ރިޔާދް، ސައުދީ އަރަބިއްޔާ (ޑިސެމްބަރު 30) - މައްކާގައި ހުންނަ މަސްޖިދުލް ހަރަމްގައި ކޮވިޑްގެ ފިޔަވަޅުތައް އަލުން ވަރުގަދަކޮށް، ގައިދުރުކަން ބަހައްޓަން އަންގައިފި އެވެ.
ހަރަމްފުޅުގައި ގައިދުރުކަން ބަހައްޓަން ޖެހޭ ގޮތް ދައްކުވައިދޭ ފާހަގަތައް އަލުން ވަނީ ހަރުކޮށްފަ އެވެ. ގައިދުރުކަން ބެހެއްޓުން ހުއްޓާލީ އޮކްޓޯބަރު 17 ވަނަ ދުވަހު އެވެ.
ހަރަމްފުޅުގެ އިތުރުން މުޅި ސައުދީ އަރަބިއްޔާގައި ވެސް އަލުން މާސްކް އެޅުން މަޖުބޫރުކޮށް، ހުރިހާ ތަނެއްގައި ވެސް ގައިދުރުކަން ބަހައްޓަން ވަނީ އަންގާފަ އެވެ.
ގާތްގަނޑަކަށް 34 މިލިއަން މީހުންގެ އާބާދީއެއް އޮންނަ ސައުދީ އަރަބިއްޔާ އިން މިހާތަނަށް ރިޕޯޓު ކުރީ ޖުމްލަ 554،000 ކޮވިޑް ކޭސް އެވެ. އެ ބަލީގައި މަރުވެފައި ވަނީ 8،874 މީހުންނެވެ.
ބުދަ ދުވަހު ސައުދީ އަރަބިއްޔާ އިން ވަނީ 744 ކޭސް ރިޕޯޓުކޮށްފަ އެވެ. އެއީ މިދިޔަ އޯގަސްޓު މަހަށް ފަހު ކޭސްތައް އެންމެ މަތިވި ދުވަހެވެ.
