ބެއިޖިން، ޗައިނާ (ޑިސެމްބަރު 23) - ޗައިނާގެ ސެލެބްރިޓީން ނުދައްކާ ހުރި ޓެކްސް ދައްކައި ނިންމުމަށް 10 ދުވަސް ދީފި އެވެ.
ޓެކްސް ނުދައްކާ މައްސަލަ އާއި ސެލެބްރިޓީންގެ އަހުލާގީ މިންގަނޑު ދަށް މައްސަލައިގައި ޗައިނާ ސަރުކާރުން އަންނަނީ ފިޔަވަޅު އަޅަމުންނެވެ.
ޗައިނާގެ މުނިފޫހިފިލުވުމުގެ ސިނާއަތް އެންމެ ބޮޑަށް ހިނގާ ތަންތަނުގެ އިދާރާތަކުން ވަނީ ސެލެބްރިޓީން ޓެކްސް ދައްކައި ނިންމަން ސުންގަޑި ކަނޑައަޅައިފަ އެވެ.
ބެއިޖިން، ޝަންހާއީ، ގުއާންގްޑޮންގް، ޒެޖިއާންގް އަދި ޖިއަންގްސޫ ޕްރޮވިންސުން ސެލެބްރިޓީންނަށް އެންގީ ސުންގަޑީގެ ތެރޭގައި ޓެކްސް ނުދައްކައިފި ނަމަ ހަރުކަށި ފިޔަވަޅު އަޅާނެ ކަމަށެވެ.
"ސެލެބްރިޓީންގެ އަމަލުތައް ރަނގަޅު ކުރަން ލިބުނު މުއްދަތުގައި އެކަން ނުކޮށްފި ނަމަ، ޓެކްސް ޑިޕާޓްމަންޓުން ސީރިއަސް ވިސްނުމެއްގައި ކުރިއަށް ދާނެ،" ގުއާންގްޑޮންގް ޓެކްސް އޮފީހުން ބުންޏެވެ.
މިދިޔަ ހޯމަ ދުވަހު ޗައިނާގައި ލައިވް ސްޓްރީމިން އަށް މަގްބޫލް "ކުއީން" ހުއާންގް ވެއި ޓެކްސް ނުދައްކާ ހުރުމުން 200 މިލިއަން ޑޮލަރުން ޖޫރިމަނާ ކުރި އެވެ. އޭގެ އެއް ދުވަސް ފަހުން 110 މިލިއަން މީހުން ފޮލޯ ކުރާ އޭނާގެ ސޯޝަލް މީޑިއާ އެކައުންޓުތައް ސަސްޕެންޑް ކުރި އެވެ.
މިދިޔަ އޯގަސްޓް މަހު އެކްޓްރެސް ޒެންގް ޝުއާންގް ޓެކްސް ނުދައްކާ ހުރުމުން 46 މިލިއަން ޑޮލަރުން ޖޫރިމަނާ ކުރި އެވެ. އޭގެ ކުރިން 2018 ވަނަ އަހަރު އެކްޓްރެސް ފޭން ބިންގްބިންގް ޓެކްސް ނުދައްކާ ހުރި މައްސަލަ ފެންމަތިވި، އޭނާގެ ކެރިއަރު ވަނީ ހުއްޓުމަކަށް އައިސްފަ އެވެ.
ފޭން އަކީ އޭގެ ކުރިން ޗައިނާގެ އެންމެ މުއްސަނދި އެއް އެކްޓްރެސް އެވެ. އޭނާ ވަނީ ހޮލީވުޑްގެ އެކްސް-މެން އަދި އަޔަން މޭން ފަދަ ފިލްމު ސީރީޒްތަކުން ވެސް ފެނިފަ އެވެ.
