ޗައިނާއާ ހާރިޖީ ގޮތުން ގާތް ގުޅުމެއް ބޭއްވި ކުރީގެ ރައީސް އަބްދުﷲ ޔާމީންގެ ވެރިކަން ބަދަލުވިފަހުން ފުރަތަމަ ފަހަރަށް ޗައިނާގެ މިނިސްޓަރެއް އަންނަ މަހު ރާއްޖެ ވަޑައިގަންނަވަން ނިންމައިފި އެވެ.
ރަސްމީ ދަތުރުފުޅެއްގައި ޗައިނާގެ ފޮރިން މިނިސްޓަރު ވެންގް ޔީ ރާއްޖެ ވަޑައިގަންނަވާނީ ޖެނުއަރީ ހަތްވަނަ ދުވަހު އެވެ.
މި ދަތުރުފުޅަކީ ޗައިނާއާއި ރާއްޖެ އާއި ދެމެދުވާ ހާރިޖީ ގުޅުމަށް އަންނަ އަހަރު ބައި ގަރުނުވާތީ، އެކަން ކުލަގަދަކޮށް ފާހަގަކުރުމަށްޓަކައި މަޝްވަރާ ކުރުމަށް ކުރާ ދެ ދުވަހުގެ ދަތުރުފުޅެކެވެ. ޗައިނާ އެމްބަސީއިން ބުނާ ގޮތުގައި މިއީ ދެ ގައުމުގެ ގުޅުމުގެ ރަންޔޫބިލް ފާހަގަކުރުމަށް ހިންގަން ރާވާފައިވާ ހަރަކާތްތައް ރަސްމީކޮށް ފައްޓަވައިދެއްވުމަށް ކުރައްވާ ދަތުރެކެވެ.
އެންމެ ފަހުން މިނިސްޓަރު ވެންގް ޔީ ރާއްޖެ ވަޑައި ގަތީ އޮގަސްޓް 2016 އަހަރު އެވެ. އެއީ ކެންޔާއަށް ވަޑައިގަތް މަގުމަތީގައި ރާއްޖޭގައި ޓްރާންސިޓް ކުރައްވަމުންނެވެ. އެއީ ނުރަސްމީ ދަތުރުފުޅެއް ކަމުގައި ވީނަމަވެސް އޭރުގެ ސަރުކާރުގެ އިސްވެރިން އޭނާއާ ބައްދަލުކުރެއްވި އެވެ.
މިދިޔަ މަހުގެ ތެރޭގައި ރާއްޖޭގެ ފޮރިން މިނިސްޓަރު އަބްދުﷲ ޝާހިދު ވަނީ ޗައިނާއަށް ރަސްމީ ދަތުރުފުޅެއްގައި ވަޑައިގަނެފަ އެވެ. އެހެންނަމަވެސް އެމަނިކުފާނު ވަޑައިގަތީ، އދ.ގެ އާންމު މަޖިލީހުގެ ރައީސްގެ ހައިސިއްޔަތުންނެވެ.
ކުރީ ސަރުކާރުގެ ހާރިޖީ ސިޔާސަތު ރައީސް ޔާމީން ބައްޓަން ކުރެއްވީ ޗައިނާއަށް ވަރަށް ބޮޑަށް ބަރޯސާވެ އޮވެ އެވެ. އެގޮތުން އުމްރާނީ ތަރައްގީގެ ބޮޑެތި މަޝްރޫއުތައް ހިންގީ އެގައުމުގެ އެހީތެރިކަމާއި އެކު އެވެ. އޭގެ ތެރޭގައި ހިޔާ މަޝްރޫއާއި ސިނަމާލެ ބްރިޖް މަޝްރޫއު ފާހަގަކޮށްލެވެ އެވެ. އޭރު އިދިކޮޅުގައި އޮވެ އެމްޑީޕީއިން މިކަން ސިފަކުރީ ޗައިނާގެ މަގްސަދަކީ ރާއްޖެ "ދަރަނީގެ ދަންތުރައެއް"ގައި ޖެއްސުން ކަމަށެވެ.
އެގޮތުން މިދިޔަ އަހަރު ރައްޔިތުން މަޖިލީހުގެ ރައީސް މުހައްމަދު ނަޝީދު ބީބީސީއަށް ދެއްވި އިންޓަވިއުއެއްގައި ވިދާޅުވެފައި ވަނީ، ޗައިނާއިން ކުރީ ސަރުކާރަށް ދީފައިވާ ލޯނުތަކާއި ސަރުކާރުގެ އެކި ކުންފުނިތަކަށް ދީފައިވާ ލޯނުތަކާއި، ދިވެހި ސަރުކާރުން ގެރެންޓީ ދީގެން އަމިއްލަ ކުންފުނިތަކަށް ދީފައިވާ ލޯނުތަކުގެ ޖުމްލަ އަދަދު 3.1 ބިލިއަނަށް އަރާ ކަމަށާއި އެކަމަކު ލިޔެކިޔުމުން ފެންނަން އޮތީ 1.1 ބިލިއަން ޑޮލަރުގެ ލޯނު ކަމަށެވެ. ނަމަވެސް ނަޝީދުގެ މި ވާހަކައަށް ބާރު ދޭ ލިޔެކިޔުމެއް ދައްކަވާފައި ނުވާކަން ބީބީސީން ފާހަގަކޮށްފައިވެ އެވެ.
ޗައިނާއަށް މި ސަރުކާރުގެ އިސްވެރިންގެ ފާޑުކިޔުން އޭރު އަމާޒުވެފައިވާއިރު، އެމްޑީޕީ އިސްވެ އޮވެ ހިންގާ ކޯލިޝަން ސަރުކާރު ވެރިކަމަށް އައުމާއެކު ފެނިގެން ދިޔައީ އުމްރާނީ ތައްގީގެ ގިނަ މަަޝްރޫއުތައް ޗައިނާއާ އެންމެ ވާދަވެރި އެއް ގައުމު ކަމަށްވާ އިންޑިއާ ހަވާލުކޮށް، އެގައުމާއެކު ގާތް ގުޅުމެއް ބާއްވަމުންދާ މަންޒަރެކެވެ.
ކުރީ ސަރުކާރުން އިންޑިއާއެކު ހާރިޖީ ގުޅުން މާބޮޑަށް ބަދަހުކުރަން މަސައްކަތް ނުކުރި ގޮތަށް މި ސަރުކާރުން ފެންނަނީ ޗައިނާއާ އެކު މާ ބޮޑު ގާތް ގުޅުމެއް ނުބާއްވާ ތަނެވެ. ނަމަވެސް މި އަހަރުގެ ޖުލައި މަހު ރައީސް އިބްރާހިމް މުހައްމަދު ސޯލިހް ވަނީ ޗައިނާގެ ރައީސް ޝީ ޖިންޕިންއަށް ފޯނުން ގުޅުއްވައި ދެ ގައުމުގެ ގުޅުން ހަރުދަނާ ކުރުމަށް މަޝްވަރާ ކުރައްވާފަ އެވެ.
