ދައުލަތުން ހަރަދުކޮށްގެން ހިއްކާ ބިންތަކުގެ މަގުތަކާއި އާއްމުތަންތަން ކަނޑާފައި ބާކީ އޮންނަ ބައިގެ 35 ޕަސެންޓް ބޭނުންކުރާނެ ގޮތް ކަނޑައަޅައި އެކަން ތަންފީޒުކުރުމުގެ ބާރު ޕްލޭނިން މިނިސްޓްރީއަށް ލިބޭ ގޮތަށް ގާނޫނު ބަދަލުކުރަން ރައްޔިތުންގެ މަޖިލީހަށް ބިލެއް ހުށަހަޅަން ތައްޔާރުވެއްޖެ އެވެ.
ރައްޔިތުންގެ މަޖިލީހުގެ މާފަންނު މެދު ދާއިރާގެ އެމްޑީޕީ މެމްބަރު އިބްރާހީމް ރަޝީދު (ބޮންޑޭ) ޑްރާފްޓްކުރައްވެވި ބިލުގައި އޮތީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 2-56 ވަނަ މާއްދާއަށް އަކުރެއް އިތުރުކޮށް، ހިއްކި ބިންތަކުން ބައެއް، ކައުންސިލްތަކުގެ އިހުތިސާސުން އިސްތިސްނާ ކުރުމަށެވެ.
އެ މާއްދާގެ (ބ)ގައި ގައިވާ ގޮތުން ރަށެއް ނުވަތަ ސިޓީއެއްގެ ބިން ބޭނުންކުރަންވާނީ އެ ރަށެއްގެ ނުވަތަ ސިޓީއެއްގެ ކައުންސިލުން އެކުލަވާލާ ރަށުގެ ނުވަތަ ސިޓީގެ ތަރައްގީގެ ޕްލޭނާއި، އެ ކައުންސިލުން ހަދާ، ކަމާގުޅުންހުރި ގައުމީ އިދާރާއިން ފާސްކުރާ އެ ރަށެއް ނުވަތަ ސިޓީއެއްގެ ލޭންޑް ޔޫސް ޕްލޭނާ އެއްގޮތްވާ ގޮތުގެމަތިންނެވެ.
އެ މާއްދާގެ (ބ-1) ގެ ގޮތުގައި އިތުރުކުރަން ބޮންޑޭގެ ޑްރާފްޓްގައި އޮތީ ދައުލަތުގެ ބަޖެޓުން ހަރަދުކޮށްގެން ހިއްކާފައިވާ ބިންތަކުގެ ތެރެއިން މަގުތަކަށާއި އާންމު ސަރަހައްދުތަކަށް ނެގުމަށްފަހު، ސިޓީ ކައުންސިލަށް ނުވަތަ ރަށު ކައުންސިލަށް އިތުރު ބަދަލެއް ދިނުމަކާ ނުލައި ބާކީއޮންނަ ބިމުގެ 35 ޕަސެންޓް ބިން ބޭނުންކުރާނެ ގޮތް ކަނޑައަޅައި، އެ ކަންކަން ތަންފީޒުކުރުމުގެ ފުރިހަމަ ބާރު ލިބިގެންވަނީ ގައުމީ އިދާރާއަށެވެ. އެގޮތުން ގޯތި ދޫކުރުން ނުވަތަ ގެދޮރުވެރިކުރުވުމުގެ މަޝްރޫއުތައް ހިންގުމަށާއި ވިޔަފާރި މަސައްކަތްކުރުމަށް ނުވަތަ އެހެންވެސް ބޭނުންތަކަށް އެ ބިން ބޭނުންކުރެވިދާނެ ކަމަށެވެ.
އިސްލާހު ހުށަހަޅުއްވަން ނިންމެވި މެންބަރު އިބްރާހިމް ރަޝީދު --
މެމްބަރު އިބްރާހީމް ރަޝީދު "އަދަދު"އަށް މިއަދު ވިދާޅުވީ ލާމަރުކަޒީ ގާނޫނަށް އެ ބަދަލު ގެންނަން ޖެހެނީ، ހުޅުމާލެއާއި ގުޅިފަޅުން ވެސް އިތުރަށް ގޯތި ދޫކުރަން އުޅޭ އިރު، ގުޅިފަޅުގައި އޮންނަ އާބާދީ އަނެއްކާވެސް ކޯޕަރޭޝަނެއްގެ ދަށުގައި ތިބެން ޖެހިދާނެތީ އެވެ.
"މި ބަދަލާއެކު ގުޅިފަޅަކީ ވެސް މާލޭގެ އިންތިހާބީ ދާއިރާއަކަށް ވެސް ވާން ޖެހޭނެ ކަމަށް އަަޅުގަނޑު ދެކެނީ، ބިލު ހުށަހެޅުމާ ބެހޭ ގޮތުން ޕްލޭނިން މިނިސްޓަރު އަސްލަމާ ވެސް އަޅުގަނޑު ވާނީ މަޝްވަރާކޮށްފައި،" އޭނާ ވިދާޅުވި އެވެ.
ލާމަރުކަޒީ ގާނޫނުގެ ދަށުން މާލޭ ސިޓީ ކައުންސިލްގެ ދަށުގައި އޮންނަން ޖެހޭ ބައެއް ސަރަހައްދުތައް ކައުންސިލާ ހަވާލުނުކޮށްގެން މިހާރު ވެސް ވަނީ ބޮޑެތި މައްސަލަތައް އުފެދިފަ އެވެ. އެފަދަ ބައެއް މައްސަލަތައް މިހާރު ވަނީ ޝަރީއަތުގެ މަރުހަލާގަ އެވެ.
