މެންޗެސްޓާ (ޑިސެމްބަރު 27) - މެންޗެސްޓާ ޔުނައިޓަޑަށް ކުޅެމުންދާ ފްރާންސްގެ ފޯވަޑް އެންތަނީ މާޝިއާލް އެ ކްލަބު ދޫކޮށްލަން ބޭނުންވާކަން އަންގާފައިވާ ކަމަށް އެ ކްލަބުގެ ކޯޗު ރަލްފް ރަންގްނިކް ބުނެފި އެވެ.
ރަންގްނިކް ބުނީ މާޝިއާލް ،26، އާއެކު ބުދަ ދުވަހު ބޭއްވި ބައްދަލުވުމުގައި، އޭނާގެ މުސްތަގްބަލާމެދު ވަރަށް ދިގުކޮށް ވާހަކަދެއްކި ކަމަށެވެ. އަދި ޔުނައިޓަޑް ދޫކޮށްލަން ބޭނުންވާ ކަމަށާއި މިއީ "ބަދަލެއް ގެންނަން އެންމެ ރަނގަޅު ވަގުތު:" ކަމަށް މާޝިއާލް ބުނި ކަމަށެވެ.
މި ސީޒަންގެ ޕްރިމިއާ ލީގުގައި ޔުނައިޓަޑްގެ ފުރަތަމަ 11 ގައި މާޝިއާލް ކުޅުނީ ދެ މެޗެވެ. އޭނާ ވަނީ ލީގުގައި އެއް ލަނޑު ޖަހައިފަ އެވެ. މި ސީޒަންގައި މާޝިއާލް ކުޅެފައިވަނީ 10 މެޗުގަ އެވެ.
ރަންގްނިކް ބުނީ ޔުނައިޓަޑްގެ ދޫކޮށްލަން މާޝިއާލް ބޭނުންވިޔަސް، އޭނާ އަށް އަދި ރަސްމީކޮށް ހުށަހެޅުމެއް ނުލިބޭ ކަމަށެވެ.
ޖެނުއަރީ މަހުގެ ޓްރާންސްފާގައި އެހެން ކްލަބަށް ބަދަލުވާން މާޝިއާލް ބޭނުންވާކަމަށް އޭނާގެ އެޖެންޓް ވެސް ވަނީ ކުރިން ބުނެފަ އެވެ.
ރަންގްނިކް ބުނީ މާޝިއާލް ކްލަބު ދޫކޮށްލަންޖެހޭ ސަބަބު އޭނާ އަށް ގަބޫލްކުރެވޭ ކަމަށެވެ. އެކަމަކު ޖެނުއަރީ މަހު އެއްވެސް ހުށަހެޅުމެއް މާޝިއާލް އަށް ނުލިބިއްޖެ ނަމަ، އޭނާ ޔުނައިޓަޑްގައި މަޑުކުރާނެ ކަމަށެވެ. -- ބީބީސީ
