ރިޔާދް، ސައުދީ އަރަބިއްޔާ (ޑިސެމްބަރު 26) - ސައުދީ އަރަބިއްޔާ އިން ޔަމަނުގެ ހޫތީންނާ ދެކޮޅަށް ހިންގާ ވައިގެ އަސްކަރީ ކެމްޕެއިން ވަރުގަދަކޮށް، ސަނާގައި ހުންނަ ހަނގުރާމަވެރިންގެ ކޭމްޕަކަށް ބޮން އަޅައިފި އެވެ.
ސައުދީ އަރަބިއްޔާގެ އަސްކަރީ ކޯލިޝަނުން ބުނީ ވައިގެ ހަމަލާތަކުގައި ހަތިޔާރު ގުދަންތައް ސުންނާފަތިކޮށްލާފައިވާ ކަމަށެވެ.
"ސަނާގައި ހިންގި އޮޕަރޭޝަނަކީ އެ ތަނުގައި ހުންނަ އަލް ތަޝްރިފާތު ކޭމްޕުން ހަތިޔާރު ނެރެން މަސައްކަތް ކުރުމުން ހިންގި އޮޕަރޭޝަނެއް،" ސައުދީ އަރަބިއްޔާގެ ބަޔާނެއްގައި ބުންޏެވެ.
އިރާނުގެ އެއްބާރުލުމާ އެކު އުޅޭ ލުބްނާންގެ ޝިއައީ ހިޒްބުﷲ ޖަމާއަތުގެ އަސްކަރީ ގޮފިން ޔަމަން ހަނގުރާމައިގައި ބައިވެރިވާކަން އަންގައިދޭ ހެކި ލިބިފައިވާ ކަމަށޤ ސައުދީ އަރަބިއްޔާ އިން ބުނެ އެވެ.
ހޫތީންނަށް ހަތިޔާރު ފޯރުކޮށްދޭކަމުގެ ތުހުމަތު ސައުދީ އަރަބިއްޔާ އިން އިރާނަށް ކުރެ އެވެ. އަދި ހޫތީ ހަނގުރާމަވެރިން ތަމްރީން ކުރަނީ ހިޒްބުﷲ އިން ކަމަށް ތުހުމަތުކުރެ އެވެ. ނަމަވެސް އިރާނުން އެ ތުހުމަތުތައް ދޮގުކުރެ އެވެ.
ހޫތީންނާއި ޔަމަނުގެ ގާނޫނީ ސަރުކާރާ ދެމެދު 2014 ވަނަ އަހަރުން ފެށިގެން އަންނަނީ ހަނގުރާމަ ކުރަމުންނެވެ. ސައުދީ އަރަބިއްޔާ އިން ޔަމަނުގެ ގާނޫނީ ސަރުކާރުގެ އެދުމަށް ހަނގުރާމައިގެ ތެރެއަށް ވަނީ 2015 ވަނަ އަހަރު އެވެ.
ހަނގުރާމައިގައި އެތައް ހާސް ބަޔަކު މަރުވެ އެތައް މިލިއަން ބަޔަކު ހާލުގައި ޖެހިފައި ވާއިރު، ހޫތީން އަންނަނީ ސައުދީ އަރަބިއްޔާގެ ފަސްގަނޑަށް ވެސް ހަމަލާތައް އަމާޒު ކުރަމުންނެވެ.
އެގޮތުން ހޮނިހިރު ދުވަހު ދިން ހަމަލާއެއްގައި ސައުދީ އަރަބިއްޔާ އިން ދެ މީހުން މަރުވި އެވެ. އެއީ ތިން އަހަރަށް ފަހު ހޫތީންގެ ހަމަލާއެއްގައި ބަޔަކު މަރުވި ފުރަތަމަ ފަހަރެވެ.
