އެއާ ޓްރެފިކް ކޮންޓްރޯލަރުން ރާއްޖޭގައި ތަމްރީނު ކުރެވޭނެ ގޮތަށް، މޯޅްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގައި ގާއިމު ކުރި "އޭސީޓީ ޓަވާ ސިމިއުލޭޓާ" އިއްޔެ ހުޅުވައިފި އެވެ.
ވެލާނާ އިންޓަނޭޝަނަލް އެއާޕޯޓުގައި ޓަވަރު ހިމެނޭ ސަރަހަދުގައި ހުންނަ އިމާރާތެއްގައި ގާއިމު ކޮށްފައިވާ ސިމިއުލޭޓާ ހުޅުވައި ދެއްވީ އެމްއޭސީއެލް ހިންގުމާ ހަވާލުވެ ހުންނެވި ޑެޕިއުޓީ ޗީފް އޮފިސަރު އިބްރާހިމް ތޯހާ އެވެ.
އިނގިރޭސި ވިލާތުގެ މައިކްރޯ ނޭވުން އުފައްދާފައިވާ ސިމިއުލޭޓާ ގާއިމުކޮށް ޓްރޭނިން ސެންޓަރެއް ހެދުމަށް ހަތަރު މިލިއަން ރުފިޔާ ހޭދެވެފައިވާއިރު، އެއާޓްރެފިކް ކޮންޓްރޯލަރުން ތަމްރީނު ކުރުމަށް ކުރަން ޖެހޭ ހޭދަ، އެތަނުގެ ސަބަބުން ވަރަށް ބޮޑުތަން ސަލާމަތް ކުރެވޭނެ ކަަމަށް އެމްއޭސީއެލް އިން ބުންޏެވެ.
"އެއާ ޓްރެފިކް ކޮންޓްރޯލަށް ބޭނުންވާ ވަރަށް ގިނަ ތަމްރީނުތައް މިތަނުން ދެނޭވެ. ކުރީގައި މީހުން ތަމްރީނު ކުރަން މި ފޮނުވަން ޖެހެނީ މެލޭޝިޔާ ސިންގަޕޫރު ފަދަ ގައުމުތަކަށް، މިހާރު މިތަނުގައި އެ ތަމްރީނުތައް ދެވޭނެ،" އޭސީޓީ އިންސްޓްރަކްޓާ އަހުމަދު ނަޒީރު ވިދާޅުވި އެވެ.
ވެލާނާ އެއާޕޯޓުގައި ހުންނަ އެއާ ޓްރެފިކް ކޮންޓްރޯލް ޓަވަރުގެ ތަޖުރިބާ ކުރެވޭ ގޮތަށް ސިމިއުލޭޓާ ގާއިމު ކޮށްފައި ވަނީ، ކްލާސް ރޫމާއި އަމަލީ ތަމްރީނުތައް ދެވޭ ސިސްޓަމްތައް ހިމެނޭ ގޮތަށެެވެ.
ނަޒީރު ވިދާޅުވި ގޮތުގައި މި ވަގުތު ވެސް 22 މީހުން ތަމްރީނު ކުރަން ޖެހިފައިވާއިރު، މީހުން ތަމްރީނު ކުރުމުގެ އެކި ފެންވަރުގެ ކޯސްތައް މުޅި އަހަރަށް ބަހާލައިގެން ޖެނުއަރީ މަހުގެ ފަހުކޮޅު ފެށޭނެ އެވެެ.
ރާއްޖޭގެ 17 އެއާޕޯޓެއްގައި 70 ވަރަކަށް އެއާ ޓްރެފިކް ކޮންޓްރޯލަރުން މަސައްކަތް ކުރަމުން ގެންދެ އެވެ. ހުރިހާ އެއާޕޯޓު ތަކެގައި ވެސް އެއާ ޓްރެފިކް ކޮންޓްރޯލް ހިދުމްތް ދެމުން ގެންދަނީ އެމްއޭސީއެލް އިން ނެވެ.
