ބެއިޖިން، ޗައިނާ (ޑިސެމްބަރު 29) - ޗައިނާގެ ދެކުނުގައި ކޮވިޑް އުސޫލާ ހިލާފުވި ހަތަރު މީހަކު ބޭޒާރު ކުރުމުގެ ގޮތުން ގަންހިންގުވައިފި އެވެ.
ހަޒްމެޓް ސޫޓު ލައިގެން، މާސްކު އަޅައިގެން ތިބި ހަތަރު މީހުން ގަންހިންގުވި އިރު އެ މީހުންގެ ފޮޓޯ އާއި ނަން ޖަހާފައިވާ ބޯޑުތައް އަމިއްލަ އަށް އުފުލަން ޖެހުނެވެ.
ގުއާންގްޒީ ނިއުސް އިން ބުނީ އެ ސަރަހައްދުގެ ޖިންގްޝީ ސިޓީގައި އެކަން ހިނގި މަންޒަރު ބަލަން ގިނަ ބަޔަކު ޖަމާވި ކަމަށެވެ.
އުސޫލާ ހިލާފުވި ކަމަށް ބުނި ހަތަރު މީހުންނަށް ތުހުމަތު ކުރެވެނީ ބަލިމަޑުކަމުގައި ޗައިނާގެ ބޯޑަރު ބަންދުކޮށްފައި ވަނިކޮށް ގަވާއިދާ ހިލާފަށް ހިޖުރާ ކުރާ މީހުންނަށް އެތެރެވާން ފުރުސަތު ދިން ކަމަށެވެ.
ޖިންގްޝީ އަކީ ޗައިނާ އާއި ވިއެޓްނާމް ގުޅޭ ބޯޑަރު ކައިރީގައި އޮންނަ ސިޓީ އެކެވެ. އެ މީހުން މަގުމަތީގައި ގަންހިންގުވީ މިދިޔަ އޯގަސްޓު މަހު އެ ސަރަހައްދުގެ ސަރުކާރުން އިއުލާނު ކުރި އަދަބުތަކެއްގެ ދަށުންނެވެ.
ގުއާންގްޒީ ނިއުސް އިން ބުނީ އެފަދަ އަދަބެއް ދިނުމުން "ހަރުކަށި އިންޒާރެއް" ލިބޭ ކަމަށާއި ބޯޑަރާ ގުޅިފައިވާ ކުށް ކުރުން ވެސް މަދުވާ ކަމަށެވެ.
ނަމަވެސް ބައެއް ފަރާތްތަކުން ވަނީ އެކަމަށް ފާޑުކިޔާފަ އެވެ. ބެއިޖިން ނިއުސް އިން ބުނީ އެފަދަ އަދަބަކުން ގާނޫނުގެ ވެރިކަން ކުރުމުގެ ރޫހާ ހިލާފުވާ ކަމަށާއި އެކަން ތަކުރާރުވިޔަ ދީގެން ނުވާނެ ކަމަށެވެ.
ޖިންގްޝީ ސަރުކާރުގެ ވެބްސައިޓުގައިވާ ގޮތުން ގަވާއިދާ ހިލާފަށް ތަކެތި އެތެރެ ކުރުމާއި ހިޔުމަން ޓްރެފިކިންގެ ތުހުމަތު ކުރެވޭ މީހުން ވެސް ވަރަށް ފަހުން ގަންހިންގުވާފައި ވެ އެވެ.
މިދިޔަ ނޮވެމްބަރު މަހު އާއްމުވި ވީޑިއޯއެއްގައި ދެ މީހަކު ގަންހިންގުވާ މަންޒަރު ބަލަން ގިނަ ބަޔަކު ޖަމާވެފައި ތިއްބާ ފެނެ އެވެ. އޭގެ ކުރިން އޯގަސްޓް މަހު ވެސް އެފަދަ ވީޑިއޯއެއް އާޢްމުވި އެވެ.
