ފަޅު ހިއްކައިގެން މާފުށްޓަށް އިތުރުކުރި ބިމަކީ، މީހުން ދިރިއުޅޭ ރަށަކަށް ރަށާ ވަކިން ހިއްކައިގެން އިތުރުކުރި ފުރަތަމަ ބިން ކަމަށާއި މި ކޮންސެޕްޓަށް މާފުށީ ރައްޔިތުން ރުހި ގަބޫލުވުމަކީ އެ ރަށު ރައްޔިތުންގެ ދުރު ވިސްނުން ފެންނަ ކަމެއް ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
"މިއީ ފުރަތަމަ ފަހަރަށް ރަށާ ވަކިން، ނުގުޅި، ގޮނޑުދޮށްތައް އެއީ ހިއްކުމުގެ ބައެއް ގޮތުގައި ކަނޑައަޅައި އަޅުގަނޑުމެން ހިއްކި ރަށް. މިގޮތަށް އާންމުކޮށް އަޅުގަނޑުމެން މީގެ ކުރިން ހިއްކާފަ ހުންނާނީ ރިސޯޓުހަދާ ރަށްތައް އެކަނި" ހިއްކި ބިން ކައުންސިލާ ހަވާލުކުރަން އިއްޔެ ބޭއްވި ރަސްމިއްޔާތުގައި އަސްލަމް ވިދާޅުވި އެވެ.
މި ޕްރޮޖެކްޓްގެ ދަށުން 20 ހެކްޓަރުގެ ބިމެއްވަނީ މާފުއްޓާ ވަކިން ޕިކްނިކް އައިލެންޑެއްގެ ގޮތުގައި ވެސް ހިއްކާފަ އެވެ. ރަށާއި ވަކިން މި ޑިޒައިނަށް ޕިކްނިކް އައިލެންޑު ހިއްކުމުގެ ސަބަބަކީ ރިސޯޓެއްގައި ހުންނަންޖެހޭ ހުރިހާ ސިފައެއް މި ރަށުގައި ގާއިމްކުރުމުގެ މަގުފަހިކޮށްދިނުން ކަމަށްވެސް އަސްލަމް ވިދާޅުވި އެވެ.
ބިން ހިއްކުމަކީ މިހާރު ވަރަށް ފަސޭހަކަމެއްކަން ފާހަގަކުރައްވާ އަސްލަމް ވަނީ މާފުށީ ރައްޔިތުންނަށް ވީހާވެސް އަވަހަށް ބިން ފެހި ކުރުމުގެ މަސައްކަތް ފެށުމަށް އިލްތިމާސްކުރައްވާފަ އެވެ. ވަޔާއި ކަނޑުގެ ރާޅުތަކުގެ ސަބަބުން ރަށް ގިރުން ހުއްޓުވުމަށްޓަކައި ވީ އެންމެ އަވަހަކަށް މަގޫ އާއި ފިތުރޯނުފަދަ ފަސޭހައި ހެދޭގަސްތައް އެ ސަރަހައްދުގައި އިންދުމަށް އަސްލަމް ގޮވާލެއްވި އެވެ.
