެ މީހުންނަށް މަހުރޫމުކޮށްލީ ކޮން ބައެއްތޯ؟ ފ. އަތޮޅު ރައްޔިތުން މިއަދުވެސް ހަނދާން އެބަހުރި. އަޅުގަނޑު އިހަށް ދުވަހު ވެސް މި އައީ ނިލަންދޫއަށް ގޮސްފައި،" ފ. މަޝްރޫއު ކުރީ ސަރުކާރުގައި ކުރިއަށް ނުގެންދެވި ހުއްޓާލުމާ ގުޅިގެން އެ އަތޮޅު ރައްޔިތުން މާޔޫސްވެފައި ތިބިކަން ފާހަގަކުރަމުން ޔާމީން ވިދާޅުވި އެވެ.
އޭރު އިދިކޮޅުގައި ތިއްބެވި ބޭފުޅުން ތުހުމަތު ކުރެއްވީ ސަރުކާރުން ސައުދީއަށް ފ. އަތޮޅު ވިއްކާލަން އުޅޭ ކަމަށެވެ. އެ ތުހުމަތަށް ރައްދެ ދެމުން ރައީސް ޔާމީން ރޭ ވިދާޅުވީ އެއީ "ބުހުތާނު ދޮގު" ކަމަށާއި، އެ މަޝްރޫއު ކުރިއަށް ގެންދިޔަ ނަމަވެސް އެ އަތޮޅުގައި މީހުން ދިރިއުޅޭ އެއްވެސް ރަށަކަަށް އެއްވެސް ބަދަލެއް ނައިސް ދިރިއުޅެވޭނެ ކަމަށެވެ.
ޔާމީން ގަބޫލުކުރާ ގޮތުގައި އެ މަޝްރޫއާ އިދިކޮޅުން ދެކޮޅު ހެދީ ސިޔާސީ ބޭނުމަށެވެ. އެއީ މަޝްރޫއު އޭގެ ޒާތުގައި ގޯސްވެގެން ނޫން ކަމަށް ޔާމީން ވިދާޅުވި އެވެ.
"އެ ބޭފުޅުންނަށް ނުކުރެވުނު ކަމެއް އަޅުގަނޑަށް ކުރެވުނީމަ ދެކޮޅު ހެދީ. އަޅުގަނޑަށް ގަބޫލުކުރެވެނީ، ސިފަ ވަނީ އެ ގޮތަށް. އެހެން ނޫނީ ރައްޔިތުންގެ ފައިދާއެއް އޮތް މި ކަހަލަ ބޮޑު ކަމެއް ރައްޔިތުން އަތުން މަހުރޫމުކުރާކަށް އެ ވަރުގެ ކަމެއް ނުކުރާނެ," ޔާމީން ވިދާޅުވި އެވެ.
މިފަދަ ބޮޑެތި މަޝްރޫއުތަކަށް އިންވެސްޓަރުން ބޭނުންވާ ގެރެންޓީތައް ހޯދަން އެސްއީޒެޑްގެ ގާނޫނު ހެދީ ބޭރުގެ ކަމާ ބެހޭ މާހިރުންގެ ލަފާގެ މަތިން ކަމަށް ޔާމީން ވިދާޅުވި އެވެ. އަދި އެއީ ކޮންމެހެން އޮންނަން ޖެހޭނެ ގާނޫނެއް ކަމަށާއި، އެ ގާނޫނުގެ ދަށުން އެހެން ގައުމުތަކާއެކު ވެފައިވާ އެއްބަސްވުންތައް ނިމުމަކަށް ގެނެސްފި ނަމަ، ރާއްޖޭން ބޮޑު ބަދަލު ދޭން ޖެހޭނެ ކަމަށް ޔާމީން ގަބޫލުކުރައްވަ އެވެ.
"ބޮޑެތި ބިޔަ މަޝްރޫއުތަކެއް އޭރު ހުރި ރޭވިފައި، ހަމައެކަނި ރޭވިފައި ހުރީކީ ނޫން ވާހަކަ ދައްކާފަ ނިމިފައި ބައެއް ކަންތައް އެހެރީ. އެހެންނަމަވެސް ހާލަތު ބަދަލުވެގެން ދިޔައީ، އެހެންވެ އެކަންކަން އެކޮމޮޑޭޓް ކުރުމަށްޓަކައި (ގެއްލުން ފޫބެއްދުމަށްޓަަކައި) މަޖުބޫރު އެސްއީޑީއެޒް ގާނޫނު އޮންނަން," ޔާމީން ވިދާޅުވި އެވެ.
