އޮމިކްރޯން ވޭރިއެންޓާ ގުޅިގެން މީހުން ބަލިވުން ކުޑަ ނަމަވެސް ކަންބޮޑުވުންތަކެއް އެބަ ހުރި ކަމަށް މިހާތަނަށް ހެދި ދިރާސާތަކުން ދައްކައިފި އެވެ.
އޮމިކްރޯންއާ ގުޅިގެން އެންމެ ފުރަތަމަ ހެދި ދިރާސާތައް ޝާއިއު ކުރީ ދެކުނު އެފްރިކާ އާއި އިނގިރޭސިވިލާތުގަ އެވެ.
އެ ދިރާސާތަކުން އެނގުނު ގޮތުގައި އެހެން ވޭރިއެންޓުތަކާ އަޅާ ބަލާއިރު، އޮމިކްރޯން ވޭރިއެންޓާ އެކު ކޮވިޑަށް ޕޮޒިޓިވްވާ މީހުންގެ ތެރެއިން ހޮސްޕިޓަލުގައި ފަރުވާ ހޯދަން ޖެހޭ މީހުންގެ އަދަދު މަދެވެ.
ނަމަވެސް އޮމިކްރޯން "މައިލްޑުވުން" ނުވަތަ ބަލިވާ މިންވަރު ކުޑަ ނަމަވެސް، ކޭސްތައް އިތުރުވާ ނަމަ ހޮސްޕިޓަލްތަކަށް ބާރު ބޮޑުވެދާނެ ކަމާ މެދު ކަންބޮޑުވުން އެބަ އޮތެވެ.
ސްކޮޓްލެންޑުގައި ކުރިއަށް ގެންދިޔަ ދިރާސާއަކަށް ފަހު ބުނީ މި ވޭރިއެންޓު މަސައްކަތް ކުރަނީ ޑެލްޓާ ވޭރިއެންޓާ އެއް ގޮތަށް ނަމަ، ހޮސްޕިޓަލުގައި އެޑްމިޓް ކުރާ މީހުން އިތުރުވާނެ ކަމަށެވެ.
ނަމަވެސް ހައި ރިސްކު ކެޓެގެރީގައި ހިމެނޭ އުމުރުން ދުވަސްވީ މީހުންނަށް އޮމިކްރޯން ވޭރިއެންޓް ޖެހުމުން، ވަރަށް މަދު ހާލަތްތަކުގައި ހާލު ސީރިއަސް ވެ އެވެ.
އޮމިކްރޯން ވޭރިއެންޓްގައި ބަލިވުން ކުޑަ ކަމަށް ބެލެވުނު ނަމަވެސް، އެ ވޭރިއެންޓް ދަނީ ވަރަށް ހަލުވިކަމާ އެކު ފެތުރެމުންނެވެ. ސައިންސްވެރިން ދެކޭ ގޮތުގައި މިއީ ޑެލްޓާ އަށް ވުރެ ހަލުވި ވޭރިއެންޓެކެވެ.
ދެކުނު އެފްރިކާގައި ހެދި ދިރާސާއަކުން ދެއްކި ގޮތުގައި އޮމިކްރޯން ވޭރިއެންޓާ އެކު ކޮވިޑަށް ޕޮޒިޓިވްވެއްޖެ ނަމަ ހޮސްޕިޓަލުގައި ފަރުވާ ކުރަން ޖެހުމުގެ ފުރުސަތު 70-80 ޕަސެންޓު ކުޑަވެ އެވެ.
ނަމަވެސް މި ވޭރިއެންޓާ އެކު ހޮސްޕިޓަލުގައި އެޑްމިޓު ކުރާ މީހުންގެ ހާލު ސީރިއަސްވުމުގައި އެހެން ވޭރިއެންޓްތަކާ ތަފާތެއް ނެތް ކަމަށް ވެސް އެ ދިރާސާ އިން ދެއްކި އެވެ.
އިމްޕީރިއަލް ކޮލެޖް ލަންޑަން އިން ހެދި އޮމިކްރޯންގެ އެނެލިސިސް އިން ދެއްކި ގޮތުގައި މިޔުޓޭޝަންތަކާ ހެދި އޮމިކްރޯންގެ ނުރައްކާ ޑެލްޓާ އަށް ވުރެ ކުޑަ އެވެ.
އެގޮތުން ވެކްސިން ނުޖަހާ ހުރި މީހެއް ނަމަ، ޑެލްޓާއާ އަޅާ ބަލާއިރު، އޮމިކްރޯންގައި ބަލިވެގެން އެމެޖެންސީކޮށް ފަރުވާ ކުރަން ޖެހުމުގެ ފުރުސަތު 11 ޕަސެންޓު ކުޑަ އެވެ.
ޔުނިވާސިޓީ އޮފް ހޮންކޮންގެ ދިރާސާ އިން ދެއްކި ގޮތުގައި އޮމިކްރޯން ވޭރިއެންޓުގައިވާ މިޔުޓޭޝަންތަކުގެ ސަބަބުން ވަރަށް ފަސޭހައިން "އެއާވޭޒް" ނުވަތަ ނޭވާލާ ނިޒާމަށް އިންފެކްޝަން ފޯރަ އެވެ. އެހެން ނަމަވެސް ފުއްޕާމޭގެ އެތެރޭގައިވާ ޓިޝޫތަކާ ހިސާބަށް އޮމިކްރޯން ވޭރިއެންޓު ފޯރަން އުނދަގުލެވެ.
