ކޮންމެ ސަރުކާރަކުން ވެސް ކޮށްދީފައިވާ ކަންކަމާ ޝަކުވާނުކޮށް ބަލައިގަންނަން ޖެހޭ ކަމަށް ޕްލޭނިން، ހައުސިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
ރާއްޖޭގެ ހުރިހާ ރަށެއްގައި ފެނާއި ނަރުދަމާގެ މަސައްކަތް ގާއިމް ކުރުމަށް ހަވާލު ކުރުމަށް ސްޓެލްކޯގައި މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން އަސްލަމް ވިދާޅުވީ ތަރައްގީގެ މަސައްކަތް ނިމެން އަދި ގާތް ވެސް ނުވާ ކަމަށެވެ.
މިނިސްޓަރު ވިދާޅުވީ ރާއްޖެއަކީ ތަރައްގީވަމުން އަންނަ ގައުމެއް ކަމަށާއި އެ ރާސްތާގައި ވަރަށް ދުރަށް އާދެވިފައިވާ ކަމަށެވެ. އަދި އެކަމުގައި އެކި ޒަމާންތަކުގައި ހިދުމަތްކޮށްދެއްވާ މިހިސާބަށް ގެނެސްދެއްވި ވެރިންނަށް ޝުކުރުވެރިވާން ޖެހޭ ކަމަށް ވެސް އޭނާ ވިދާޅުވި އެވެ.
"އަބަދު ޝަކުވާ, އެއީ އެންމެ ރަނގަޅު ގޮތެއް ނޫން. ޝަކުވާ ކުރަންވެސް ޖެހޭނެ. ނަމަވެސް ކުރެވުނު ކަންކަން ބަލައި ގަންނަން ޖެހޭނެ, އެއި ކޮންމެ ބަޔަކު ކުރި ކަމެއް ވިޔަސް،" އަސްލަމް ވިދާޅުވި އެވެ.
މިނިސްޓަރު ވިދާޅުވީ ކޮންމެ ބަޔަކު ކޮށްދޭ މަސައްކަތްތައް ވެސް ބަލައިގަންނަ ބަޔަކާއި ބަލައި ނުގަންނަ ބަޔަކު އުޅޭނެ ކަމަށެވެ. އަދި އެކަން އެނގިހުރެ އެއީ ނުވާ ކަމަކަށް ހަދާ ބަޔަކު ވެސް އުޅޭނެ ކަމަށެވެ.
ނަމަވެސް, އެ އެންމެންނާއެކު ވެސް މަސައްކަތްކޮށް އުޅެން ޖެހޭނެ ކަމަށް މިނިސްޓަރު ވިދާޅުވި އެވެ.
"އަޅުގަނޑުގެ ނަޒަރުގައި ރައީސް ސޯލިހްގެ ސަރުކާރަކީ ރައްޔިިތުންގެ އަޑު ކަނުލާ އަހާ ރައްޔިތުން އެދޭ ގޮތަށް ކަންކަން ކުރުމަށް އިޖާބަދޭ ސަރުކާރެއް،" މިނިސްޓަރު ވިދާޅުވި އެވެ.
މީގެ އިތުރުން މިނިސްޓަރު ވިދާޅުވީ އުޖާލާ މުސްތަގްބަލެއް ފެންނާނީ ކުރެވިފައި ހުރި ކަންކަން ދެނެގަނެ އެކަން ބަލައިގަނެ އޭގެ ފަހުރުވެރިކަމާއެކު ކުރިއަށް ދިނުމުގެ އުންމީދުގައި މަސައްކަތް ކުރުމުން ކަމަށެވެ.
މިއަދު ބޭއްވި އެ ހަފްލާގައި ޖުމްލަ ތިން ކުންފުންޏަކާ ހަވާލުކުރީ 23 ރަށުގެ ފެނާއި 16 ރަށެއްގެ ނަރުދަމާގެ ނިޒާމް ގާއިމްކުރުމަށެވެ. މި މަޝްރޫއުގެ ޖުމްލަ އަގަކީ 920 މިލިއަން ރުފިޔާ ކަމަށް ޕްލޭނިން މިނިސްޓްރީން ބުނެ އެވެ.
