ޗައިނާގެ ޓެކް ކުންފުނި ބައިޑޫ އިން އުފެއްދި ވާޗުއަލް ރިއެލިޓީ އެޕަކާ އެކު މެޓަވާސްގެ ދުނިޔެ އަށް ވަނުމުގެ މަސައްކަތް ފަށައިފި އެވެ.
މިހާރު ދުނިޔޭގައި ބޭނުންކުރާ ވެބްގެ މައްޗަށް މެޓަވާސް އިން ކުރި ހޯދާނެކަމަށް ލަފާކުރަމުން ދާއިރު، ނައިކީ އާއި ފެރާރީ ފަދަ ބްރޭންޑްތަކުން ވެސް ވަނީ ވާޗުއަލް ދުނިޔެ އަށް ވަންނަން މަސައްކަތް ފަށާފަ އެވެ.
ޗައިނާގެ ކުންފުނިތަކުގެ ތެރެއިން ބައިޑޫ އިން މެޓަވާސްގެ ދުނިޔެ އަށް ވަންނަން އުފެއްދީ ޒިރާންގް ނަމަކަށް ކިޔާ އެޕެކެވެ. ޒިރާންގްގެ މާނައަކީ އުއްމީދުގެ ބިމެވެ.
"ޗައިނީޒް ގޫގްލް" ގެ ނަމުން މުހާތަބު ކުރާ ބައިޑޫ އިން ވަނީ އެ އެޕްގެ އެހީގައި ވާޗުއަލް ދުނިޔޭގައި ކޮންފެރެންސެއް ބާއްވާފަ އެވެ. ސްމާޓްފޯނާއި، ކޮމްޕިއުޓަރު އަދި ވާޗުއަލް ރިއެލިޓީ ގޮގްލްސްގެ އެހީގައި އެޕް ބޭނުންކުރެވޭނެ އެވެ.
ކޮންފެރެންސް ކުރިއަށް ދިޔައީ ބައިޑޫގެ ކޯފައުންޑަރު އަދި ޗީފް އެގްޒެކްޓިވް ރޮބިން ލީ އާއި 3ޑީ އެވެޓާ ހިމެނޭ އޯޑިއެންސަކާ އެކު އެވެ.
ބައިޑޫގެ ޒީރާންގް ޕްލެޓްފޯމްގެ ސްކްރީންޝޮޓެއް.
ބައިޑޫ އިން ބުނީ އެޕްލިކޭޝަންގެ މަސައްކަތް އަދިވެސް އުޅެނީ ފުރަތަމަ މަރުހަލާގައި ކަމަށާއި ފުރިހަމަ އެޕެއް ލޯންޗުކުރަން ހަ އަހަރު ހޭދަވާނެ ކަމަށެވެ.
އެޕް ބޭނުންކުރާ މީހުންނަށް ޑިޖިޓަލް ކެރެކްޓާޢެއް އުފައްދައިގެން، 3ޑީ ދުނިޔެއެއްގައި އެކަކު އަނެކަކާ މުއާމަލާތު ކުރެވޭނެ އެވެ.
ބައިޑޫ އިން ބުނީ އެއް ޑިޖިޓަލް ސްޕޭސްގައި 100،000 އެއްހާ މީހުންނަށް އެއް ފަހަރާ އުޅުމުގެ ފުރުސަތު ދޭނެ ކަމަށެވެ. އެ އެޕް ބޭނުން ކުރެވޭނީ ހަމައެކަނި ޗައިނާގަ އެވެ.
އެޕް މެދުވެރިކޮށް ވާޗުއަލް މައުރަޒުތަކާއި ޑައިވްކުރަން ދަސްކުރުމާއި ޑިޖިޓަލް ސިވިމިން ޕޫލެއްގައި ފެތުން ފަދަ ހަރަކާތްތަކުގައި ބައިވެރިވެވޭނެ އެވެ.
ބައިޑޫގެ ވާޗުއަލް ރިއެލިޓީ ކޮންފެރެންސްގައި ދައްލާލި އޭއައި އުފެއްދުންތައް.
"މުޅިން އާ ވާޗުއަލް ދުނިޔެއެއްގައި" ލިބޭ ފުރުސަތުތައް ފާހަގަވެ، ބޮޑެތި ޑިޖިޓަލް ކުންފުނިތަކުން ވަނީ އެ މާކެޓުގެ ތެރެއަށް ވަންނަން މިސްރާބު ޖަހާފަ އެވެ.
އެގޮތުން މިދިޔަ އޮކްޓޯބަރު މަހު ފޭސްބުކް އިން ވަނީ ކުންފުނީގެ ނަން "މެޓަ" އަށް ބަދަލުކޮށްފަ އެވެ. ބައިޑޫގެ އިތުރުން ޗައިނާގެ އެހެން ކުންފުނިތަކުން ވެސް އަންނަނީ ވާޗުއަލް ދުނިޔެ އަށް ވަންނަން މަސައްކަތް ކުރަމުންނެވެ.
ޓިކްޓޮކްގެ ކުންފުނި ބައިޓްޑާންސް އިން ވަނީ ވާޗުއަލް ރިއެލިޓީ ސިނާއަތުގެ ގިނަ ކުންފުނިތަކަށް އިންވެސްޓުކޮށްފަ އެވެ. އޭގެ ތެރޭގައި ވާޗުއަލް ރިއެލިޓީ ހެޑްސެޓް އުފައްދާ ޕީކޯ ހިމެނެ އެވެ.
