އަންނަ މަހުން ފެށިގެން ހަތަރު ފުރޮޅުލީ އުނޅަދުތައް ދުއްވާއިރު ސީޓް ބެލްޓް އެޅުން މަޖުބޫރުވާނެ ކަމަށް ޓްރާންސްޕޯޓު މިނިސްޓްރީން ބުނެފި އެވެ.
ޓްރާސްޕޯޓް މިނިސްޓްރީން ބުނީ އެއްގަމު އުނޅަދު ދުއްވުމުގެ އާންމު ގަވާއިދުގެ 19 ވަނަ މާއްދާގައިވާ ފަދައިން 30 ކިލޯމީޓަރަށް ވުރެ ބާރަށް ދުއްވާ މަގުތަކުގައި ހަތަރު ފުރޮޅުލީ އުނޅަދުތައް ދުއްވާއިރު ޑްރައިވަރުގެ އިތުރުން އުނޅަދުގެ ކުރީ ސީޓުގައި އިންނަ މީހާ ސީޓްބެލްޓް އެޅުމަށް އަންގާ ކަމަށެވެ.
އަދި އެ އެންގުމަށް ޖަނަވަރީ ފުރަތަމަ ދުވަހުން ފެށިގެން އަމަލު ކުރުމަށްވެސް ވަނީ އަންގާފަ އެވެ. އެ މިނިސްޓްރީން ވަނީ ހަތަރުފުރޮޅުލީ އުނޅަދު ދުއްވާ މީހުން އެ އެންގުމަށް ތަބާވުމަށް ވެސް އިލްތިމާސްކޮށްފަ އެވެ.
ބޭރު ގައުމުތަކުގައި ވެސް ހައިވޭތަކުގައި ދުއްވާ އިރު ކާރުގެ ކުރީގައި ތިބޭ މީހުން ސީޓް ބެލްޓް އެޅުން އޮންނަނީ މަޖުބޫރުކޮށްފަ އެވެ.
