ލަންޑަން (ޑިސެމްބަރު 25) - އިނގިރޭސި ޕްރިމިއާ ލީގުގެ ކްލަބްތަކާ އެކު ލީގުގެ ބޯޑުން ބޭއްވީ އެއްވެސް ބޭނުމެއް ނުހިފޭ ބޭކާރު ބައްދަލުވުމެއް ކަމަށް ޓޮޓެންހަމް ހޮޓްސްޕާސްގެ އިޓަލީ ކޯޗު އެންޓޯނިއޯ ކޮންޓޭ ބުނެފި އެވެ.
ކޮވިޑް-19ގެ ސަބަބުން މި ދުވަސްވަރު އިނގިރޭސި ޕްރިމިއާ ލީގުގެ ގިނަ މެޗުތަކެއް ފަސްކުރަން ޖެހޭތީ ލީގު ކުރިއަށްދާއިރު އަމަލުކުރާނެ ގޮތެއް ކަނޑައަޅަން ލީގުގެ ބޯޑުން ވަނީ ބުރާސްފަތި ދުވަހު ލީގުގެ ކްލަބްތަކާ ބައްދަލުކޮށްފަ އެެވެ. ކޮވިޑް-19ގެ ސަބަބުން މި މަސް ތެރޭ ޖުމްލަ އެއްކޮށް ޕްރިމިއާ ލީގުގެ 13 މެޗެއް ވަނީ ފަސްކޮށްފަ އެވެ. އެންމެ ފަހުން ފަސްކުރީ މި ހަފްތާގައި އެވަޓަން އާއި ބާންލީ ކުޅެން އޮތް މެޗެވެ.
ޕްރިިމިއާ ލީގުން ކްލަބްތަކާ އެކު ބޭއްވި ބައްދަލުވުން ކޮންޓޭ ސިފަކުރީ "ބޭކާރު ވަގުތުތަކެއް"ގެ ގޮތުގަ އެވެ. އެހެންވެ، އޭނާ ނިންމީ އެ ބައްދަލުވުމުގެ ވާހަކަ މީޑިއާގައި ނުދައްކަން ކަމަށެވެ.
"އަހަރެން އެ ބައްދަލުވުމުގެ ވާހަކަ ދައްކަން ނެތިން. އެ ބައްދަލުވުމުގައި ކަން ހިނގި ގޮތަށް ބަލާއިރު، މަންޒަރުތައް ސިފަވީ އަހަރެމެން ވާހަކަ ދައްކަން ޖެހުނީ ފާރަކާ ހެން. އެއީ ކްލަބްތަކާ ބައްދަލުކުރަން އައިއިރު ވެސް ހުރިހާ ކަމެއް ނިންމާފައި އޮތީ. ބައްދަލުވުމަކީ ދައްކާލުމަށް ބޭއްވި ކަމެއް،" ކޮންޓޭ ބުންޏެވެ.
"ބައެއް ކޯޗުން ވާހަކަ ދައްކައި ހައްލުތަކެއް ހޯދަން ލަފާދޭން މަސައްކަތް ކުރި. އެކަަމަކު، އެއީ ލީގަށް އެއްވެސް ބޭނުންތެރި ކަމެއްގެ ގޮތުގައެއް ނޫން ފެނުނީ،"
ކްލަބްތަކާ އެކު ބޭއްވި ބައްދަލުވުމުގައި ކޮންޓޭ އެއްވެސް ހިޔާލެއް ހުށަހަޅާފައިވޭތޯ ބަލަން ބީބީސީ ސްޕޯޓްސް އިން ކުރި މަސައްކަތުގައި އަލި މަގެއް ނުފެނުނެވެ. އެ ސުވާލުތަކަށް ލީގު ބޯޑުގެ ޖަވާބެއް ނުލިބުނެވެ.
ކްލަބްތަކާ އެކު ޕްރިމިއާ ލީގުން ބޭއްވި ބައްދަލުވުމުގައި އަންގާފައިވަނީ ކުރިއަށް އޮތްތަނުގައި މެޗުތައް ލަސްކުރުމުގައި އަމަލުކުރަން ނިންމާފައިވަނީ ޔުއެފާ ޕްރޮޓޮކޯލަށް ކަމަށެވެ. ޔުއެފާ އިން އަމަލުކުރަމުން އަންނަ އުސޫލުގައިވާ ގޮތުން މަދުވެގެން 13 ކުޅުންތެރިން، ކީޕަރެއް ހިމެނޭ ގޮތަށް ކޮވިޑް-19 އަށް ޕޮޒިޓިވް ނުވެ، ޓީމެއްގައި ފިޓްކޮށް ހުރެފިނަމަ ޝެޑިއުލްގައިވާ މެޗު ކުޅެން ޖެހޭނެ އެވެ. އެކަމަކު، ކޮވިޑް ކޭސްތައް ގިނަ ކްލަބެއްގައި ފުރަތަމަ ޓީމުގައި ރަޖިސްޓްރީކޮށްފައިވާ ކީޕަރެއް ނެތިއްޖެ ހާލަތެއްގައި ނޫނީ ފިޓްކޮށް ތިބި 13 ކުޅުންތެރިން ވެސް އެ ޓީމެއްގައި ހަމަނުވާނަމަ މެޗު ޖެހޭނީ ފަސްކުރާށެވެ.
