ދިވެހިރާއްޖޭގެ ބައެއް ރަށްރަށަށް ރޭ ވަރަށް ބޮޑަށް އުދަ އަރައި، އެކިވަރުގެ ގެއްލުންވެއްޖެ އެވެ.
އުދަ އަރާފައި ވަނީ ށ. އަތޮޅާއި ނ. އަތޮޅުގެ ބައެއް ރަށްތަކަށެވެ. އުދައިގެ އަސަރު އެންމެ ބޮޑަށް ކުރި އެއް ރަށަކީ ށ. ފުނަދޫ އެވެ.
ފުނަދޫ ކައުންސިލްގެ ރައީސް އިބްރާހިމް އަހުމަދު ފުޅު ވިދާޅުވީ ރޭ ދަންވަރު އެ ރަށުގެ އުތުރު ފަރާތުން ވަރަށް ބޮޑަށް އުދަ އަރައި، ރަށުގެ ވަރަށް ބޮޑު ބަޔަކަށް ލޮނުގެ އަސަރުކޮށްފައިވާ ކަމަށެވެ.
"އަޅުގަނޑުމެން މިހާރު މި ދަނީ ލިބިފަ ހުރި ގެއްލުންތައް ވަޒަން ކުރަން. ނަރުދަމާ ސްޓޭޝަނާ ދިމާލުން ވަރަށް ބޮޑަށް އުދަ އެރި. ހީވަނީ ކޮންމެވެސް ވަރެއްގެ ގެއްލުންތަކެއް ލިބިފަ ހުންނާނެހެން،" ފޯނުން ވާހަކަ ދައްކަވަމުން އިބްރާހިމް ވިދާޅުވި އެވެ.
ފުނަދޫއަށް ރޭ އުދަ އަރަމުންދިޔައިރު ނަގާފައިވާ ފޮޓޯއެއް: ރަށުގެ ބޮޑު ބަޔަކަށް ލޮނުގެ އަސަރު ކުރި -- ފޮޓޯ: އިބްރާހިމް އަހުމަދު ފުޅު
މޯލްޑިވްސް މިޓިއޮރޮލޮޖިކަލް ސާވިސްގެ އޮފިޝަލަކު ބުނީ ރޭ ރާއްޖެއަށް އުދަ އެރީ ދިޔަވަރާއި ވައި ހުރި ގޮތުގެ ސަބަބުން ކަމަށެވެ.
"ދިޔަވަރު ބޮޑުވެގެން އުދަ އަރާފައި ވަނީ. ރާއްޖޭގެ ހުރިހާ ސަރަހައްދެއްގައި ވެސް މި ދުވަސްވަރު ދިޔަވަރު ބޮޑު. އަދި މިރޭ ވެސް ބައެއް ރަށްރަށަށް އުދަ އެރުން އެކަށީގެންވޭ،" އޭނާ ވިދާޅުވި އެވެ.
މެޓު އޮފީހުން ބުނީ އުދަ އެރުމުގައި އެކި ރަށްރަށަށް ތަފާތުވާނެ ކަމަށާއި އުދަ އެރުން ގުޅޭނީ އެރަށެއްގެ ގޮނޑުދޮށާއި އޮޔަ ހުންނަ ގޮތަކަށް ކަމަށެވެ.
