ޓައިވާނަކީ ޗައިނާގެ ބައެއްގެ ގޮތުގައި ގަބޫލު ކުރުމުގެ "ވަން ޗައިނާ ޕޮލިސީ" އަށް ދިވެހިރާއްޖެއިން ތާއީދު ކުރާނެކަމުގެ ޔަގީންކަން ދިވެހި ސަރުކާރުގެ ފަރާތުން ޗައިނާ ސަރުކާރަށް މިއަދު ދީފި އެވެ.
ޓައިވާނަކީ މިނިވަން ދައުލަތެއްގެ ގޮތުގައި ބަލައިނުގަންނަ ވަން ޗައިނާ ޕޮލިސީއަށް ދިވެހި ސަރުކާރުން ތާއީދު ކުރާނެކަމުގެ ޔަގީންކަން ދެއްވީ އެ ގައުމުގެ ސަފީރު ވަން ލީޝިންއާއެކު ބޭއްވެވި ބައްދަލުވުމެއްގައި ނައިބު ރައީސް ފައިސަލް ނަސީމެވެ.
"ރައީސުލްޖުމްހޫރިއްޔާގެ ނައިބު ވަނީ ދިވެހިރާއްޖެއިން 'ވަން ޗައިނާ' އުސޫލުގައި ހިފަހައްޓާނެކަމުގެ ޔަގީންކަން އަރުވާފަ،" މިއަދުގެ ބައްދަލުވުމަށްފަހު ރައީސް އޮފީހުން ނެރުނު ބަޔާނެއްގައި ތަފްސީލަށް ނުގޮސް ބުނެފައިވެ އެވެ.
އެ ބައްދަލުވުމުގައި ނައިބު ރައީސް ފައިސަލް ވަނީ ކޮވިޑް-19 ގެ ބަލިމަޑުކަމުގެ ތެރޭގައި ރާއްޖެއަށް ޗައިނާގެ ފަރާތުން ދިން އެހީތެރިކަމަށް ޝުކުރު އަދާ ކުރައްވައިފަ އެވެ. އަދި އަދި ޖީ-20 ގެ ޑެޓް ސާވިސް ސަސްޕެންޝަންގައި ރާއްޖެއަށް ބައިވެރިވެވުނީ ޗައިނާގެ އެހީތެރިކަން ލިބިގެން ކަމަށް ފާޙަގަ ކުރައްވައި ނައިބު ރައީސް ވަނީ އެކަމަށްޓަކައި ޝުކުރު އަދާ ކުރައްވައިފަ އެވެ.
އޭގެ އިތުރުން ޗައިނާ އާއި ރާއްޖެއާ ދެމެދު އޮތް ގުޅުން ބަދަހި ކުރުމަށް ސަފީރާއެކު ނައިބު ރައީސް ފައިސަލް މަޝްވަރާ ކުރެއްވި ކަމަށް ރައީސް އޮފީހުން ބުންޏެވެ. އަދި އަންނަ އަހަރަކީ ދެ ގައުމުގެ ދެމެދުގައި ސިޔާސީ ގުޅުން ގާއިމްކުރިތާ 50 އަހަރު ފުރޭ މުނާސަބާ ކަމަށްވާތީ، އެކަން ފާހަގަ ކުރުމަށް ހާއްސަ ހަރަކާތްތަކެއް ބޭއްވުމަށް ވެސް ދެ ބޭފުޅުން ވާހަކަ ދެއްކެވި އެވެ.
