މެންޗެސްޓާ (ޑިސެމްބަރު 30) - މެންޗެސްޓާ ޔުނައިޓެޑްގައި އޭނާ އަށް އެކަށީގެންވާ ދުވެއްޔެއްގައި ކުރިއަށް ނުދެވޭ ސަބަބަކީ ކޮވިޑް-19އާ ހެދި ކުރިމަތިވެފައި އޮތް ހާލަތު ކަމަށް އެ ޓީމާ ދާދި ފަހުން ހަވާލުވި ޖަރުމަނު ކޯޗު ރަލްފް ރަންގްނިކް ބުނެފި އެވެ.
ރަންގްނިކް، 63، ޔުނައިޓެޑް ކޯޗުކަމާ ހަވާލުވީ މީގެ މަހެއްހާ ދުވަސްކުރިންނެވެ. ރަންގްކިން ހަވާލުވި ފަހުން އެ ޓީމު ކުޅުނު ހަތަރު މެޗުން ވެސް ބަލިވެފައިނުވެ އެވެ.
ރަންގްނިކް ހަވާލުވި ފަހުން ޔުނައިޓެޑް ވަނީ ފުރަތަމަ ތިން މެޗުގައި ޗެމްޕިއަންސް ލީގުގައި ޔަންގް ބޯއީސްއާ އެއްވަރުވެ، ޕްރިމިއާ ލީގުގައި ނޮރިޗް ސިޓީ އާއި ކްރިސްޓަލް ޕެލަސް ބަލިކޮށްފަ އެވެ. އޭގެ ފަހުން ޔުނައިޓެޑް ކުޅެން އޮތް ބްރައިޓަން އާއި ބްރެންޓްފޯޑް މެޗު ވަނީ ކޮވިޑްގެ ސަބަބުން ފަސްކޮށްފަ އެވެ.
ފަސްކުރި މެޗުތަކަށް ފަހު ޔުނައިޓެޑުން އަލުން އެނބުރި އައިސް ކުޅުނު މެޗުގައި ރެލިގޭޝަންގައި އޮތް ނިއުކާސަލާ ވަނީ 1-1 އިން އެއްވަރުވެފަ އެވެ. އެ މެޗަށް ތައްޔާރުވުމުގެ ތެރެއިން ކޮވިޑްގެ ކޭސްތަކަކާ ހެދި ޔުނައިޓެޑްގެ ޓްރެއިނިން ދަނޑު ވެސް ބަންދުކޮށްފައިވެ އެވެ. ކޮވިޑްގެ ހާލަތާ ހެދި އުނދަގޫތަކެއް ކުރިމަތިވިތޯ ނޫސްވެރިއަކު ސުވާލުކުރުމުން ރަންގްނިކް ބުނީ އެކަން ދިމާވި ކަމަށެވެ.
"ތެދެއް ތިބުނީ. އަހަރެމެންނަށް އެކަށީގެންވާ ސްޕީޑާއި އިންޓެންސިޓީ އަށް މަސައްކަތްކުރެވޭ ވަރަށް ޓްރެއިނިން ނުގެންދެވޭ، އެންމެ ފަހުން ތިން ޓްރެއިނިން ސެޝަންގައި މަސައްކަތްތަކެއް ކުރެވުނު. އެކަމަކު، އެއީ ބޭނުންވާ ވަރަކަށް ނޫން. މީގެ އެބަހުރި (ކޮވިޑް-19އާ ހެދި) ގޮންޖެހުންތަކެއް،" ރަންގްނިކް ބުންޏެވެ.
ކުރިން ހޮފެންހައިމް އާއި ޑޯޓްމަންޑަށް ކޯޗުކޮށްދިން ރަންގްނިކް ބުނީ އޭނާ ބޭނުންވާ ސިސްޓަމަށް ކުޅެން ކުޅުންތެރިން ކުރާ މަސައްކަތް ފާހަގަކުރާ ކަމަށެވެ. ސީޒަނެއްގެ މެދުތެރެއިން ޓީމެއް ކުޅެމުން އައި ސިސްޓަމެއް ބަދަލުކުރަން ބަލާއިރު ބޮޑެތި ގޮންޖެހުންތަކެއް ހުންނާނެ ކަމަށް ރަންގްނިކް ވެސް ގަބޫލުކުރެ އެވެ.
ޔުނައިޓެޑް މި ވަގުތު އޮތީ ލީގުގެ ހަތް ވަނައިގަ އެވެ. އެއީ 17 މެޗުން 28 ޕޮއިންޓާ އެކު އެވެ. މިރޭ އަމިއްލަ ދަނޑުގައި ބާންލީ އަތުން ޔުނައިޓެޑް މޮޅުވެއްޖެނަމަ ލީގުގެ ހަ ވަނަ އަށް އެ ޓީމު ޖެހިލާނެ އެވެ.
