ގދ. މަޑަވެއްޔާ އެއް ފަޅެއްގައި އޮންނަ ހާދޫ އެ ރަށުގެ އިހުތިސޯސްގެ ތެރޭގައި ހިމަނައިދިނުމަށް އެދި ރައީސް އިބްރާހީމް މުހައްމަދު ސޯލިހަށް ދަންނަވައިފި އެވެ.
ރައީސް އޮފީހަށް އެ ސިޓީ ފޮނުވާފައި ވަނީ ދާއިރާގެ މެންބަރު ހުސެއިން ފިރުޝާނެވެ.
ރައީސަށް ފޮނުއްވި ސިޓީގައި ބުނީ މަޑަވެއްޔަކީ ބިމުގެ ދަތިކަން ކުރިމަތިވެފައިވާ ރަށެއް ކަމަށް ވާތީ ރަށުގައި ތިބެގެން އާމްދަނީ ހޯދޭނެ ވަސީލަތްތަކާއި ކައުންސިލަށް އާމްދަނީ ހޯދުމަަށް ކުރެވޭނެ މަސައްކަތް ވެސް މަދު ކަމަށެވެ.
ހާދޫގައި ކުރެވޭނެ މަސައްކަތްތައް ހުރުމާއެކު އެ ރަށުން ލިބޭނެ މަންފާއިން މަޑަވެއްޔަށް ފައިދާވނެތީ އެ ރަށް ދިނުމަށް އެދުނީ ކަމަށް ސިޓީގައި ފިރުޝާން ވިދާޅުވެފައިވެ އެވެ.
"ހާދޫގައި ލޯކަލް ޓޫރިޒަމާއި ދަނޑުވެރިކަމާއި މަސް ކެއްކުމާއި ހިއްކުމުގެ އިތުރުން ހުއިފިލަނޑާ ދިރުވާ އާލާކުުރުން ފަދަ އިގްތިސާދީ އަދި ސިނާއީ ގިނަ މަސައްކަތްތަކެއް ކުރެވި އެކަމުގެ މަންފާ ދެ ރަށަށް ލިބޭނެ،" ފިރުޝާން ވިދާޅުވެފައިވެ އެވެ.
މީގެ އިތުރުން ފިރުޝާން ވިދާޅުވީ ހާދޫ އާއި މަޑަވެލި، ހޯޑެއްދޫ ކޯޒްވޭއިން ގުޅާފައި އޮތްއިރު ހާދޫއަކީ މެދަށް އޮންނަ ރަށް ކަމުން އެ ރަށަކީ ހޯޑެއްދޫ އާއި މަޑަވެލީގެ އިހްތިސޯސަށް ވެސް އަރައި ރަށެއް ކަމަށެވެ.
މަޑަވެއްޔާއި ހޯޑެއްދޫއާ ދެމެދު ކުރިން ކޯޒުވޭއެއް އޮތެވެ. ނަމަވެސް, އެ ކޯޒުވޭ ބަޔަކު ނުކުމެ ކަނޑާލީ އެވެ. އޭގެފަހުން އަލުން ކޯޒުވޭއެއް އެޅުމަށް އެމްޓީސީސީއާ ވަނީ ހަވާލުކޮށްފި އެވެ.
އެ އެއްބަސްވުމުގެ ދަށުން، 223 މީޓަރުގެ ކޯޒްވޭއަކުން ގދ. މަޑަވެއްޔާއި ގދ. ހާދޫ ގުޅުވައިލުމުގެ އިތުރުން، 160 މީޓަރުގެ ކޯޒްވޭއަކުން ހާދޫ އާއި ހޯޑެއްދޫ ގުޅުވައިލުން ހިމެނޭ ކަމަށެވެ. އޭގެ އިތުރުން 262 މީޓަރުގެ މަގު ހެދުން ހިމެނޭ ކަމަށާއި 65 މީޓަރުގެ ހަތަރު ރިވެޓްމެންޓް (ޖުމުލަ 260 މީޓަރު) ގާއިމު ކުރުން ވެސް ހިމެނެ އެވެ.
މިއީ 84،170،699.20ރ. ގެ މަޝްރޫއެއް ކަމަށާއި މަސައްކަތް ނިންމައި ހަވާލުކުރަން އެމްޓީސީސީއަށް 300 ދުވަހުގެ މުއްދަތު ވަނީ ދީފަ އެވެ.
