މި ސަރުކާރުން ކުރިއަށް ގެންދަން ނިންމާފައިވާ ފެނާއި ނަރުދަމާގެ ބޮޑު މަޝްރޫއު ބަޔަކާ ހަވާލުކުރަނީ ދައުލަތަށް 150 މިލިއަން ރުފިޔާގެ ގެއްލުން ލިބޭ ގޮތަށް ކޮރަޕްޝަންގެ ތެރެއިން ކަމަށް ބުނެ, އެންޓި ކޮރަޕްޝަން ކޮމިޝަން (އޭސީސީ) އަށް މައްސަލައެެއް ހުށަހަޅައިފި އެވެ.
އެ މަޝްރޫއުއަކީ 10 ރަށެއްގައި ފެނާއި ނަރުދަމާގެ ނިޒާމް އަދި ހަތަރު ރަށެއްގައި ފެނުގެ ނިޒާމް ގާއިމްކުރުމަށް ސަރުކާރުން ކުރިއަށް ގެންދާ މަޝްރޫއުއެކެވެ. ޕްލޭނިން މިނިސްޓްރީން މަޝްރޫއުގެ ބީލަން ހުޅުވާލުމުން އަޒްރޯވާ މޯލްޑިވްސް ކުންފުނީގެ ފަރާތުން ވަނީ އަށް ރަށެއްގެ މަސައްކަތަށް އެންމެ ކުޑަ އަގު ހުށަހަޅާފަ އެވެ.
ނަމަވެސް, ޕްލޭނިން މިނިސްޓްރީން މަޝްރޫއު ހަވާލުކުރަން ނިންމީ އޭގެ ދެ ގުނަ އަގު ބޮޑުކޮށް ހުށަހެޅި ކުންފުންޏަކަށްކަން ވަނީ އެނގިފަ އެވެ. އެހެންވެ, މަޝްރޫއުއާ ގުޅޭ ޝަކުވާ އޭސީސީއަށް ހުށަހެޅީ އަޒްރޯވާ މޯލްޑިވްސްގެ ފަރާތުންނެވެ.
އެ ކުންފުނީގެ ފަރާތުން އޭސީސީއަށް ހުށަހެޅި މައްސަލާގައި ބުނެފައިވާ ގޮތުގައި, ދެ ކުންފުނިން ހުށަހެޅި އަގުތަކުގެ ފަރަގަށް ބަލާއިރު މިހާރު ނިންމާފައިވާ ގޮތަށް މަޝްރޫއު އެވޯޑްކޮށްފިނަމަ ދައުލަތަށް 150 މިލިއަން ރުފިޔާގެ ގެއްލުންވާނެ އެވެ. އެއީ ގާތްގަނޑަކަށް އިތުރު ހަ ރަށެއްގައި ފެނާއި ނަރުދަމާގެ ނިޒާމް ގާއިމްކުރެވޭހާ ފައިސާ އެވެ.
މަސައްކަތުގެ ބިޑަށް ދެ ކުންފުނިން ހުށަހެޅި އަގާއި އޭގެ ފަރަގު --
އަޒްރޯވާ މޯލްޑިވްސް ކުންފުނިން ދަށް އަގެއް ހުށަހެޅި ނަމަވެސް, ބިޑު ކާމިޔާބުނުވި ސަބަބެއް ކަމަށް ނޭޝަނަލް ޓެންޑާ ބޯޑުން ބަޔާންކޮށްފައިވަނީ މަސައްކަތުގެ ތަޖުރިބާ ނެތުމެވެ.
ނަމަވެސް, އެ ކުންފުނިން ބުނި ގޮތުގައި އެކަން ކަނޑައަޅާފައިވަނީ ބީލަން ފޮތުގައި ބަޔާންކޮށްފައިވާ ކްރައިޓީރިއާގެ ބޭރުން މާލިއްޔަތު ގަވާއިދާ ހިލާފަށެވެ. އޭގެއިތުރުން އެ ފަރާތަށް ބިޑު ކާމިޔާބުވިޔަ ނުދިނުމަށްޓަކައި ތަފާތުކޮށް އަމަލުކޮށްފައިވާ ކަމަށް ވެސް ވަނީ ތުހުމަތުކޮށްފަ އެވެ.
އެގޮތުން ބިޑު އެވޯޑްކުރަން ނިންމާފައިވާ ކުންފުނީގެ މަސައްކަތުގެ ތަޖުރިބާ ވެރިފައި ކުރުމަށްޓަކައި މީރާ އަދި އެހެން އިދާރާއެއްގައި ސުވާލެއް ވެސް ކޮށްފައިނުވާ ކަމަށް ވަނީ ތުހުމަތުކޮށްފަ އެވެ. އަދި އެ ކުންފުނިން ރިސޯޓެއްގައި ފެނާއި ނަރުދަމާގެ މަސައްކަތް ކުރި ކަމަށް ބުނާއިރު އެ މަސައްކަތް ކޮށްފައިވޭތޯ ވެސް ބަލާފައިނުވާ ކަމަށެވެ.
"...އެހެންކަމުން މަސައްކަތަށް ޝަރުތު ހަމަވާ އެންމެ ކުޑަ އަގު ހުށަހެޅި ފަރާތަކީ އަޅުގަނޑުމެން ކަމުގައި ވެފައި އަޅުގަނޑުމެން ޑިސްކޮލިފައި ކުރުމަށްޓަކައި މަގާމުގެ ބޭނުން ކޮށްގެން ހިފެން ހުރި ހުރިހާ ޓޫލެއްގައި ވަނީ ހިފާފައި," އޭސީސީއަށް ފޮނުވި ސިޓީގައިވެ އެވެ.
އެހެންވެ, މިކަމުގައި ކޮރަޕްޝަންގެ އަމަލެއް ހިނގާފައިވާ ކަމަށް ގަބޫލުކުރަން ޖެހޭ ސަބަބުތަކެއް ހުރުމުން އެކަން ތަހުގީގުކޮށްދޭން ވަނީ އެދިފަ އެވެ. އަދި, މިއަދު މަޝްރޫއު އެވޯޑްކުރުމަށް މަސައްކަތް ކުރަމުންދާތީ އެ ޕްރޮސެސް ވަގުތީ ގޮތުން ހުއްޓާލުމުގެ އަމުރެއް ނެރެދިނުމަށް ވެސް ވަނީ އެދިފަ އެވެ.
