ސަނާ، ޔަމަން (ޑިސެމްބަރު 25) - ޔަމަނުގެ ހޫތީން ސައުދީ އަރަބިއްޔާ އަށް ފޮނުވި ޕްރޮޖެކްޓައިލް ހަމަލާތަކެއްގައި ދެ މީހުން މަރުވެއްޖެ އެވެ.
ހޫތީންނާއި ޔަމަނުގެ ގާނޫނީ ސަރުކާރާ ދެމެދު 2014 ވަނަ އަހަރުން ފެށިގެން އަންނަނީ ހަނގުރާމަ ކުރަމުންނެވެ. ސައުދީ އަރަބިއްޔާ އިން ޔަމަނުގެ ގާނޫނީ ސަރުކާރުގެ އެދުމަށް ހަނގުރާމައިގެ ތެރެއަށް ވަނީ 2015 ވަނަ އަހަރު އެވެ.
ސައުދީ އަރަބިއްޔާ އިން ހޮނިހިރު ދުވަހު ބުނީ ޔަމަނާ ގުޅޭ ބޯޑަރު ކައިރީގައި އޮންނަ ޖަޒަން ސަރަހައްދުގައި ދިން ޕްރޮޖެކްޓައިލް ހަމަލާގައި މަރުވީ ސައުދީ ރައްޔިތަކާއި ޔަމަނުގެ ރައްޔިތެއް ކަމަށެވެ. އެ ހަމަލާގައި ހަތް މީހުންނަށް އަނިޔާވި އެވެ.
"މައި މަގުގައި ހުންނަ ފިހާރައެއްގެ ތެރެއަށް ވެއްޓުނު އަސްކަރީ ޕްރޮޖެކްޓައިލެއްގެ ސަބަބުން ދެ މީހުން މަރުވި،" ސައުދީ އަރަބިއްޔާ އިން ނެރުނު ބަޔާނެއްގައި ބުންޏެވެ.
އަނިޔާވި ހަތް މީހުންގެ ތެރޭގައި ހިމެނެނީ ސައުދީ އަރަބިއްޔާގެ ހަ ރައްޔިތުންނާއި ބަންގްލަދޭޝްގެ ރައްޔިތެކެވެ.
ސައުދީ އަރަބިއްޔާގެ އެއާޕޯޓުތަކާއި ތެލުގެ އިންފްރާސްޓްރަކްޗާ އަށް އަމާޒުކޮށް ހޫތީން ގަވާއިދުން މިސައިލާއި ޑްރޯން ހަމަލާ ފޮނުވަ އެވެ. ނަމަވެސް މިއީ ގިނަ މަސްތަކަކަށް ފަހު ހޫތީންގެ ހަމަލާއެއްގައި ސައުދީ އިން ބަޔަކު މަރުވި ފަހަރެވެ.
