ސުޕީރިއާ ކޯޓުތަކުގެ ބައެއް ފަނޑިޔާރުންގެ ފެންވަރު ވަޒަން ކުރުމުގެ މަސައްކަތް ޖުޑީޝަލް ސާވިސް ކޮމިޝަންގެ ފަރާތުން ފަށައިފި އެވެ.
ޖޭއެސްސީގެ ފަރާތުން މިއަދު ނެރެފައިވާ ބަޔާނެއްގައި ބުނެފައި ވަނީ ފަނޑިޔާރުންގެ ފެންވަރު ވަޒަން ކުރުމަށް ގާނޫނީ ވަކީލުންގެ މެދުގައި ސިއްރު ސާވޭއެއް ކުރުމަށް ހަމަޖެހިފައިވާ ކަމަށެވެ. އެހެންކަމުން މި ބުރުގައި ފެންވަރު ވަޒަން ކުރާ ފަނޑިޔާރުންގެ މައުލޫމާތު އެނގޭ ފަރާތްތަކުން ސާވޭ ފޯމު ފުރުމަށް އެ ކޮމިޝަނުން އެދެ އެވެ.
ފެންވަރު ވަޒަން ކުރުމަށް ހަމަޖެހިފައި ވަނީ ކްރިމިނަލް ކޯޓާއި ސިވިލް ކޯޓާއި ޑްރަގް ކޯޓާއި ފެމިލީ ކޯޓާއި ޖުވެނައިލް ކޯޓުގެ 29 ފަނޑިޔާރެއްގެ އެވެ.
ފަނޑިޔާރުންގެ ފެންވަރު ވަޒަން ކުރުމަކީ ކޮންމެ ދެއަހަރަކުން ޖޭއެސްސީން ކުރިއަށްގެންދަންޖެހޭ މަސައްކަތެކެވެ. ނަމަވެސް ރާއްޖޭގައި ފަނޑިޔާރުންގެ ފެންވަރު ވަޒަން ކުރަން މި އުޅެނީ އަލަށެވެ.
ފަނޑިޔާރުންގެ ފެންވަރު ވަޒަން ކުރުމާ ގުޅޭ ގޮތުން 2014 ވަނަ އަހަރު އެކުލަވައިލި ގަވާއިދުގައިވާ ގޮތުން ފެންވަރު ވަޒަން ކުރުމުގައި ބަލާނީ ހަތަރު ކަމަކަށެވެ. އެއީ މަގާމުގެ މަސްއޫލިއްޔަތާއި ވާޖިބު އަދާކުރާ މިންވަރާއި ސުލޫކީ މިންގަނޑު ހުރި ގޮތާއި ހާޒިރީ އާއި ސަލާމުގެ ކަންކަމާއި އެ ފަނޑިޔާރެއްގެ ނިންމުން މަތީ މަރުހަލާއެއްގައި ބަދަލުވާ މިންވަރެވެ.
