ޕެރިސް (ޑިސެމްބަރު 24) - މެޗުގެ އިތުރު ވަގުތުގަައި އާޖެންޓީނާގެ ފޯވަޑް މައުރޯ އިކާޑީ ޖެހި ލަނޑާ އެކު، ފްރާންސް ލީގުގައި ބަލިނުވެ ރޭ ސަލާމަތްވެއްޖެ އެވެ.
ރަށުން ބޭރުގައި ރޭ ލޯރިއެންއާ ދެކޮޅަށް ޕީއެސްޖީ ކުޅުނު މެޗު 1-1 އިން އެއްވަރުވިއިރު، ފުރަތަމަ ހާފު ނިމެނިކޮށް ލޯރިއެން އަށް ލީޑު ހޯދައިދިނީ ތޯމަސް މޮންކޯޑިއުން ޖެހި ލަނޑުންނެވެ. މެޗުގެ އިތުރު ވަގުތުގައި ޕީއެސްޖީން މެޗުގެ ނަތީޖާ އެއްވަރުކުރީ އިކާޑީ ޖެހި ލަނޑުންނެވެ. އަޗްރަފް ހަކީމީ ހުރަސްކޮށްލި ބޯޅަ އިކާޑީ ގޯލުގެ ތެރެއަށް އަމާޒިކޮށްލީ ބޮލުންނެވެ.
އިކާޑީ ލަނޑު ޖެހުމުގެ ކުރިން، ޕީޢެސްޖީގެ ޑިފެންޑަރު ސާޖިއޯ ރާމޮސް އަށް ވަނީ ދެ ރީނދޫ ކާޑާއެކު، ރަތްކާޑު ދައްކައިފަ އެވެ. އެހެންކަމުން، ޕީޢެސްޖީ މެޗު ނިންމާލީ 10 ކުޅުންތެރިނާ އެކު އެވެ. މި މެޗުގައި ޕީއެސްޖީ އަށް ލަނޑު ޖަހައިދޭން އެންހެލް ޑި މާރިއާ އަަށް ރަނުގެ ފުރުސަތެއް ލިބުނުއިރު، ބޭނުމެއް ނުކުރެވުނެވެ. އަނެއްކޮޅުން ލިއޮނަލް މެސީ ފޮނުވާލި ބޯޅައެއް ލޯރިއެންގެ ކީޕަރު ޕައުލް ނާޑީ ވަނީ މަތަކޮށްފަ އެވެ.
ލަނޑު ޖެހުމަށް ފަހު އިކާޑީ އުފާފާޅުކުރަނީ.-- ފޮޓޯ: އޭއެފްޕީ
ރެލިގޭޝަން ޒޯންގައި އޮތް ލޯރިއެން ވަނީ ޖުމްލަކޮށް ބަލާއިރު، ތަރިން ގިނަ ޕީއެސްޖީ ކައިރީގައި މޮޅަށް ކުޅެފަ އެވެ. ތާވަލްގެ 19 ވަނައިގައި ލޯރިއެން އަށް 19 މެޗުން ވަނީ 16 ޕޮއިންޓް ލިބިފަ އެވެ. ޕީއެސްޖީ އެއް ވަނައިގައި އޮތީ 13 ޕޮއިންޓުގެ ލީޑަކާ އެކު އެވެ. އެއީ 19 މެޗުން 46 ޕޮއިންޓް ހޯދައިގެންނެވެ. ދެ ވަނައިގައި އޮތް ނީސް އިން ވަނީ ރޭ ލެންސް 2-1 އިން ބަލިކޮށްފަ އެވެ. ނީސް އަށް 19 މެޗުން ވަނީ 33 ޕޮއިންޓް ލިބިފަ އެވެ.
ރޭގެ މެޗަކީ މި ފަހަރު ޕީއެސްޖީ އަށް ލީގުގައި މޮޅެއް ނުލިބި ނިމުނު ފަސް ވަނަ މެޗެވެ. މި މެޗަށް ފަހު ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނީ ޓީމުގެ ނަތީޖާތައް ރަނގަޅު ނަމަވެސް، ޓީމުގެ ފަރާތުން ދެކެން ބޭނުންވާ ކުޅުން ނުދެއްކޭ ކަމަށެވެ.
"ކުޅުމަށް ބަލާއިރު މި ޓީމުގެ އެންމެ ރަނގަޅު ކުޅުން އަދި ނުދެއްކިގެން މި އުޅެނީ. އަހަރަމެން އަދިވެސް އެބަޖެހޭ ކުޅުން ރަނގަޅުކުރަން،" ޕޮޗެޓީނޯ ބުންޏެވެ.
ރާމޯސްގެ ރަތް ކާޑާ ބެހޭގޮތުން އަމާޒުވި ސުވާލުތަކަށް ޖަވާބުދޭން ޕޮޗެޓީނޯ ބޭނުމެއްނުވި އެވެ. -- ބީބީސީ
