ބިލްބާއޯ (ޑިސެމްބަރު 23) - ރަށުންބޭރުގައި ރޭ 2-1 އިން އެތުލެޓިކް ބިލްބާއޯ ބަލިކޮށް ރެއާލް މެޑްރިޑުން ސްޕެނިޝް ލީގު ފިނި މޫސުމުގެ ބްރޭކް ދިޔައިރު، އެއް ވަނައިގައި އަށް ޕޮއިންޓުގެ ލީޑެއް ނަަގައިފި އެވެ.
ސްޕެނިޝް ލީގުގެ މެޗުތައް އާ އަހަރަށް މެދުކަނޑާލިއިރު، ރެއާލް އެއް ވަނައިގައި އޮތީ 19 މެޗުން 46 ޕޮއިންޓާ އެކު އެވެ. ދެ ވަނައިގައި އޮތް ސެވިއްޔާ އަށް ވަނީ 18 މެޗުން 38 ޕޮއިންޓާ އެކު އެވެ. ތިން ވަނައިގައި އޮތް ރެއާލް ބެޓިސް އަށް 18 މެޗުން 33 ޕޮއިންޓް ލިބިފައިވާއިރު، ހަތަރެއްގައި އޮތް ރަޔޯ ވަޔެކާނޯ އަށް ވަނީ 18 މެޗުން 30 ޕޮއިންޓާ އެކު އެވެ. ބާސެލޯނާ އޮތީ 18 މެޗުން 28 ޕޮއިންޓާ އެކު ހަތް ވަނައިގަ އެވެ.
ބިލްބާއޯ ދަނޑުގައި ރޭ ކުޅުނު މެޗުގެ ހަތް މިނިޓް ތެރޭ ރެއާލުން ވަނީ ދެ ގޯލުގެ ލީޑެއް ނަގައިފަ އެވެ. ފުރަތަމަ ގޯލު ޖެހީ ހަތަރު ވަނަ މިނިޓްގަ އެވެ. މިއީ ޓޯނީ ކްރޫސް ދިން ބޯޅައަކުން ބެންޒެމާ ޖެހި ގޯލެކެވެ. އޭގެ ތިން މިނިޓް ފަހުން ބެންޒެމާ އިތުރު ގޯލެއް ޖަހައި، ވަނީ އަހަރު ނިމުމުގެ ކުރިން މި ސީޒަނުގައި 20 ގޯލު ހަމަކޮށްފަ އެވެ.
ރެއާލުން ދެ ގޯލުގެ ލީޑެއް ނެގިތާ ތިން މިނިޓް ފަހުން ބިލްބާއޯގެ އޮއިހާން ސަންކޭޓް ވަނީ އެ ޓީމަށް ގޯލެއް ޖަހައިދީ އުއްމީދެއް ހޯދައިދީފަ އެވެ. ބިލްބާއޯ އަށް އެއްވަރުކޮށްދޭން ދެ ވަނަ ހާފުގައި އިނާކީ ވިލިއަމްސް އަށް ލިބުނު ފުރުސަތުން އޭނާ ޖެހި ބޯޅަ ރެއާލްގެ ކީޕަރު ތިބައު ކޯޓުއާ ވަނީ މަތަކޮށްފަ އެވެ.
ރެއާލުން ތިން ވަނަ ގޯލެއް ޖަހަން އެޑެން ހަޒާޑާއި ކްރޫސް ފޮނުވާލި ހަމަލާތައް ބިލްބާއޯގެ ކީޕަރު ހުލެން އަގިރެއްޒަބަލާ ވަނީ މަތަކޮށްފަ އެވެ.
ކާލޯ އަންޗެލޮޓީގެ ކޯޗުކަމުގައި ކުޅޭ ރެއާލުން އެންމެ ފަހުން ކުޅުނު 25 މެޗުގެ ތެރެއިން ބަލިވީ އެންމެ ދެ މެޗުންނެވެ. އެ ޓީމު އެންމެ ފަހުން ބަލިވީ އޮކްޓޫބަރު މަހު ތިން ވަނަ ދުވަހު އެސްޕަންޔޯލް އަތުންނެވެ.
