މަނާމާ، ބަހްރެއިން (ޑިސެމްބަރު 23) - އިރާނުން ޔަމަނުގެ ހޫތީންނަށް ހަތިޔާރުތަކެއް ފޮނުވަނިކޮށް އަރަބި ކަނޑުން ބޯޓެއް ހިފަހައްޓާފައިވާ ކަމަށް އެމެރިކާ އިން ބުނެފި އެވެ.
ޔޫއެސް ނޭވެލް ފޯސާޒް ސެންޓްރަލް ކޮމާންޑް (ނެވްސެންޓް) އިން ބުނީ އުތުރު އަރަބި ކަނޑުން ފާހަގަވި ބޯޓު ހިފެހެއްޓީ ޑިސެމްބަރު 20 ގައި ކަމަށެވެ. އޭގައި ތިބި ފަސް މީހުންނަކީ ޔަމަނުގެ ރައްޔިތުންނެވެ.
ޔަމަނުގެ ގާނޫނީ ސަރުކާރާއި ހޫތީ ހަނގުރާމަވެރިންނާ ދެމެދު 2014 ވަނަ އަހަރުން ފެށިގެން ދަނީ ހަނގުރާމަ ކުރަމުންނެވެ. އިރާނުން ހޫތީންނަށް އެހީވާ ކަމަށް ތުހުމަތު ކުރެވޭ އިރު، ސަރުކާރުގެ ފައުޖަށް އެހީވަނީ ސައުދީ އަރަބިއްޔާގެ އަސްކަރީ ކޯލިޝަނުންނެވެ.
"ޔޫއެސް ފަސް ވަނަ ފްލީޓްގެ މަނަވަރުތަކުން ހިފެހެއްޓި މަސް ބޯޓުން އަތުލައިގަތީ 1400 އޭކޭ-47 ރައިފަލް އާޢި 226،600 ވަޒަން،" އެމެރިކާގެ ކަނޑުގެ ސިފައިން ނެރުނު ބަޔާނެއްގައި ބުންޏެވެ.
"ވަކި ދައުލަތަކަށް ނިސްބަތް ނުވާ މަސް ބޯޓު ފުރި ކަމަށް ބެލެވެނީ އިރާނުން. އެ ބޯޓު ބައިނަލްއަގްވާމީ ކަނޑުގެ ސަރަހައްދުން ދަތުރު ކުރި ރޫޓަކީ މީގެ ކުރިން ވެސް ގާނޫނާ ހިލާފަށް ޔަމަނުގެ ހޫތީންނަށް ހަތިޔާރު ފޯރުކޮށްދޭން ބޭނުންކޮށްފައިވާ ރޫޓެއް."
ބަހްރެއިން ގައި ގާއިމްވެގެން ތިވޭ ޔޫއެސް ފަސް ވަނަ ފްލީޓުގެ މަނަވަރުތަކުން މި އަހަރުގެ ތެރޭގައި ގާނޫނާ ހިލާފަށް ޓްރެފިކް ކުރަނިކޮށް 8،700 އަށް ވުރެ ގިނަ ހަތިޔާރު ހިފަހައްޓާފައި ވެ އެވެ.
ޔަމަނުގެ ހޫތީންނަށް އިރާނުން އެހީވާ ކަމަށް އެމެރިކާ އާއި ސައުދީ އަރަބިއްޔާ އިން ވެސް ތުހުމަތު ކުރެ އެވެ. ނަމަވެސް އިރާނުން އެ ތުހުމަތު ދޮގުކުރެ އެވެ.
"ހޫތީންނަށް ނުސީދާކޮށް އަދި ސީދާކޮށް ވެސް ހަތިޔާރު ވިއްކުމާއި ފޯރުކޮށްދިނުމަކީ އދ. ގެ ސަލާމަތީ މަޖިލީހުގެ ގަރާރުތަކާއި، އެމެރިކާގެ ދަތިކުރުމުގެ ފިޔަވަޅުތަކާ ހިލާފު ކަމެއް،" އެމެރިކާގެ ބަޔާނުގައި ބުންޏެވެ.
އެމެރިކާ ކަނޑުގެ ސިފައިން ބުނީ ބޯޓުގެ ކްރޫ މެމްބަރުން ހައްޔަރުކުރާނެ ކަމަށާއި ބޯޓަކީ ކޮމާޝަނަލް ކަނޑުގެ ދަތުރަށް އޮތް ނުރައްލަކަށް ވާތީ ފައްތާލާފައިވާ ކަމަށެވެ.
